Taliu mai i fanua aufusu ma pine 3 mo Amerika Samoa

ausage@samoanews.com

O le faaiuga o le vaiaso na te’a nei na toe taliu mai ai i le atunu’u le aufusu e to’afa sa tausinio i le taamilosaga a le Tafatolu sa faia i Samoa i le vaiaso na te’a nei, ina ua manumalo i latou i pine e 3 mo Amerika Samoa.

 

O pine e 3 na maua e le aufusu a le atunu’u e aofia ai le pine siliva e tasi ma pine apa memea e 2.

 

O le ali’i o Alofa Mataafa na manumalo i le pine siliva mo Amerika Samoa, ina ua faiaina i le ali’i o Henry Tyrell o Samoa i se ta’aloga mataina ma le finau e sailia ai le pine auro. O pine apa memea e 2 na mauaina lea e Alesana Alesana ma Orlando Taalo, o i laua uma o sui fou o le aufusu a le atunu’u, fa’atoa auai lea o i latou i ni ta’amilosaga fa’avaomalo faapenei.

 

E le i manuia taumafaiga a le tama’ita’i o Elizabeth Tuavale lea na to’afa i ai le aufusu a le atunu’u mo se pine, e ui sa mataina lana taumafaiga i le ta’amilosaga atoa.

 

O le ta’amilosaga Fa’avaomalo o le Tafatolu na talimalo ai Samoa i le vaiaso na te’a nei, sa aofia ai Niu Sila, Samoa ma Amerika Samoa. O le agaga atoa o lenei ta’amilosaga e pei ona taua e le Faiaoga o le aufusu a le atunu’u, afioga Sala Sanele Etuale, o le taumafai lea ina ia si’itia tapenaga a ali’i ma tama’ita’i fusu e sauni ai mo ta’amilosaga tetele fa’avaomalo a le lalolagi.

 

Na taua e le afioga a Sala i le Samoa News e fa’apea, o se tasi o itu taua o le ta’amilosaga a le Tafatolu, o le a tapena atu ai le aufusu a le atunu’u mo ta’aloga Laiti a le Pasefika e faia i Vanuatu i le masina fou o Tesema.

 

Sa ia taua le mataina o le taumafaiga a le au fusu a le atunu’u i le ta’amilosaga o le Tafatolu, ma ua avea ai lea ta’amilosaga o se avanoa e toe fa’aleleia ai ni isi o vaega e moomia le toe fa’aleleia atili, a o lumana’i ai le Ta’aloga a le Pasefika i le masina fou.

 

E pei ona silafia, o le ta’amilosaga sa faia i Samoa i le masina o Setema na te’a atu nei, le Ta’amilosaga Fa’avaomalo lea o le Teuila, lea fo’i na malaga ai le aufusu a le atunu’u, na fo’i mai ai ma le Ipu o le siamupini, ina ua latou fa’ato’ilaloina le aufusu malosi a Samoa ma latou manumalo ai i fusuaga e 5 ae 4 Samoa.

 

Saunoa Sala e fa’apea, o ni isi o sui tuai o le aufusu a le atunu’u, e le i mafai ona malaga i laua i le ta’amilosaga o le Tafatolu lea na fa’atoa mae’a atu nei, ae ua sauni i laua e auai atu i ta’aloga i Vanuatu i le masina fou.

Comment Here