Faatusa atunu’u mana’otele o Senatoa i le “eleele e le malie i vai”

Ua fa’atusa e le to’atele o le atunu’u le mana’o tele o afioga i Senatoa, ina ia fa’aopoopo se ta’i $500 i o latou totogi o lo o maua i le tausaga atoa, e fesoasoani e totogi ai ni nofoaga e fa’aaoga e fai ma o latou Ofisa le tumau e fa’atino ai a latou galuega, ona o lea ua tatala i lalo a latou Ofisa sa fa’amautu i ai le fa’atinoina o a latou galuega, o se “eleele e le malie i vai”.

O le vaiaso na te’a nei na fa’aulu ai i luma o le Senate se i’ugafono o lo o sainia e le afioga i le ali’i Senatoa ia Tuaolo M. Fruean ma isi Senatoa e to’a 3, e talosagaina ai le Kovana e faaopoopo le ta’i $500 i totogi o Senatoa ma faipule, e totogi ai nofoaga o le a fa’aaoga e avea ma a latou Ofisa le tumau.

O isi Senatoa o lo o lagolagoina le iugafono e aofia ai Nuanuaolefeagaiga S. Nua, Faamausili Mau Jr ma Magalei Logovi’i. O suiga ua faia i le iugafono e aofia ai le fautuaga ina ia suia e avea ma iugafono malilie fa’atasi, ina ia aofia ai ma afioga i Faipule o le maota o sui.

O lo o taua i le i’ugafono e fa’apea, o ofisa uma o Senatoa ma Faipule, na tatala fa’atasi uma i lalo ma le maota fono tuai a le atunu’u i le tausaga na te’a nei, ina ua maitauina tulaga fa’aletonu, ma ua talosagaina ai le fa’aaoga o Maota ma Laoa o afioga i Senatoa ma Faipule e avea ma o latou Ofisa le tumau.

O le to’atele o afioga i Senatoa ma Faipule o lo o afifio ma soifua pea i le soifuaga fa’a-Samoa moni, e nonofo ma mau fa’atasi lava ma le to’atele o latou aiga potopoto. Talu ai lea ituaiga soifuaga fa’a-Samoa moni, e matua faigata ai lava ona maua se avanoa e vavae ese ai se potu e fai ma ofisa i o latou Maota ma Laoa e fa’atino ai tiute fa’a Senatoa ma Faipule.

O tulaga lava fa’a-le-aganu’u i aiga Samoa e pei ona silafia, e le talafeagai mo le fa’atinoina o galuega a afioga i Faipule, ae tusa ai ma le Tulafono 2.0104, e le taitai ona gafatia ai le totogiina o se nofoaga e fa’aaoga mo galuega a afioga i Senatoa ma Faipule, atoa ai ma le tau e fa’agaioiina ai tiute ma galuega uma e fesootai ma o latou tofiga.

Ona o mafua’aga e pei ona taua, ua talosagaina ai e afioga i Senatoa le kovana tauala atu i le iugafono, ina ia faaopoopo se ta’i $500 i le masina e totogi ai nofoaga o le a avea ma o latou Ofisa le tumau.

O afioga i Senatoa na molimau i le iloiloga e talanoaina ai lenei mataupu e aofia ai Tuaolo, Nuanuaolefeaiga ma Fa’amausili. E le i molimau le afioga a Magalei ona o ia sa ta’ita’ia le iloiloga.

Na taua e Tuaolo le leai o se avanoa paganoa e maua e le Senatoa ma tagata o lona itumalo, pe afai e fa’aaoga e le Senatoa lona Maota poo le Laoa e avea ma Ofisa e fa’atino ai galuega tau i le Fono Faitulafono. Sa ia taua fo’i le mafai lea ona fa’aaoga le Polokalame Faapitoa a le Kovana e auala mai ai lea vaega tupe, e totogi ai nofoaga mo Ofisa le tumau e fa’atalitali ai le taimi e tatala aloaia ai le maota fono fou a le atunu’u.

Na taua e Nuanuaolefeagaiga e fa’apea, o le to’atele o Senatoa e afifio mai i le taeao, ona nofonofo ai lava lea i totonu o a latou ta’avale, e fa’atalitali le taimi e amata ai galuega a le maota. Sa ia taua le tele o nofoaga eseese o lo o avanoa i le taulaga, e mafai ona fa’aaoga e Senatoa e fai ma Ofisa le tumau, e le tagata feiloa’i ai ma tagata, ae sili ai fo’i pe afai e i ai ni malo mai fafo e fia feiloa’i mai i ni isi o afioga i Senatoa.

Sa ia taua mo se fa’ata’ita’iga se sui mai le US Army Corps sa malaga mai i le atunu’u i se taimi e le i mamao atu, ma mana’o ai e fia feiloa’i atu ia te ia, peita’i e le i mafai ona maua o ia, ona e le gata ua leai sona ofisa ae ua leai fo’i sana telefoni.

I le tau fa’aiuga o le iloiloga, na fa’atula’i ai loa e le afioga a Fa’amausili le mau ina ia si’i mai le tupe fa’aopoopo mo Senatoa ma Faipule mai le $500 i le $800, e le gata e totogi ai le eletise mo le fa’aaogaina o le fale, ae tapena ai fo’i se taumafataga mo sui o le itumalo e malaga asiasi atu i le Senatoa poo le Faipule.

Na taua e le to’atele o le atunu’u totogi lafoga o latou lagona le fiafia ma le fa’asea, ona o le mataupu e pei ona naunau afioga i Senatoa e fa’apasia. Na taua e se tasi o Tina Faiaoga e fa’apea, o lo o pagatia le to’atele o le atunu’u i le taugata o le soifuaga, taugata pili o le Eletise ma le Falema’i, pologa tagata faigaluega e tau fa’aatoa le ta’i 8 itula i le aso, ae o Senatoa ma Faipule, e le atoa se 4 itula e galulue ai i le aso, e na o le 90 fo’i aso faigaluega ua Faatulafono mo le tausaga, fa’atasi ai ma alauni e $40,000 mo le Peresetene ma le Fofoga Fetalai ae $30,000 ma Senatoa ma Faipule, a o lenei fo’i ua toe tagisa mai ina ia fa’aopoopo le isi ta’i $500 i le masina mo latou.

Na taua e ni isi o le atunu’u i le Samoa News, atoa ai ma tusitusiga i luga o auala o fesootaiga fa’aonaponei, ua leai lava se eseesega o le mana’otele o afioga i Senatoa, ma le upu e fai i le eleele, “Ua o se eleele lava e le malie i vai”.