Ua talosagaina e le afioga i le ali’i Senatoa mai le itumalo o Manu’a #1 ia Nuanuaolefeagaiga S. Nua le Vaega Iloilo o le Fa’amasinoga Maualuga a Amerika Samoa, tauala atu i lana loia fautua o Gwen Tauiliili-Langkilde, mo se poloaiga a le fa’amasinoga e fa’aleaoga ai le talosaga sa fa’aulu e matai e to’atolu mai Ta’u i Manu’a, ina ia toe iloilo e le fa’amasinoga lana poloaiga sa tu’uina mai e fa’aleaoga ai le latou tagi sa fa’aulu fa’asaga i lona nofoia o le isi nofoa o le Itumalo i totonu o le maota maualuga i le Fono Faitulafono.

O matai e to’atolu mai le itumalo o Ta’u i Manu’a sa fa’auluina le tagi fa’asaga ia Nuanuaolefeagaiga e aofia ai le afioga a Lefiti Atiulagi Pese, Maui Aloali’i ma Tuaese Va’aomala K. Sunia.

O le mae’a ai ona tu’uina mai o le fa’aiuga a le Vaega Iloilo o le Fa’amasinoga Maualuga e teena ai le tagi sa fa’aulu e matai e to’atolu e pei ona taua fa’asaga i le auala na filifilia ai Nuanuaolefeagaiga na te nofoia le isi nofoa o le Itumalo i totonu o le Senate, sa latou toe failaina ai loa se talosaga i le fa’amasinoga, ina ia toe iloilo lana fa’aiuga ua mae’a ona tu’uina mai.

Ae na taua e le itu a le afioga i le ali’i senatoa ia Nuanuaolefeagaiga i lana talosaga ina ia fa’aleaoga le talosaga a le itu tagi e fa’apea, e leai ni mau fa’amaonia fou ua tuuina mai e le itu tagi e lagolagoina ai la latou talosaga mo se fa’amasinoga fou, e le o i ai fo’i se fa’aletonu i le fa’aiuga a le fa’amasinoga sa tu’uina mai e uiga i lenei mataupu, pau mau o lo o finauina e le itu tagi, o mau tuai ua mae’a ona latou folasia e uiga i lenei mataupu.

Na taua e le itu tete’e e fa’apea, e le gata o loo manino ma sa’o le fa’aiuga a le fa’amasinoga ua mae’a ona tu’uina mai e fa’atatau i lenei mataupu, ae o lo o sa’o fo’i le fa’aiuga a le fa’amasinoga e fa’atatau i le le mafai lea e le itu tagi ona fa’amaonia i le latou talosaga, o i latou o lo o fai ma sui o le itumalo o Ta’u e uiga i lenei mataupu.

Na taua i le talosaga a le itu tete’e e fa’apea, o loo manino i le fa’aiuga a le fa’amasinoga, o le isi nofoa mo le itumalo o Manu’a #1 o lo o nofoia e Nuanuaolefeagaiga, o se tasi lea o nofoa e 2 i ai nofoa mo itumalo e 3 e aofia ai Faleasao, Fitiuta ma le Faletolu o Ta’u, ae le fa’apea o le isi nofoa o le Itumalo o loo fa’apitoa lea e filifili mai i le Faletolu o Ta’u.

Na finau atili le itu tete’e e fa’apea, talu ai o matai e to’atolu o loo tagi i lenei mataupu o ni matai mai le Faletolu o Ta’u, e leai so latou leo e finauina ai fua mataupu e fa’asaga ia Faleasao ma Fitiuta, ma talu ai ona o lea tulaga, e le o mafai la ona fai i latou ma sui o Fitiuta ma Faleasao. Na taua atili e le itu tete’e e fa’apea, talu ai e le o aofia ai Fitiuta ma Faleasao i lenei mataupu, e leai la se mataupu e tau talanoaina ai fua le tulaga e fa’atatau i le nofoa o le itumalo.

Na fa’amanino atili fo’i e le itu tete’e i lana fa’afinauga e fa’apea, o loo manino le aloaia o le fa’aiuga sa faia i le fonotaga o Tesema o le tausaga na te’a nei, ma o loo manino fo’i le mulimulita’i o lea fonotaga i auala e pei ona fautuaina e le Faavae ma le Tulafono Toe Teuteu a Amerika Samoa.

Ona o tulaga uma e pei ona taua e le itu tete’e i lana tali i le talosaga a le itu tagi, ua ia talosagaina ai loa le fa’amasinoga ina ia solofua le tagi ua faila e le itu tagi fa’asaga i lenei mataupu.