Ads by Google Ads by Google

Taofia Ofisa Soifua Maloloina galuega mo le tatalaina i lalo Fale Fono tuai


Se vaaiga i lipine mai le Matagaluega o le Soifua Maloloina ia ua toso solo i vaega o le maota fono, e fa’ailoa ai le taofia o le toe fa’atinoina o se galuega mo le tatalaeseina mai o vaega o le fale, ona o puipuiga i le ono lamatia ai o le soifua i le pefu o lo o maua ai i totonu. [ata AF]
ausage@samoanews.com

Ua fa’amaonia mai e le Fofoga Fetalai o le Maota o Sui, afioga Savali Talavou Ale, le taofia lea o galuega mo le tatalaina i lalo o le Fale Fono tuai a le atunu’u e pei ona amata fa’agasolo mai i le masina na te’a nei, e mafua mai i se fautuaga mai le Matagaluega o le Soifua Maloloina, ona o puipuiga i le a’afia o le soifua maloloina o tagata faigaluega i le pefu o lo o maua mai i laupapa o lo o i totonu o le tino o le fale.

 

I se fa’atalatalanoaga ma Tusitala i le taeao ananafi, na fa’amaonia mai ai e Savali lea tulaga, atoa ai ma lona fa’apupulaina o le tulaga ua o o i ai gaioiga mo le fausiaina lea o le Fale Fono fou a le atunu’u.

 

Na taua e Savali e fa’apea, ua mae’a ona faia se fonotaga i le va o Ta’ita’i o le Fono fa’apea ai ma le afioga i le ali’i kovana ia Lolo Matalasi Moliga, ona o taumafaiga lava ina ia fa’agasolo tulaga o le galuega e pei ona fuafuaina mai i le ogatotonu o lenei tausaga.

 

“O lea ua mae’a ona matou soalaupule ma le afioga i le ali’i kovana, ma ua ma fa’ailoa atu fo’i i ai ma le afioga i le ali’i Peresetene o le Senate ia Gaoteote Palaie Tofau tulaga uma o le galuega, o lea fo’i la ua tu’uina mai lana fautuaga ina ia fa’aauau pea le fa’atinoina o le galuega, a ia uia pea tulaga o tulafono e moomia ina ia mautinoa e sologa lelei taumafaiga mo le fausiaina o le galuega”, o le saunoaga lea a Savali.

 

O le vaiaso na te’a nei na taofia mai ai le toe fa’aauauina o galuega mo le tatalaina i lalo o le fale fono tuai, ona o se fautuaga mai le Ofisa o le Soifua Maloloina a le atunu’u, i le taumafai lava ina ia puipuia le soifua maloloina o tagata faigaluega.

 

Na taua e ni isi o tagata faigaluega a le Fono i le Samoa News e fa’apea, o le pefu o loo maua mai i le laupapa lea o lo o fausia ai totonu o potu fono tuai e lua, o iina lea ua mafua ai ona taofia le toe fa’aauauina o le galuega.

 

Na molimauina e le Samoa News lipine o lo o toso fa’ata’amilo i le tino atoa o le fale fono tuai, e fa’ailoa mai ai le taofia lea ona toe ulufale se isi i totonu. E o o fo’i i luma o faitoto’a o ni isi o potu o afioga i Senatoa, o lo o fa’apipi’i solo ai fa’ailoilo e fa’ailoa mai ai le fa’asa lea ona toe la’asia e tagata faigaluega lea vaega o le fale.

 

O ia fa’ailoilo e pei ona taua e tagata faigaluega a le Fono, o fa’ailoilo sa fa’apipi’i e sui o le Ofisa o le Soifua Maloloina, lea o lo o taua ai a’afiaga o le fa’ama’i o le kanesa ma a’afiaga o le mama, e mafua mai i le pefu o lo o maua mai le vaega o lo o fa’atinoina ai le galuega, e mana’omia ai laei talafeagai mo le puipuia o le saogalemu.

 

Ae ui i le tulaga e pei ona taofia ai le galuega, na fa’amaonia e Savali le fa’aauau pea o fuafuaga mo le fausiaina o le fale fono fou i se taimi e le o toe umi.

