Talosaga faigamalo suia fa’atulagaina lafoga o le pia mai fafo
Ua tuuina atu e le afioga i le Kovana Sili, Lolo Matalasi Moliga, se tulafono tau fa’aofi i le Fono Faitulafono, e suia ai le fua o le lafoga o oloa mo le pia ma oloa e maua ai le molo (malt).
I le vaiaso ua te’a sa fa’aulufaleina lea pili i luma o le Maota Maualuga ma le Maota o Sui ma tuuina atu i komiti e faia i ai a latou iloiloga. I le Maota Maualuga, o le taeao nei ua fuafua e faia ai se iloiloga i lenei tulafono tau fa’aofi.
Taua e le faigamalo a Lolo ma Lemanu e faapea, o le lafoga oloa o lo o i ai nei mo le pia ma le molo, lea e fa’avae i luga o le tau e lipotia mai o le o o mai fafo, e faigofie lava ona faatogafiti lona faiga ina ia fa’ala’ititi ai le lafoga e totogi atu i le Malo o Amerika Samoa.
“O lenei faiga ua le mafai ai ona maua e le Malo tupe maua o lo’ matua mana’omia e fa’agaoioia ai ma tuuina mai auaunaga mo le lautele e pei o galuega tau falemai ma leoleo,” o se vaega lea o le fa’atomuaga o le tulafono a le faigamalo.
Ina ia taofia fa’aletonu nei, o lea ua talosaga ai le malo e a suia ai le laoga oloa mo le pia ma meainu fai mai le molo ma aiaia se fua tutusa e fa’avae i luga o le aofai ma le tele o oloa ia mai fafo, nai lo le faalafoga e faavae i luga o le tau e tuuina mai.
O le tulafono o lo’o i ai nei, o le lafoga o le pia ma le molo e 190%. O le 110% o le lafoga o le pia poo le molo o le a teuina i le teugatupe tele a le Malo, ae o le 80% e teu i le teugatupe fa’ailoga ese mo le Puleaga o le Atinae o le Tamaoaiga a Amerika Samoa e toe totogi ai Pone o le 2015.
Ae o le suia ua talosagaina e le faigamalo, ia na o le 35 sene i le ta’i 12 aunese, poo se vaega foi, o le pia ma le molo. O lona uia e 35 sene i le apa pia.
Mai le lafoga aoina i lea suiga fou, o le 20 sene e teuina i le teugatupe tele a le malo ae 15 sene mo le toe totogina o le Pone o le 2015.
O le tausaga ua te’a sa tuuina atu ai foi lea mataupu i le Fono Faitulafono e pasia, ae peitai o le suiga o le lafoga mo le pia, sa tuu faatasi i totonu o se isi tulafono taufa’aofi e aofia ai nisi o lafoga fuafuaina e le malo. Sa pasia e le Fono Faitulafono lea tulafono taufa’aofi ae peitai na teena e le kovana ona o nisi o suiga sa faia e le Fono.
I le taimi o iloiloga a komiti a le Maota Maualuga i lea mataupu i le suiga o le fa’alafogaina o le pia, sa molimau sui o le kamupani a le G.H.C. Reid & Co., i lo latou lagolagoina o lenei suiga, ona sa molimau i latou e fea ma sa’o le suiga e pei ona fuafuaina.
Ae peitai sa le’i lagolagoina lenei suiga o le kamupani a le South Pacific Distributors.