Ads by Google Ads by Google

Talitonu Vaega Iloilo Iuga e le i fa’atauina atu e Stowers ni aisa


[ata: SN]
ausage@samoanews.com

O le fa’aiuga a le Vaega Iloilo Iuga e fa’atatau i le mataupu a Falaniko Stowers lea na tuuina ai i le vaiaso na te’a nei, na atagia mai ai le taliatonu atoatoa o le Vaega Iloilo Iuga, e le o Stowers o se tagata sa ia fa’atauina atu fualaau fa’asaina, le ituaiga o le aisa (methamphetamine) e pei ona tu’uaia ai o ia e le malo.

 

I le mae’a ai o le vaiaso o faagasolo le Fa’amasinoga autu a Stowers, poo Nicole fo’i e pei ona iloa ai o ia e le to’atele, na tu’uina mai ai loa le fa’aiuga a le Vaega Iloilo Iuga, e fa’amaonia le moliaga o lona umia faasolitulafono o vaega o le pauta fa’asaina o le aisa, ae le fa’amaonia le moliaga o le umia fa’asolitulafono o aisa ma le fa’amoemoe e fa’atau pe tulei atu i isi tagata.

 

Na fa’avae le faaiuga a le Vaega Iloilo Iuga i mau faamaonia sa tuuina atu e le malo i luma o le fa’amasinoga, lea na taua ai e fa’apea, e 6 straw e ta tipi ae o loo i ai fo’i vaega o le pauta oona o le aisa i totonu na maua e Leoleo i le tino o Stowers, ina ua sailia o ia i le aso 28 Novema o le tausaga na te’a nei.

 

I faafinauga faaiu a Loia ao le i tu’uina atu le mataupu e iloiloina e le Vaega Iloilo Iuga, na matua finau ai le loia a le malo ia Woodrow Pengelly e fa’atosina finagalo o Fa’amasino, i le atoatoa lea o mau ua tuuina atu e le malo e lagolagoina ai moliaga e lua fa’asaga ia Stowers.

 

Na taua e Pengelly e fa’apea, e le gata na maua e Leoleo vaega o aisa ia Stowers, ae o tagata e toatele ma ta’avale e masani ona aga’i atu i le fale o Stowers i Fagatogo, o le fa’ailoga lea e faamaonia ai sa o i latou e fa’amau mai ni aisa ma ia Stowers.

 

O le isi molimau na valaau e le malo, o le ali’i e igoa ia Sepulona Sepulona Jr, lea sa ia taua le fai ma ana masani le alu e fa’atau mai aisa mai ia Stowers i le tele o aso, e aofia ai fo’i ma le aso lea na loka ai Stowers e Leoleo.

 

Na faamatala e Sepulona Jr i lana molimau lona masani lelei ia Stowers, aua o le tagata lea e masani ona fa’atau mai ai ana aisa. O le isi molimau na finau le malo i le vaega iloilo iuga ina ia taula’i i ai la latou silasila, o le molimau a le ali’i Masela o le Fa’amasinoga, susuga Michael Nix, lea e tuaoi lona fale ma le fale o Stowers. Na taua e Nix le toatele o tagata ma ta’avale e masani ona aga’i atu i le fale o Stowers i soo se taimi o le aso e fa’atau mai fualaau fa’asaina.

 

Ae na taua e le loia a Stowers ia Douglas Fiaui e fa’apea, e leai ni aisa na maua e Leoleo ia Stowers i le aso 28 Novema ina ua latou taofia o ia i luma o le Ofisa o Leoleo i Fagatogo. E oo lava fo’i i le fale o Stowers ina ua su’e ma saili e Leoleo, e leai ma ni fualaau fa’asaina poo ni fa’ailoga e iloa ai o lo o auai Stowers i le umia atoa ai ma le fa’atauina atu o fualaau faasaina.

 

O tagata e to’atele ma ta’avale ia e finau le malo e masani ona aga’i atu i le fale o Stowers, fai mai lana loia, e mafua ona aga’i atu i latou nei i le fale a le ua molia, o le fia maua lea o se fesoasoani i le fa’atumuina o pepa faigaluega mai le kamupani a le StarKist Samoa, ina ia saili ai ni a latou galuega.

 

O se ali’i sa masani ona tafao i le fale a Stowers i Fagatogo o Saua Seiuli, sa ia faailoa i le vaega iloilo iuga e fa’apea, o tagata ia e masani ona o atu i le fale o Stowers, o tagata e o atu e avatu numera o Saogalemu ma I.D, e fa’atumu ai a latou pepa faigaluega.

 

Na taua e Fiaui le molimau a le malo o Sepulona Jr, o ia o se tagata pepelo, na mafua ona alu atu i le fa’amasinoga, na alu atu e pepelo, ae lei alu atu e molimau i le mea moni.

 

I le faaiuga o lenei faamasinoga, na talitonu ai le vaega iloilo iuga, e sa’o sa maua vaega o fualaau faasaina ia Stowers, peita’i e lei talitonu i latou, o ia o se tagata sa ia tulei ma fa’atauina atu fualaau fa’asaina i isi tagata.

 

O le masina o Fepuari o le tausaga fou lea ua fa’atulaga e lau ai le fa’asalaga a Stowers, ma o lo o taofia pea o ia i le toese i Tafuna i le taimi nei.