Ads by Google Ads by Google

Taliu mai aufusu a le atunu’u mai Samoa ma le Ipu siamupini


Le Ipu o le Samoa Championship Cup lea ua manumalo ai le aufusu a Amerika Samoa. [ata AF]
ausage@samoanews.com

Ua toe taliu mai nei le aufusu a le atunu’u ma le siamupini, ina ua manumalo i le Ta’amilosaga o Fusuaga o le Teuila sa faia i Samoa i le vaiaso na te’a nei. Mai fusuaga e 9 sa fa’atulaga mo le ta’amilosaga, e 5 manumalo a Amerika Samoa ae 4 manumalo a Samoa.

 

Na taua e le Faiaoga o le aufusu sa malaga atu i Samoa, afioga Sala Sanele Etuale le agaga fiafia ina ua fa’amanuiaina taumafaiga a alo fusu o le atunu’u i lenei ta’amilosaga. O se auala lelei fo’i lea e tapena ai i latou mo isi ta’amilosaga o lo o mulimuli mai i le lumana’i.

 

O sui e to’a 5 o le au fusu na malaga e aofia ai Keresema Tafa, Mamona Tafa, Falaniko Tasi, Kaisa Ioane, ma le tama’ita’i o Elisapeta Tuavale.

 

Na taua e Sala i le Samoa News, le manumalo uma o sui o le aufusu a le atunu’u sa auina atu i Samoa, ma o se tulaga lelei lea e atagia mai ai le maualuga o le la’asaga ua i ai taumafaiga a alo o le atunu’u i lenei ta’aloga.

 

O le ta’amilosaga o fusuaga sa fa’agasolo i Samoa i le vaiaso o le Teuila, sa tausinio ai aufusu mai maea fusu a Upolu ma Savai’i, ma maua ai loa le avanoa latou te iloiloina ai le tulaga lelei ma le maualuga ua i ai le tomai o le aufusu ma Amerika Samoa nei.

 

Na taua e Sala le tulaga mataina sa i ai taumafaiga a le aufusu a le atunu’u sa malaga atu. E le gata i le malosi ae faapea foi le fa’aaogaina o gaioiga eseese i totonu o le mae’a i taimi o ta’aloga ta’itasi.

 

O sui mai le Asosi Fusu a le American Samoa Amateur Boxing Association (ASABA) na fai ma sui o Amerika Samoa i lenei ta’amilosaga fa’avaomalo.

 

O le isi la’asaga o le a sosoo ai mo le aufusu a le atunu’u, o le sauni atu lea mo le ta’amilosaga a le Mosooi i le masina fou o Oketopa, ma sauni atu ai loa fo’i mo ta’aloga a le Samoa Games i Samoa i le fa’aiuga o le tausaga.

 

Na taua e Sala le aoga o le ta’amilosaga sa faia i Samoa, e fesoasoani ai i tapenaga a le aufusu mo ta’aloga o le Mosooi, lea fo’i o le a ta’aalo ai ma le aufusu mai Samoa.

 

O ni isi o le aufusu sa fai ma sui o le atunu’u i Samoa, e aofia ai le susuga ia Tasi ma Ioane, o ni alii fusu ua tele tausaga o tausinio i lenei ta’aloga.

 

O Tasi o lo o ia umia pine auro e 2 ma le pine siliva e tasi, mai ana fusuaga ua mavae atu sa tausinio ai mo Amerika Samoa, e aofia ai ma le ta’aloga o le Oceania i le 2015 ma ta’aloga o le Samoa Games i Samoa i le tausaga na te’a nei, lea na ia manumalo ai i le fa’ailoga o le Tama fusu iloga (MVP).

 

O le susuga fo’i a Tasi lea ua fai ma sui o Amerika Samoa i le ta’amilosaga a le Olimipeka a Tupulaga Talavou i Argentina i le tausaga fou, i le mae’a ai lea o lana taumafaiga mataina i se ta’amilosaga sa faia i Austalia sa malaga atu ai.

 

Ae mo le ali’i o Ioane, o se tasi fo’i lea o ali’i ua iloga lana taumafaiga i le ta’aloga fusu, o loo ia umia pine auro e 4 mai ta’alosaga eseese sa fai ai o ia ma sui o Ameirka Samoa i tausaga ua mavae.

 

O Ioane fo’i na tu’u e fai ma sui o Amerika Samoa i ta’aloga a le Oceania i Ausetalia i le masina o Iuni o le tausaga nei, ae o tulaga fa’aletonu i le faagaioiina o pepa malaga, na mafua ai ona le taunu’u lona fa’amoemoe.