O le aso Lua o le vaiaso nei na tu’uina aloaia mai ai e le Fa’atonusili o le Matagaluega o Fa’atoaga a le atunu’u, susuga Filifa’atali M. Fuiava se fa’asilasilaga fa’alaua’itele e fa’alauiloa aloaia mai ai le taofia o le toe auina mai o le taro mai Samoa mo se taimi le tumau.

O ni vairusi (virus) se 2 ua masalomia le a’afia ai o le taro i Samoa, o le mafua’aga lena ua faia ai le fa’aiuga ina ia taofia le tumau le taro i le taimi nei, ae se’i fa’atali suesuega a le Ofisa o Fa’atoaga a Samoa o lo o faia i le taimi nei, e siaki ai pe fa’amaonia virusi o lo o masalomia le a’afia ai o le taro i totonu o le atunu’u i le taimi nei.

I se fa’atalatalanoaga ma le afioga i le ali’i Fa’atonusili ia Filifa’atali i le aso ananafi, sa ia fa’amaonia mai ai le fa’aiuga e pei ona fesiligia.

“O lea ua ou faia le fa’aiuga e taofia ai le toe aumaia o le taro mai Samoa mo le taimi nei, se’i fa’atali ai fa’aiuga o su’esu’ega a Samoa o lo o faia i le taimi nei”, o le saunoaga lea a Filifa’atali i le Samoa News.

“O le ripoti e pei ona tu’uina mai ia te a’u mai Samoa, o lea ua auina atu e le Ofisa o Fa’atoaga a latou suesuega e fa’amaonia mai i Siamani, po o le a le ituaiga vairusi lea ua a’afia ai la latou taro, ma e le mafai ona nofonofo le Ofisa o Faatoaga a le tatou atunu’u e fa’atalitali ai le fa’aiuga o le suega, ina ne’i maua mai le fa’aiuga o le suega e fa’amaonia le vairusi ua i Samoa, ona tula’i mai ai lea o se tulaga pagatia i a tatou fa’atoaga i le atunu’u”, o le saunoaga lea a Filifa’atali.

E le gata ua taofia le toe aumaia o le taro mai Samoa ma le fa’amoemoe e fa’atau i faleoloa eseese i le atunu’u, ae ua o o lava fo’i i aiga o lo o fia auina mai a latou taro mo fa’alavelave ua le toe taliaina fo’i, ona o le popolega ina ne’i a’afia ai fa’atoaga i le atunu’u i le vairusi e pei ona maua i Samoa.

“E le gata ua taofia le toe aumaia o le taro lea e aumai e fa’atau i faleoloa, ae ua taofia fo’i ma soo se taro mai Samoa e aofia ai ma taro o loo aumai e aiga mo fa’alavelave, ona o le taro o lo o aumai i Samoa, e aumai fa’atasi ma le tiapula, o le isi lena popolega o lo o i ai ina nei avea le tiapula lea ma auala e sao mai ai le vairusi i lo tatou atunu’u”, o le saunoaga lea a Filifa’atali.

O le fa’aiuga e pei ona faia e le Ofisa o Fa’atoaga ua matua talisapaia ma lagolagoina e ni isi o le aufai fa’atoaga i Amerika Samoa.

Na taua e se tasi o Tama fai fa’atoaga e fa’apea, ua leva na tatau ona taofi le taro o lo o aumai i Samoa lea e fa’atau solo i faleoloa i le atunu’u, ina ia maua ai se avanoa o a latou fa’atoaga e fa’atau atu ai i faleoloa ma maua ai tupe e tausi ai aiga.

“E aoga fo’i le fa’aiuga lea ua faia e taofia ai le toe aumaia o le taro mai Samoa, e vaai ai pe gafatia e le aufai fa’atoaga a le atunu’u ona sapalai le taro i soo se faleoloa, ona o le isi lena popolega o lo o i ai, fai mai e le mafai e le aufai fa’atoaga a Amerika Samoa ona sapalai le taro mo faleoloa ma le atunu’u lautele, ae afai e mafai ona fa’atinoina i le taimi lenei, lona uiga ua tatau loa ona silasila le Ofisa o Fa’atoaga a le atunu’u i se auala e fa’amautu aloaia ai loa le taofia o le toe aumaia o le taro mai Samoa”, o le saunoaga lea a se tasi o ali’i faifa’atoaga i le atunu’u.