Ads by Google Ads by Google

Taofia i le toese Leoleo e to’afa mai le Juvenile Detention Center


Okesene Alo, Alofagia Letuli ma Junior Utuga. [ata AF]

Olafou Wilson [ata AF]
ausage@samoanews.com

O le aso Tofi o le vaiaso na te’a nei na pu’e fa’apagota ai e Leoleo ni Leoleo se to’afa sa galulue i le Falepuipui o Tamaiti i Tafuna (Jevenile Detention Center), fa’atasi ai ma se ali’i sa taofia i le falepuipui o tamaiti peita’i o lea ua atoa nei lona 18 tausaga, ma tutula’i ai loa i latou i luma o le Fa’amasinoga Fa’aitumalo i le aso Faraile na sosoo ai, ona o moliaga eseese ua faila fa’asaga ia te i latou.

 

O igoa o Leoleo ma le ali’i e to’atasi na fa’alauiloa i le kalena a le fa’amasinoga fa’aitumalo e aofia ai Junior Utuga, Alofagia Letuli, Okesene Alo ma Olafou Wilson, ma le ali’i talavou e to’atasi lea na poloaina le toe taofia o i latou i le toese i Tafuna ina ua mae’a la latou ulua’i iloiloga sa faia, se’i vagana ua totogi vaega tupe ua fa’atulaga e le fa’amasinoga ona fa’atoa mafai lea ona tatala i latou i tua mai le toese i Tafuna.

 

E lei manuia taumafaiga a le Samoa News i le tau sailiina lea o moliaga ua mae’a ona faila e le malo fa’asaga ia i latou nei ua taofia i le toese, e oo fo’i i le tau sailiina lea o fa’amaumauga a le fa’amasinoga e tusa ai o le mataupu e pei ona tu’uaia ai i latou, e lei manuia fo’i.

 

Na taua e tagata faigaluega a le Fa’amasinoga Fa’aitumalo i le Samoa News, le mae’a lea ona poloaina i latou e le afioga i le ali’i fa’amasino ia Fiti Sunia, ina ia aua ne’i fa’alauiloaina i le au fa’asalalau fa’amatalaga uma e uiga i lenei mataupu, ona o lo o aofia ai igoa o fanau e laiti i lalo o le tulafono.

 

Sa fesiligia fo’i le afioga i le Loia Sili ia Talauega Eleasalo Ale mo se avanoa e maua mai ai se kopi o lenei fa’amaumauga, ae na taua e Talauega e fa’apea, e le mafai e lona Ofisa ona tu’uina mai fa’amaumauga e pei ona talosagaina, ina ne’i a’afia ai i latou i le fa’amasinoga, ae o le a mafai lava ona fa’alauiloa nei fa’amatalaga i le taimi talafeagai e mafai ai.

 

E ui e le o mautinoa e le Samoa News moliaga o loo tu’uaia ai Leoleo e to’afa ma le ali’i talavou e to’atasi e pei ona taofia i le vaiaso na te’a nei, ae o loo atagia mai i se ripoti sa faila mai i le Ofisa tutotonu o le Falepuipui a Tamaiti i le tausaga na te’a nei le aofia ai fo’i o suafa o i latou nei.

 

O suafa o Leoleo e to’afa e pei ona tutula’i i luma o le fa’amasinoga fa’aitumalo i le aso Faraile na te’a nei, o suafa fo’i ia o loo i totonu o le ripoti sa sainia e le Ta’ita’i o le Falepuipui a Tamaiti i le fa’aiuga o le tausaga na te’a nei, ma tu’uina atu i le Komesina o Leoleo sa i ai, le afioga ia Save Liuato Tuitele.

