Ads by Google Ads by Google

Tatala aloa’ia fale o pisinisi o le Moso’oi Building in Tafuna


O nisi sa auai i le sauniga e tatatala aloa'ia ai le Maota o Pisinisi "Moso'oi Building" i Tafuna i le aso Lulu. [ata: Leua Aiono Frost]

Na toto'o le Faletua o Alofa Aofia i le lipine e tatala aloa'ia ai le Moso'oi Building i Naumati i Tafuna ma amata ai loa ona asiasia le fale atoa e i latou na vala'aulia fa'apitoa mo lea sauniga mamalu. [ata: Leua Aiono Frost]

O lo ua mae'a tatalaina aloa'ia le Fale o Pisinisi o le Moso'oi i Naumati Tafuna i le taeao o le aso Lulu. O le fa'amoemoe fo'i sa loma e le afioga Samoa Sila Poasa ma le fanau ma aiga ina ia fa'amanatuina ai le aso soifua o le tina o le aiga, Falesa Ale Poasa i lenei tausaga.

 

Ua fa'ailoa mai o lea fale, e 9 potu e mafai ona fa'atautaia mai ai nisi pisinisi i le fogafale muamua, e iva fo'i potu i le fogafale pitoaluga ma o se fale fo'i ua fausia lelei, agava'a le fausaga e fa'ataututu ma matagi malolosi e ono lutia ai le atunu'u, ma o sona tau atoa e silia teisi i le $2 miliona. Sa amatalia mai i le tausaga e 2015, ae ua mae'a nei. O le ata o le galuega fa'atasi ma lona fausaga atoa na tusia ma fausia lava e le Konekarate Faufale a Samoa Sila Poasa.

 

E pei ona silafia o lenei alo o le atunu'u ua mae'a mai lana tautua i vaega au a le US Navy, ona soso'o lea ma le tautua fo'i ia Amerika Samoa i le Matagaluega o Galuega Lautele ae maise na avea ma Fa'atonusili o Uafu, Taulaga ma Malaeva'alele i le faigamalo a Kovana AP Lutali. O lo'o fa'aauau pea lava lana tautua e ala i lana Konekarate Faufale Tetele lea ua ia fausia ma fa'amae'a lelei ai lea Maota o Pisinisi o le Moso'oi.

 

Ina ia fesiligia se mafuaga ua fausia ai lea fale, ae fa'ailoa mai e Samoa Sila Poasa, "O se taumafaiga lava ina ia mautu nofoaga e fa'atautaia mai ai ni pisinisi a le mamalu o le atunu'u o le a mo'omia nofoaga fausia lelei mo ni tautua eseese. O le agaga fo'i ia gafatia e le fanau pe a soloa'i mai tausaga o le soifuaga ma latou fa'atautaia lea fale, e aoga mo i latou e tautuaina ai le atunu'u pe a fa'atutu pisinisi i potu uma e 18 o le Moso'oi."

 

Ona o le masina fo'i lenei o le Vaiaso o le Moso'oi i Amerika Samoa, ua talafeagai lava fo'i le tatalaina o lea fale o pisinisi ma le fa'amoemoe o le atunu'u, ae maise o le taumafaiga a le Matagaluega o Fefa'ataua'iga ina ia una'ia tagata lautele ua i ai agava'a i tautua lautele eseese e fa'atutuina pisinisi e fesoasoani e fa'aleleia le tamaoaiga tausi o Amerika Samoa.

 

I se saunoaga a Samoa Sila Poasa e tusa o lea fale ma lona fa'amoemoe, sa ia fa'ailoa mai ai, "Afai o fia maua se fale e fa'anofoia ai lau pisinisi, ua mae'a tapena lenei maota mo lea tulaga, ua i ai fo'i mea pu'eata ma ua si'omia i le pa e mautinoa ai lou saogalemu fa'atasi ma au meatotino."

 

O i latou na auai i lea sauniga mamalu ma le pu'upu'u e tatala ai lenei galuega tele, o le susuga le Fa'afeagaiga Rev. Elder Fiti Aofia ma le Faletua Alofa Aofia mai le EFKAS i Aoa lea e galulue ai Samoa Sila Poasa ma le faletua, talu mai ona fa'asuafaina e le aiga o lona tama i le suafa "Samoa." Ua tautua ai nei i le Ekalesia atoa ma le afio'aga i lona aiga Sa Aumoeualogo. O sui matutua o la'ua aiga i ona itu na lua sa auai fa'apitoa e patipatia lea fa'amoemoe ua au, ma ua mata'ina fo'i lona tula'i mai i le fa'ai'uga o lenei tausaga.

 

Peita'i, o le sui mai le Malo sa pa'au atu ai le Loia Sili Talauega Eliasaro, e molimauina fo'i lea galuega ua mati'e mai lea itu o le atunu'u.

 

"O lenei galuega sa fai lava ma malolo teisi, saili seleni e fa'amae'a ai, a sau le vaivai, ia koma ae tatalo mo ala e fa'auma ai, ma e fa'amaoni lava le Atua, e aumai le malosi ma le tamaoaiga e mae'a ai lenei galuega, lea ua tatou o mai ai, e toe fa'afo'i le vi'iga i le Atua, aua sa ia mafuta mai lava ma foa'i mai mo le galuega nei,” o se tautalaga lea a Poasa e tusa o le galuega, ma sa iloga fo'i ona fiafia le tina o le aiga, aua o lea fa'ato'a va'ai i le fale, ae ua mae'a fo'i ona fausia.

 

I le fale atoa, ua na'o le lua potu ua amata ona fa'atula'ia ai pisinisi. Ua fa'atautaia le pisinisi o nofoa e fofo tua fa'apea ma tautua tau le fa'aleleia o atigilima ma atigivae o tausala ma manaia o le atunu'u.