Ads by Google Ads by Google

Talosagaina Lolo se faigalotu tu’u fa’atasi a le atunu’u atoa


Ni nisi o sui o le Komiti sa lagolagoina le fa’amoemoe a Lolo ma Lemanu, i le taimi o le sauniga lotu sa faia i le maota o Fano i Fagaalu i le po o le aso Lua na te’a nei, e fa’afetaia ai le Atua ina ua toe filifilia Lolo ma Lemanu e avea ma ta’ita’i o le malo mo le isi 4 tausaga o lo o lumana’i nei. [ata AF]
ausage@samoanews.com

Ua talosagaina e le afioga i le ali’i kovana ia Lolo Matalasi Moliga se faigalotu tu’u fa’atasi a le atunu’u atoa mo le fa’aiuga o le vaiaso nei, e fa’afetaia ai le Atua ina ua i’u ma le manuia le sailiga tofi sa alo atu i ai Amerika Samoa i le aso 8 Novema ua mavae atu.

 

I lana saunoaga i le po o le aso Lua na te’a nei, ina ua mae’a ona fa’ailoa e le atunu’u la latou filifiliga e ala i le toe filifilia o le faigamalo a Lolo ma Lemanu e avea ma ta’ita’i o le malo mo le isi 4 tausaga o lo o lumana’i nei, na fa’aleo ai loa e le afioga i le ali’i kovana lona fa’anaunauga o lo o i ai, ina ia faia se faigalotu tu’u fa’atasi a le atunu’u atoa.

 

“O lenei faigalotu tu’u fa’atasi, o le a aofia uma ai lava tagatanu’u uma o Amerika Samoa, i latou sa lagolagoina le ma fa’amoemoe ma Lemanu, fa’apea ai i latou sa lagolagoina le fa’amoemoe a Faoa ma Sanitoa, faapea ai Tuika ma Maeva, o le taimi lea tatou te o mai fa’atasi ai e momoli le fa’afetai i le Atua ina ua i’u ma le manuia le fa’amoemoe sa alo atu i ai le atunu’u”, o le saunoaga lea a Lolo.

 

O le fonotaga mulimuli a le Komiti sa lagolagoina le fa’amoemoe a Lolo ma Lemanu mo le palota o lenei tausaga, lea ua fa’amoemoe e usuia i le itula e 4:30 i le afiafi nei i le maota o Fano i Fagaalu, o le a fa’amautu aloaia ai loa le nofoaga e faia ai le sauniga lotu, atoa ai ma le taimi e fa’ataunu’uina ai.

 

Na taua e le tofa Malemo Tausaga i le Samoa News, o le isi lea Ta’ita’i o le Komiti sa lagolagoina le fa’amoemoe a Lolo ma Lemanu e fa’apea, o le fa’amoemoe atoa o le faigamalo, ia maua se avanoa o le atunu’u atoa e o mai fa’atasi ai e fa’afetaia le Atua ina ua i’u ma le manuia le fa’amoemoe.

 

“O le agaga lava lea o le afioga i le ali’i kovana ia Lolo fa’apea le afioga i le lutena kovana ia Lemanu Peleti Sialega Mauga, o palota e fai fai uma, ae o le mafutaga i le atunu’u, aiga, nu’u ma itumalo, e fa’aauau pea e o o i le fa’avavau, o le taua la lena o le faigalotu tu’u fa’atasi lea ua fa’amoemoe e fa’ataunu’uina i le fa’aiuga o le vaiaso nei, ina ia mafai ai ona o mai fa’atasi Tutuila ma Manu’a e fa’afetaia le agalelei o le Atua”, o le saunoaga lea a Malemo.

 

E ui e le i mautu se nofoaga e fa’ataunu’uina ai le sauniga lotu, ae na taua e Malemo le i ai o le avanoa e ono fa’aaoga ai le malumalu o le Ekalesia EFKAS i Fagaalu e fa’atinoina ai le sauniga lotu tu’u fa’atasi a le atunu’u.

 

O le mae’a ai o le sailiga tofi a le atunu’u i lenei tausaga, na fa’ailoa ai e le silia i le to’a 7,000 o tagata palota le tatau lea ona toe tula’i mai le faigamalo a Lolo ma Lemanu e ta’ita’i le malo.

 

Na taua e le afioga i le Maoputasi ia Mauga Tasi Asuega i le Samoa News e fa’apea, o faigamea a Samoa, e amata i le Atua toe fa’ai’u i le Atua, o le agaga atoa fo’i lena o le faigamalo, ia toe fa’afo’i le viiga i le Atua.

 

“O Samoa e laei i lana aganu’u ae i’oimata i le Talalelei ma le Fa’akerisiano, o lea ua mae’a le fa’amoemoe e ala i le sailiga tofi, ua tatau la ona toe momoli le fa’afetai i le Atua, o se avanoa lelei fo’i lea e o mai fa’atasi ai ta’ita’i o le atunu’u, tatou lulu aao ma fa’afetai i le Atua, ua i’u ma le manuia lenei fa’amoemoe e leai ma se soifua na ma’imau poo se fa’alavelave na tula’i mai”, o le saunoaga lea a le afioga Mauga, o ia fo’i lea o le Failautusi o le Ofisa o Mataupu Tau Samoa.