 

“O lo o fa’agasolo pea fuafuaga mo le fausiaina o le fale fono fou, pau le tulaga fa’aletonu ona o lea ua taofia mai e le Soifua Maoloina le galuega, e mafua mai i tulaga e pei ona latou taua, ma o lo o fa’atali maua ma le Peresetene i se isi ripoti e tusa ai o le galuega ma le la’asaga o le a soso’o i ai, lea o lo o galulue ai sui o le Fono”, o le saunoaga lea a Savali.

 

O ni isi o vaega e pei ona fa’agasolo mai mo le galuega i nai vaiaso e le i mamao atu, o le faia lea o suega i le tulaga o le malosi o le palapala, e afua mai i lalo o se fautuaga mai le kamupani mai Hawaii lea ua pasia latou te tusia le ata o le galuega.

 

“E le faigofie le tulaga o lo o i ai gaioiga mo le galuega, talu ona talia le tu’uina atu o le ata o le galuega e tusia mai e le kamupani lea mai Hawaii, ua tele naua isi vaega ua mana’omia mai e le kamupani e tatau ona fa’atinoina, e pei o le faia o suega eseese i le tulaga malosi e tatau ona i ai le palapala, aemaise ai le nofoaga lenei ua fuafua e fausia ai le galuega, ae pei ona silafia e le atunu’u, o le nofoaga o lo o i ai la tatou fale fono tuai i le taimi nei, o se nofoaga e latalata i le sami, sa tau saili fo’i se isi nofoaga talafeagai e fausia ai le fale fono fou, peita’i i le mae’a ai o sailiiliga ma talanoaga e tele sa faia, na manatu ai, e leai lava se isi nofoaga talafeagai e tatau ona fausia ai le fale fono fou a le atunu’u, ua na o le nofoaga tuai lava lenei o lo o i ai le fale fono fou”, o le saunoaga lea a Savali.

 

“E ui i tulaga e pei ona tula’i mai aemaise ai o le tele o le lavelave, e tasi lava lo ma agaga ma le ali’i peresetene o lo o i ai, ia fausia le maota fono fou a le atunu’u mo ana galuega fa’apalemene i le lumana’i, ua mae’a fo’i ona tu’uina mai le fautuaga mai le ali’i kovana, na te lagolagoina ai le tatau lea ona fausia lenei galuega”.

 

O se tasi o tulaga sa fesiligia ai le afioga a Savali, o le fa’aiuga mai le Komiti e iloiloina pemita mo galuega tetele a le malo (PNRS), e pei ona taua ai lo latou teena o le talosaga mo se pemita o le fale, ona e le o saogalemu le nofoaga lea ua fa’amoemoe e fausia ai le fale fono fou, peita’i na taua e le Fofoga Fetalai le fa’ateia o ia e tusa ai o lea tulaga, ona e le i o o atu se ripoti aloaia mai le PNRS e tusa ai o le fa’aiuga e teena ai le pemita mo le galuega.

 

“E le i o o mai se ripoti a le PNRS e tusa ai o le teena o le talosaga mo le pemita o le galuega, ae afai o se tulaga lena ua tula’i mai, e lagona ai la le fa’anoanoa ona o lea e taumafai atu e fa’ataunu’u fuafuaga uma mo le fausiaina o le galuega, a o lea ua aumai fa’apena le ripoti a le Komiti, ae sa tatau fo’i ona latou fesoasoani ma fautua mai i ni isi auala e mafai ai ona fa’aauau le galuega, ona e pei ona fai atu, e leai lava se isi fanua e mafai ona fausia ai le maota fono fou a le atunu’u, pau lava lea o le fanua ma le nofoaga ua mafai ona maua”, o le saunoaga lea a Savali.

 

O le galuega mo le fausiaina o le fale fono fou ua fa’amoemoe e fa’atupe mai i se vaega tupe mai le aitalafu o le Pone a le malo, e pei ona fa’amaonia mai e le Fofoga Fetalai. Sa ia fa’afetaia le afioga i le ali’i kovana e tusa ai o le fa’amatu’uina mai o lenei alagatupe e amata fausia ai le galuega.