Ads by Google Ads by Google

Tapunia aloaia galuega a le Fono Faitulafono ina ua mae’a le Fono Fa’apitoa


Le Peresetene o le Senate, afioga Gaoteote Palaie Tofau ma afioga i Senatoa i le mae’a ai o galuega a le Fono Faitulafono i le taeao ananafi. [ata AF]

Le afioga i le Fofoga Fetalai ia Savali Talavou Ale ma ni isi o afioga i Faipule i le aso mulimuli o galuega a le Fono Faitulafono i le taeao ananafi, ina ua tapunia aloaia le Fono Fa’apitoa sa valaauina e le ali’i kovana. [ata AF]
ausage@samoanews.com

O le taeao ananafi na tapunia aloaia ai Fono Faitulafono a Amerika Samoa, i le mae’a ai lea o galuega sa alo atu i ai maota e lua i le Fono Fa’apitoa sa valaauina e le afioga i le ali’i kovana ia Lolo Matalasi Moliga.

 

O le vaiaso na te’a nei na tapunia aloaia ai le uluai tauaofiaga a le Fono Faitulafono mo le nofoaiga lona 35 o loo nofoia nei, ae na toe fa’aauau mai i le vaiaso lenei galuega a maota e lua, mo le fa’amae’aina o ni isi o galuega sa talosagaina e le ali’i kovana i lana ulua’i Fono Fa’apitoa o le nofoaiga lenei.

 

E pei ona taua e le ali’i kovana i sana tusi sa tauaao atu i ta’ita’i o le Fono Faitulafono, o mataupu sa naunau e talanoaina i lana fono fa’apitoa e aofia ai le fa’amaonia o totino o Komiti Fa’afoe o Ofisa eseese a le malo ua mae’a ona tofia, fa’apea ai le talanoaina o ni isi o mataupu taua a le Fono e le i mae’a ona fa’atinoina i le ulua’i tauaofiaga ua mavae atu.

 

O le vaiaso na te’a nei na pasia uma ai e le maota o sui totino o Komiti Fa’afoe sa tofia e le kovana, ae o le vaiaso nei lea na fa’atoa galulue ai le maota maualuga e fa’apasia totino o Komiti Fa’afoe uma sa tofia e le ali’i kovana.

 

I luma o le maota o sui, na fa’afetaia ai e le afioga i le fofoga fetalai ia Savali Talavou Ale afioga i faipule i lo latou fa’amalolosi lea e fa’ataunu’u tiute ua filifilia ai i latou e o latou itumalo.

 

“E le faigofie galuega e pei ona talosagaina ai i tatou e le kovana tatou te galulue ai, ae fa’afetai i lo outou naunau e fa’atino galuega lelei mo le atunu’u aemaise ai le tapuaiga a itumalo ta’itasi”, o le saunoaga fa’afetai lea a le tofa i le Tootoo ia Savali ina ua fa’ai’u galuega a le maota o sui ananafi.

 

E ui o lea ua malolo le fono mai ana galuega masani, ae sa talosagaina e Savali afioga i faipule aemaise lava i Ta’ita’i o Komiti eseese a le malo, ina ia fa’aauau pea galuega i soo se taimi e mana’omia ai e le malo ma le atunu’u la latou fesoasoani, i le sailia lea o ni fofo atoa ai ma fesoasoani mo le atunu’u lautele.

 

“O la tatou galuega e le gata i le 45 aso e pei ona fa’atulaga mai e le Fa’avae, ae fa’aauau pea la tatou galuega i le tausaga atoa i soo se taimi e mana’omia ai la outou fesoasoani mo le atunu’u, e talosagaina fo’i afioga i Ta’ita’i Komiti ina ia fa’agasolo iloiloga i soo se mataupu e mana’omia pe afai tou te silafia o se mataupu e a’afia ai le soifua saogalemu o le atunu’u”, o le fautuaga lea a le fofoga fetalai.

 

I luma o le maota maualuga a le Senate, na fa’afetaia ai e le afioga i le ali’i peresetene ia Gaoteote Palaie Tofau afioga i Senatoa, i lo latou fa’amalolosi atu e fa’ataunu’u le fono fa’apitoa sa valaauina e le ali’i kovana.

 

Na fa’avae le agaga fa’afetai o le afioga i le Tama’ita’i o le Ao ia Gaoteote, ina ua amata ane le fono faapitoa a le kovana ae vaaia le atoa uma atu o totino e to’a 18 a le maota maualuga, ma ua agatia mai ai le naunau o afioga i Senatoa e fa’ataunu’u o latou tiute sa filifilia ai i latou e itumalo ma le atunu’u.

 

“E fa’afetai atu i lo outou fa’amalolosi e fa’apasia galuega e pei ona finagalo i ai le afioga i le alii kovana, e ui e le faigofie le toe valaauina o lenei fono fa’apitoa, ae ua faigofie fuafuaga uma i lo outou naunau e fa’ataunu’u tofiga na filifilia ai outou e le Atua”, o le saunoaga lea a Gaoteote.

 

O le vaiaso atoa lenei sa fa’agasolo ai iloiloga a le maota maualuga mo le fesiligia lea ma iloilo totino o Komiti Fa’afoe eseese sa tofia e le kovana, fa’atasi ai ma le tu’uina atu o a latou fa’amanuiga ina ia manuia le fa’atinoina o a latou galuega mo le tautuaina o le atunu’u.