 

I totonu o lea ripoti e 7 itulau sa mafai ona maua e le Samoa News mai sui sinia o le mlao, o loo taua ai gaioiga eseese o loo tu’uaia sa faia e Leoleo e to’afa ua taofia nei i le taimi e tiute ai i le Falepuipui o Tamaiti. O ni isi o ia tu’uaiga e aofia ai le fa’ataga o tagata mai tua e ulufale mai i totonu o le lotoa ma faia ai fefa’atauaiga i fualaau fa’asaina.

 

O loo taua i se vaega o le ripoti le fa’ataga e se tasi o Leoleo o pagota ali’i e momoe ma pagota tama’ita’i, atoa ai ma le fa’ataga o pagota talavou ali’i e o i tua i o latou aiga i le leva o le po ma toe fo’i mai i totonu, e aunoa ma le tusia o se ripoti.

 

O isi gaioiga o loo tauai i le ripoti e aofia ai le talepe o le potu o loo teu ai meaai a le nofoaga ae gaoi ma ave e fa’atau mai ai fualaau fa’asaina o le aisa, aemaise ai fo’i o le fa’ataga e ni isi o Leoleo o pagota tamaiti latou te ulaula fa’atasi i fualaau fa’asaina e aofia ai mariuana ma le pauta oona o le aisa i totonu o le lotoa, atoa ai ma le anoanoa’i lava o le mau tu’uaiga o loo taua i totonu o le ripoti o loo tu’uaia sa alia’e i totonu o le nofoaga.

 

O lenei lipoti a le tamaitai pule o le JDC, ia Mara Brown, sa avea ma nisi o tala tusia ma lomia i le lomiga a le Samoa News i le aso 23 ma le aso 24 o Fepuari o le tausaga lenei.

 

O le susuga ia Alo lea ua fa’atulaga e le fa’amasinoga le tupe e $200,000 e tatala ai o ia i tua, ma ua avea nei le tama’ita’i loia ia Sharron Rancourt ma ana loia fautua, ma ua fa’atulaga le itula e 1:00 i le aso Faraile o le vaiaso nei, e faia ai lana ulua’i iloiloga i luma o le fa’amasinoga.

 

O le susuga a Wilson lea ua fa’atulaga e le fa’amasinoga le tupe e $75,000 e totogi ona fa’atoa mafai lea ona tatala o ia i tua, e fa’atalitali ai taualumaga o lana mataupu. O le itula e 10:00 i le taeao o le aso Tofi o le vaiaso nei lea ua fa’atulaga e faia ai lana ulua’i iloiloga i luma o le fa’amasinoga.

 

O le susuga a Letuli lea ua fa’atulaga e le fa’amasinoga le tupe e $50,000 e totogi ona fa’atoa mafai lea ona tatala o ia i tua, e fa’atalitali ai taualumaga o lana mataupu, ma ua faamoemoe o le itula e 10:00 i le taeao o le aso Lulu o le vaiaso nei lea ua fa’atulaga e faia ai lana ulua’i iloiloga.

 

O le susuga a Utuga lea ua fa’aitiitia i le $1,000 le tupe e tatala ai o ia i tua, ma ua fa’atulaga o le aso 20 Aperila i le itula e 8:30 e toe valaau ai lana mataupu, ae o le ali’i talavou e $5,000 le vaega tupe lea ua fa’atulaga e totogi ona fa’atoa mafai lea ona tatala o ia i tua, ma ua fa’atulaga o le itula e 8:30 i le taeao nei e toe valaau ai lana mataupu.

 

E na o le susuga a Alo lea ua tula’i ai le loia tua ia Rancourt mo lana mataupu, ae o le isi to’afa o loia mai le Ofisa o Loia Fautua lea ua tofiga e tauaveina a latou mataupu i luma o le fa’amasinoga.

 

O le afioga i le ali’i Fa’amasino ia Fiti Sunia sa iloiloina mataupu a i latou e to’alima e pei onatu’uaia i lenei mataupu, ae o le ali’i loia ia Woodrow Pengelly lea o lo o tula’i mo le itu a le malo i lenei mataupu.