Ads by Google Ads by Google

Taoto atu fa’aiuga Fa’amasinoga talosaga a Rev. Amaama Tofaeono


Le maota o le Ekalesia EFKAS ua faapitoa mo le Failautusi Aoao i le laumua i Kanana Fou. [ata AF]

Se vaaiga atu lena i le maota a le Ekalesia EFKAS i Kanana Fou, lea o loo autu i ai le fa’amasinoga o lo o fa’agasolo i le taimi nei i le va o le Komiti a le Au Toeaiina ma le Failautusi a le Ekalesia, susuga Rev. Amaama Tofaeono. [ata AF]
ausage@samoanews.com

Ua taoto atu nei i se fa’aiuga a le Vaega Iloilo o le Fa’amasinoga Maualuga le talosaga na fa’aulu e le susuga i le ali’i faifeau ia Rev. Amaama Tofaeono, tauala atu i lana loia fautua ia Tasi Tuiteleleapaga, mo se avanoa e toe iloilo ai e le fa’amasinoga lana fa’aiuga ua mae’a ona tu’uina mai, e lagolagoina ai le fa’aiuga a le Au Toeaiina e le Ekalesia, e fa’atula’i ese ai o ia ma lona aiga mai le maota o le Failautusi Aoao o loo latou nofoia i le taimi nei.

 

O le afioga i le ali’i fa’amasino ia Elvis P. Patea sa iloiloina lenei mataupu, i le lagolagosua a afioga i ali’i fa’amasino ia Suapaia Pereira ma Satele L. Ali’itai. O le susuga i le ali’i loia ia Tuiteleleapaga sa tula’i mo Rev. Amaama, ae o le tama’ita’i loia ia Gwen Tauiliili-Langkilde o lo o tula’i mo le itu a le Au Toeaiina ma le Ekalesia Faapotopotoga Kerisiano i Amerika Samoa (EFKAS).

 

O le aso Faraile na te’a nei na iloiloina ai e le Fa’amasinoga le talosaga a Rev. Amaama, ae o le aso Faraile nei lea ua fa’atulaga e iloiloina ai le talosaga a le Ekalesia ina ia fa’aleaoga le talosaga a Rev. Amaama mo se fa’amasinoga fou o lenei mataupu, ina ua talia e le afioga i le ali’i fa’amasino ia Patea le talosaga a T-Langkilde, ina ia tu’u atu se avanoa e tapena mai ai le latou itu i le talosaga a le itu tete’e.

 

TALOSAGA A REV. AMAAMA

 

E i ai le talitonuga o le itu tete’e e le o i ai i le Komiti a le Au Toeaiina se malosi latou te aveese ai le tofi o le Faifeau Fa’au’u mai soo se faifeau ua mae’a ona fa’au’u e le Ekalesia.

 

Na taua e Tuiteleleapaga e fa’apea, e le o tusa ai ma le Fa’avae o le Ekalesia EFKAS le fa’aiuga a le Au Toeaiina ua faia, e aveesea ai le tofi o le Faifeau Fa’au’u mai ia Rev. Amaama.

 

Na fesili Patea ia Tuiteleleapaga po o ai e i ai le malosi e fa’ate’a ai le tofi faifeau fa’au’u mai faifeau o le Ekalesia, na tali le ali’i loia, o le tiute lena o le Fonotele a le Ekalesia, ona o i latou ia sa tu’uina atu le tofiga o le faifeau fa’au’u i faifeau o le Ekalesia e aofia ai ma Rev. Amaama, pau fo’i lena o le malosiaga e mafai ona aveesea le tofi o le Faifeau Fa’au’u.

 

Ona o le fa’aiuga e aveese ai le tofi o le Faifeau Fa’au’u mai ia Rev. Amaama, na afua atu ai loa iina ma le faaiuga e aveese mai ai le tofi o le Failautusi Aoao mai ia te ia, ona o se tasi o agava’a e avea ai se tasi ma Failautusi Aoao o le Ekalesia, ia avea o ia ma Faifeau Fa’au’u.

 

Na finau atili fo’i Tuiteleleapaga e fa’apea, e pei fo’i ona manino i mau sa mafai ona tu’uina atu i le taimi o le fa’amasinoga, e le mafai ona fa’amuta e le Komiti a le Au Toeaiina le tofi o le Failautusi Aoao mai ia Rev. Amaama, ona o le tofiga lea na filifilia e le Ekalesia Aoao, ma e tatau i soo se tasi na te umia lea tofiga ona ia tauaveina le tofiga mo le umi e 4 tausaga.

