O le aso Faraile o le vaiaso na te’a nei na tapunia aloaia ai galuega a le Fono Faitulafono mo lenei tausaga, i le mae’a ai lea o aso fono e 90 e pei ona fa’atulaga mai e le Fa’avae, tusa lea e ta’i 45 aso i le tauaofiaga e tasi.

O le galuega mulimuli lava na galulue i ai afioga i Senatoa ma Faipule, o le pasiaina lea o le Paketi Faaopoopo a le faigamalo e $11,013,000 e pei ona fuafua le faigmalo e fa’atupe ai isi vaega o le paketi o le tausaga tupe fou lenei 2018.

Na palota fulisia le maota maualuga e pasia ai le pili o le paketi faaopoopo a le maota o sui. E fa’apena fo’i i le maota o sui, o le palota fulisia fo’i na latou pasia ai le latou pili o le paketi faaopoopo a le kovana fa’atasi ai ma suiga, ma ua tuuina atu nei lenei tulafono mo se finagalo o le afioga i le ali’i kovana.

Ae pei ona manino i le agaga o le tulafono o le peketi faaopoopo, o lenei tulafono o lo o fa’amoeoe e fa’atupe mai i pili tupe sa tuuina atu e le faigamalo i le Fono Faitulafono e pasia. Ae le o pili tupe uma na tuuina atu i le Fono lea ua pasia. O se tasi o tulafono e le i faia i ai se finagalo o maota e lua, o le pili e faaoo ai le lafoga i oloa e 7%.

I le tapunia ai o galuega a le maota maualuga, na fa’afetaia ai e le afioga i le alii Peresetene o le maota, afioga Gaoteote Tofau Palaie afioga i Senatoa e tusa ai o le galuega sa latou fita i tuga i ai i lenei tausaga atoa.

“E le faigofie la outou faiva, ae sa outou galulue punoua’i ona o le manatu ia i ai so outou sao mo le atina’e o le malo ma le atunu’u. O outou o Tama ma Tina e tua i ai le faigamalo ma le atunu’u,” o le saunoaga lea a Gaoteote i afioga i Senatoa.

Sa ia faamalulu fo’i ona o tulaga i le fa’atinoina o galuega, peita’i i lona talitonuga, e mafua ona eseese lagona i le tele o taimi e saili ai le tofa, ona o le naunau lava ina ia manuia le atunu’u ma le faigamalo.

O le afioga i le ali’i senatoa ia Tuiagamoa Tavai na fai ma sui o afioga i Senatoa e fa’afetaia ai Gaoteote e tusa ai o le ta’ita’iina o le maota. Saunoa Tuiagamoa e fa’apea, e ui i le to’atele o afioga i Senatoa ua sinasina o latou lauao, ae vaaia lava lo latou fa’aaloalo i le ta’ita’i o le maota, ona o le tofa fa’a tagata matua sa ia fa’atautaia ai le galuega.

I le maota o sui, na fa’afetaia ai e le afioga i le Fofoga Fetalai ia Savali Talavou Ale afioga i Faipule e tusa ai o le galuega sa alo atu i ai komiti eseese, i le sailiina lea o se ‘ai mo le manuia o le atunu’u, aemaise lava i pili tupe sa tuuina atu e le faigamalo latou te galulue i ai.

Saunoa Savali e fa’apea, e ui lava i le faigata i le filifiliga, ae sa vaaia lava le naunau o afioga i Faipule e fai le mea sili e fesoasoani ai i le malo. Sa ia fa’afetaia le maota atoa e tusa ai o le galuega ua mae’a.

Na fa’afetaia e le afioga i le taitaifono o le Komiti o le Paketi a le maota o sui, afioga Vailiuata S. Leasiolagi afioga i Faipule ona o le galuega sa alo atu i ai le Komiti mo le tele o vaiaso. Saunoa Vailiuama e fa’apea, e ui lava i le faigata o le tulaga sa i ai le galuega, ae ua molimauina lava le galulue fa’atasi o le maota.

O le aso Lua o le vaiaso nei i le itula e 8:00 i le taeao, ua fa’atulaga e faia ai le iloiloga a le maota o sui ma le Fa’atonusili o Aoga a le malo, atoa ai ma sui o le Komiti o le Sikolasipi a le malo, ona o le mataupu e fa’atatau i fa’aletonu o lo o a’afia ai ni isi o fanau aoga i fafo, i le tuai lea ona maua a latou siaki mai le malo.