A o le i tu’uina atu le fa’aiuga a le Fa’amasinoga fa’asaga i le ali’i o Edward Jr Eary i le vaiaso na te’a nei, na fa’ailoa i ai e le afioga i le ali’i Fa’amasino ia Elvis P. Patea manaoga mai aiga e to’atolu na a’afia i lana solitulafono o loo taua i totonu o le ripoti a le Ofisa Faanofovaavaaia, ina ia fa’asala o ia i le fa’asalaga pito sili ona mamafa o lo o fa’atulaga mai i le tulafono.

Ae ui i talosaga mai aiga mo se fa’asalaga mamafa fa’asaga i le ali’i ua molia, na manatu le fa’amasinoga e talafeagai se fa’asalaga fa’anofovaavaaia mo ia, ina ia mafai ai ona maua le avanoa e toe vave fo’i ai i tua e fuata’i se isi taeao fou mo lona olaga, ma saili sana galuega e totogi ai salatupe ua tu’uina atu e le fa’amasinoga.

E fa nofoaga eseese na osofaia e Eary e pei ona tu’uaia ai o ia e le malo, ma o ia nofoaga eseese e aofia ai fale o aiga e to’atolu ma le faleoloa e tasi, lea na ia gaoia mai ai oloa e pei o T.V ma sipika ma fa’atau atu i isi tagata.

A o le i tu’uina atu lana fa’asalaga mai le fa’amasinoga, na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia e toe fo’i atu ai i tua e mafuta i ona matua, ma saili sana galuega e tausi ai lona to’alua ma lana fanau.

Na talosagaina e le ali’i loia ia Michael White na tula’i mo Eary se fa’asalaga fa’anofovaavaaia mo le ua molia, ina ia mafai ai ona maua le avanoa e toe fo’i ai o ia i lona aiga. Na taua e White i le fa’amasinoga le salamo moni o Eary mai lana solitulafono sa faia, o le ulua’i taimi fo’i lea ua ta’usala ai o ia i se solitulafono.

Na taua atili fo’i e White masalosaloga o lo o i ai i le mafua’aga na faia ai e le ua molia lenei solitulafono, ona o le a’afia ai o ia i le fa’afitauli o fualaau fa’asaina, ma ua mana’omia ai se polokalame e togafiti ai lea fa’afitauli.

E lei tete’e le loia a le malo ia Christy Dunn i le talosaga mo se faasalaga faanofovaavaaia, ae sa ia lagolagoina le tatau fo’i ona poloaina le ua molia na te toe totogi tupe mo mea totino a aiga na ia ave fa’agaoi, atoa ai ma le tuutuuga e fa’asa ai ona ia toe fesootai atu i ali’i e to’alua o loo taua o la igoa i le ripoti a Leoleo, o le ali’i lea o Patu poo Leota fa’apea ai ma Mu Kelemete..

Na taua atili fo’i e le tamaitai loia ia Dunn e fa’apea, e oo lava foi i le Tina ma le to’alua o le ali’i ua molia, sa la talosaga i le Ofisa Faanofovaavaaia ina ia aua ne’i vave tatalaina o ia i tua mai le toese, a ia taofia o ia mo sina taimi ina ia mafai ai ona ia aoaoina se lesona taua mo lona olaga e fa’atatau i le leaga o le mea sa ia faia.

Sa fia iloa e le fa’amasinoga pe na toe fa’afoi oloa sa gaoia e le ua molia, ae na fa’aalia e le loia a le malo e fa’apea, e leai ma se meatotino na gaoia na toe fa’afo’i. O T.V e lua na gaoia e le ua molia, sa ia fa’aleagaina le isi T.V ina ua siaki atu e le ola, ae na fa’atau ese atu le isi T.V i se tasi o tagata. E faapena fo’i i sipika sa ia gaoia, sa ia fa’atauina atu i se tasi tagata.

Na faailoa e Patea ia Eary e faapea, e foliga mai o le aafiaga o lona mafaufau lea na mafua ai ona ia faia nei mau solitulafono, lea ua i’u ina a’afia atu ai isi aiga ma se pisinisi.

“O lea ua iloilo e le fa’amasinoga faamatalaga uma e uiga i lenei mataupu, e foliga mai o oe sa e tau mulimuli i tagata na fa’atinoina lenei mataupu, a o le ua e aafia atu ai ma oe, pau le itu e fia faamamafa e le fa’amasinoga, o le fa’afitauli i fualaau faasaina lea ua taua e lau loia o lo o e a’afia ai, ma ua manatu fo’i le fa’amasinoga e saili se togafiti mo lea fa’afitauli”, o le saunoaga lea a Patea.

O Eary na ta’usala i moliaga mamafa e fa, o le moliaga o le talepe fale i le tulaga muamua, talepe fale i le tulaga lua, ma moliaga e 2 o le gaoi.

E 7 tausaga i le falepuipui na manatu le fa’amasinoga e fa’asala ai Eary, ae ona o itu lelei e pei ona fa’aalia e loia mo ia, ua fa’amalumalu ai lona tuliina o lea fa’asalaga, ae o le a faanofovaavaaia o ia mo le 7 tausaga i lalo o poloaiga e ao ona ia usita’i i ai.

O ni isi o ia poloaiga e aofia ai lona tuliina o masina e 28 i le falepuipui i Tafuna, fa’asa ona ia toe pipi’i pe tau mulimuli i ali’i e to’alua o lo o taua i ripoti a Leoleo, faasa ona ia toe soli se tulafono, faasa ona ia tagofia le ava malosi poo fualaau fa’asaina, fa’asa fo’i ona toe alu i nofoaga o lo o fa’atau ai le ava malosi.

Ua poloaina fo’i lona totogiina o le tupe e $1,390 i aiga e to’atolu ma le pisinisi e tasi na aafia i lana solitulafono, ma ia saili sana galuega e galue tumau ai i totonu o le 60 aso talu mai le aso e tatala mai ai o ia i tua.