 

O se tasi o vaega o le fa’afinauga a Tuiteleleapaga, o le le lava lea o le taimi na tapena ai le itu tete’e mo le fa’amasinoga autu. Na taua atili e le ali’i loia e fa’apea, e tele naua isi fa’amaumauga sa tatau i le latou itu ona sailiili toto’a i ai, ina ia mafai ai ona lava sauni e tali atu i tu’uaiga a le itu tagi, ae ua le mafai ona fa’ataunu’uina ia tulaga uma ona o le puupuu o le taimi na tu’uina atu latou te sauni mai ai.

 

Na fesili Patea ia Tuiteleleapaga pe sa ia talosaga i le fa’amasinoga mo se avanoa e tu’uina atu ai se isi taimi fa’aopoopo e tapena mai ai i lenei mataupu, ae na tali le loia e fa’apea, sa mana’omia e le itu tete’e se isi taimi fa’aopoopo e tapena ai mo le fa’amasinoga.

 

O se tasi o itu na aga’i i ai le talosaga a le itu tete’e, e i ai fa’amaumauga sa tatau ona tu’uina atu e le latou itu i luma o le fa’amasinoga e lagolagoina ai la latou mau, na toe fesili Patea i le ali’i loia poo a ia fa’amaumauga, ae na tali Tuiteleleapaga, o fa’amaumauga e fa’atatau i le Fa’avae o le Ekalesia o loo aiaia ai le leai o se malosi e fa’ate’a ai e le Komiti a le Au Toeaiina o le tofi o le Faifeau Fa’au’u mai ia Rev. Amaama.

 

Na fa’ailoa e Patea i le itu tete’e e fa’apea, o lea sa tu’uina atu i luma o le fa’amasinoga i le taimi na iloiloina ai lenei mataupu, le tele o vaega mai totonu o le Fa’avae o le Ekalesia, e lagolagoina ai fa’afinauga a itu e lua, ma ua i ai le talitonuga o le Fa’amasinoga o lea lava sa maua e le itu tete’e le avanoa e fa’aali ai ana mau e lagolagoina ai lana fa’afinauga.

 

I le tali fuaitau a le itu tagi, na taua ai e Tauiliili-Langkilde le leai o ni mau e lagolagoina ai le fa’afinauga mo se fa’amasinoga fou.

 

Na taua e le tama’ita’i loia e fa’apea, o ni isi o vaega e alaga tatau ai ona talia se talosaga mo se fa’amasinoga fou, pe afai sa i ai se vaega o le fa’aiuga a le fa’amasinoga o lo o atagia mai ai ni tulaga fa’aletonu, atoa ai ma le mafai lea e le itu tete’e ona latou fa’ailoa ni isi o mau fou e lei fa’ailoaina i le taimi o le fa’amasinoga.

 

Na taua atili e le loia a le Ekalesia e fa’apea, o le autu atoa o le iloiloga sa faia fa’asaga i lenei mataupu, ia talia e le fa’amasinoga le talosaga a le Ekalesia ina ia fa’atula’i ese Rev. Amaama mai le maota o le Ekalesia o loo ia nofoia, ona o lea ua le toe avea o ia ma Failautusi Aoao.

 

Fai mai le fa’afinauga a le Ekalesia, o lea ua manino i mau uma sa latou tu’uina atu fa’amaoniga o le malosi o loo umia e le Komiti a le Au Toeaiina, e fa’amalolo ai le tofi o le Faifeau Fa’au’u mai ia Rev. Amaama, atoa ai ma le aloaia loa o le aveesea mai o le tofi Failautusi Aoao mai ia te ia.

 

I le fa’aiuga o le fa’afinauga a le itu a le Ekalesia, na taua ai e le tama’ita’i loia le matua mana’omia lea e le Ekalesia o le maota o loo nofoia e Rev. Amaama i le taimi nei mo le fa’atinoina o galuega masani, ae pe mafai ona faia sa poloaiga e nofoia ai e Amaama ma lona aiga se isi fale ae fa’aavanoa le maota mo galuega a le Ekalesia.

 

O le aso Faraile nei lea ua fa’atulaga e toe fofogaina ai le vaega lona 2 o lenei mataupu i luma o le fa’amasinoga maualuga.