Talosagaina Tuiasina se tafaoga Senate i Samoa fa’aaoga ai tupe totoe Fono

 Le afioga i le ali’i senatoa ia Tuiasina S. Esera  [ata AF]
ausage@samoanews.com

Na talosagaina e le afioga i le ali’i Senatoa mai le itumalo o Tualatai ia Tuiasina S. Esera, le sui peresetene tumau o le maota maualuga ia Laolagi Fonoti Savali Vaeao i le aso Faraile o le vaiaso na te’a nei, mo se avanoa e alu ai se tafaoga a le maota maualuga i Upolu, e avea lea o se auala e fa’amavae ai sui o le maota, ina ne’i te’i ua le toe filifilia ni isi o Tama o le atunu’u e o latou itumalo e nofoia o latou nofoa i le fono faitulafono, ae fa’aaoga i ai tupe a le fono o lo o totoe e fa’atupe ai lea malaga.

 

O uiga fa’aalia o ni isi o le maota maualuga i le taimi o le saunoaga a le afioga i le ali’i senatoa, na manino ai le fa’ateia o ni isi o i latou i le saunoaga a Tuiasina.

 

Ina ua maua le avanoa o Tuiasina e saunoa ai i luma o le maota i le taimi o folafolaga, sa ia fa’afetaia ai le maota o Tama o le atunu’u e tusa ai o le galuega sa fita i tuga i ai i le silia i le 2 vaiaso, e ala i le talanoaina o le tupe fa’asoasoa a le malo mo le tausaga tupe fou 2017.

 

Sa ia fa’amalulu i le maota e tusa ai ma lona le auai i ni isi o taimi sa faia ai iloiloga a le komiti soofaatasi o le paketi, ona o ni isi o tuatuagia le ma’alofia peita’i sa ia tapuaia pea faiva o le maota ma lona talitonuga, o le fa’aiuga latou te faia e manuia uma ai le atunu’u atoa.

 

“O lo o tapua’i mai le atunu’u i tua i maota ma laoa ma tu’i mai le mulipapaga pe tua ma ni a la outou galuega, ae fa’afetai i le Atua o lea ua a’e malo galuega sa fita i tuga i ai outou Tama o le atunu’u, e ala i le galuega o le tupe fa’asoasoa lea ua mae’a ona outou iloiloina”, o le saunoaga lea a Tuiasina.

 

I le mae’a ai o lana fa’afetai e tusa ai o le galuega o le tupe fa’asoasoa ua mae’a, sa ia fa’ailoa ai loa lona fanoga o lo o i ai, ina ia fa’aaoga tupe a le fono o lo o totoe e fa’atupe ai se tafaoga i Upolu mo sui uma o le maota.

 

“I lo’u talitonuga, e tatau ona fai se ‘ai o la tatou galuega, ua totoe nei o ni nai masina ona i’u lea o le nofoaiga lenei, ae talofa e i le paia o le maota, aua o ni isi o i tatou nei o le a le toe fo’i mai, o isi fo’i o le a toe pale mai ma toe filifilia e o latou itumalo, ae o afea ea e fai ai sina tatou fa’amavaega, tatou o i Upolu tatou tafafao ai, atonu o lena o lo o i ai tupe e le i fa’aaogaina e le fono, aumai e fa’atupe ai le malaga a Tama o le atunu’u”, o le saunoaga lea a Tuiasina.

 

Na toe fa’amanino atili e Tuiasina i lana saunoaga e fa’apea, o le agaga o lona finagalo mo se tafaoga, e le gata o se auala e fa’amavae ai sui o le maota mo lenei nofoaiga, ina ne’i to’atele e le toe fo’i mai i le nofoa, ae o se auala fo’i e “fai ai se ‘ai ma se aoga o galuega e tele o lo o fita i tuga i ai tama o le atunu’u”.

 

“Tatou o i Apia tatou tafafao ai mo sina vaiaso, ona tatou o mai ai loa lea tatou lulu lima, o ai o le a toe sau, welcome back, o ai e le toe sau, good bye”, o le saunoaga lea a Tuiasina.

 

Na fa’afetaia e le afioga i le ali’i senatoa ia Laolagi Fonoti Savali Vaeao sa avea ma ta’ita’i le tumau o le maota i le vaiaso atoa na te’a nei, le saunoaga manino a le afioga i le ali’i senatoa ia Laolagi.

 

Ae tusa ai o le talosaga a Tuiasina, na saunoa Laolagi e fa’apea, o le a fa’ao’o i le afioga i le ali’i peresetene o le Senate ia Gaoteote Palaie Tofau le fanoga o le ali’i senatoa, pe a toe taliu mai i fanua le faigamalaga a le ali’i peresetene i le vaiaso nei.

 

“Ou te iloa o lo o usuia le Fono a le Palemene a Samoa, e tele fo’i auala e mafai ona tatou fefa’asoaa’i ai, ina ia mautinoa tatou te ui pea lava i luga o le laina, ina ne’i ave sese fo’i le autu o le fa’amoemoe ma le malaga e pei ona talosagaina e lau afioga, ae o le fautuaga lena, ina ia tatou malaga ma maua ai se avanoa e fa’asoa ai ma le Palemene o Samoa, ma maua ai loa ma le avanoa e fa’atino ai le mataupu e pei ona finagalo i ai lau afioga i le ali’i senatoa”, o le saunoaga lea a Laolagi, e ui na te le i fa’ailoaina po o a mataupu o le a talanoaina ma le Palemene a Samoa.

 

Na fefiloi finagalo o ni isi o afioga i senatoa e fa’atatau i le fanoga o le afioga i le Sa’o ia Tuiasina.

 

Na taua e se tasi o senatoa lona ofo i le finagalo o le ali’i senatoa ia Tuiasina o lo o i ai, i le naunau lea e fa’aaoga tupe a le fono mo se tafaoga i Samoa, a o lea o lo o tau saili ni tupe e fa’atino ai le tele o galuega a le Fono.

 

“E le o i ai ni tupe totoe a le fono o i ai, o lea e fa’aitiitia le paketi a le fono mo le 10%, tau saili mai tupe e fa’auma ai le galuega o le Fale Samoa o lo o fa’agasolo i le taimi nei, e le o i ai la ni tupe totoe o i ai e fa’atupe ai ni tafaoga i Samoa”, o le saunoaga lea a se tasi o ali’i senatoa.

 

Sa ia saunoa atili e fa’apea, na te le lagolagoina le finagalo o Tuiasina mo se tafaoga e totogi ai galuega sa fita i tuga i ai le maota o tama o le atunu’u i nofoaiga e lua ua mavae atu.

 

“Matou te le i o mai iinei ma le fa’amoemoe a mae’a ona matou fa’atinoina se galuega, ona fa’atupe lea e le fono o se tafaoga e alu i Samoa e totogi ai galuega sa matou fa’atinoina, o le matou tiute, o le saili o fa’aiuga e manuia ai le atunu’u, afai e le lava totogi, ia totogi mai e le Atua i le lagi le afu sisina o Tama o le atunu’u, ae o a ni tupe o lo o totoe a le fono mo lenei tausaga tupe, ua fa’aaoga mo galuega fa’atino i le isi paeaiga o lo o mulimuli mai”, o le saunoaga lea a lea ali’i senatoa.

Comment Here