Talitonu Savali e tatau ona fiafia pagota lelei tausiga latou Toese


[ata: foa'i]
ausage@samoanews.com

E ui i le taumafai atu o le afioga i le ali’i Faipule mai Manu’a ia Toeaina Faufano Autele ina ia avea le Fono ma leo o ni isi o pagota o loo taofia i le toese o loo taua i ripoti le sauaina o i latou e Leoleo, atoa ai ma sana fuafuaga e tusi i le Fa’amasinoga Feterale e faailoa i ai lenei mataupu pe afai e leai se gaioiga e faia i ai a le Ofisa o Leoleo, na saunoa ai le Fofoga Fetalai ia Savali Talavou Ale e fa’apea, e tatau ona fiafia paga o loo lelei le tausiga o i latou i totonu o le toese.

 

Talu mai le vaiaso na te’a nei seia oo mai i le vaiaso nei, o le mataupu e fa’atatau i le sauaina o pagota e pei ona salalau ai ripoti, o loo avea pea lea ma se tasi o mataupu o loo talanoaina i luma o le maota o sui.

 

Ina ua le taunu’u le iloiloga sa valaauina e le Komiti o Fa’amasinoga ma Tulafono e fesiligia ai le Loia Sili ma le Loia Fautua e tusa ai o tuuaiga i pagota o loo sauaina i le toese, na taua ai loa e le Ta’ita’i o le Komiti, le afioga a Toeaina le i ai o sana fuafuaga ua i ai, i le ono fai lea o sana tusi e ave i le Faamasinoga Feterale e saili ai se fesoasoani.

 

E le i nofo lelei i le faafofoga a Savali le saunoaga a Toeaina. Saunoa Savali e fa’apea, e tatau i afioga i Faipule ona manatua, o i latou o loo taofia i le toese i Tafuna, o i latou ia ua tuli fa’asalaga.

 

E fia faailoa atu e le Samoa News, e le o i latou uma o loo taofia i le toese i Tafuna ua faamaonia moliaga ma tuli fa’asalaga, o ni isi o i latou o loo fa’atalitali le aso e faia ai a latou fa’amasinoga, e le i fa’amaonia e le fa’amasinoga moliaga fa’asaga ia tei latou.

 

“E tatau ona outou silafia, o i latou ua taofia i le toese ua poloaina e le fa’amasinoga e tuli fa’asalaga. E tatau fo’i la ona latou faafetai o loo lelei le tausiga o latou”, o le saunoaga lea a Savali.

 

Saunoa atili Savali e fa’apea, o le tiute o le Fono o le vaavaai o auala e lagolago ai i le Komesina ma le Ofisa o Leoleo i le faaleleia atili o le latou tautua. Sa ia talosagaina fo’i Faipule ina ia silasila toto’a i auala e fa’amama avega ai i le galuega a le Komesina, ae aua le tusitusi lima ma vaavaai poo ai e sese.

 

Ae na taua e Toeaina e fa’apea, o lona fa’anaunauga o loo i ai, talosia e le o pau i taliga tutuli le tagisa a le alii pagota sa tuuina atu i luma o le Fa’amasinoga, e tusa ai o le auala na faaoolima ai ni leoleo ia te ia.

 

Saunoa atili fo’i Toeaina e fa’apea, afai ua mae’a ona tuuina atu le talosaga a le pagota i le Fa’amasinoga, e tatau fo’i ona vaavaai le Fono i sana vaega e fesoasoani ai i le tau sailiina o le mea moni e faatatau i lenei mataupu.

 

O lona popolega e pei ona ia taua i luma o le maota, ina ne’i toe tula’i mai fo’i faafitauli na tutupu muamua i le toese i Tafuna i tausaga ua mavae, lea na mafua ai ona ta’usala le Pule tuai o le Falepuipui e le Faamasinoga Feterale, ma taofia ai o ia i le falepuipui a le Feterale i Honolulu, e mafua mai i le fa’alavelave lea na ia faaoolima ai i se alii pagota sa taofia i le falepuipui i Tafuna.

 

O le Pule tuai a le toese i Tafuna e pei ona taua e Toeaina i lana saunoaga, o le susuga a Amituana’i Mika Kelemete lea ua maliu, lea na ta’usala i lona fesoasoani e faatino sau’aga faasaga i se alii pagota, ma faasala ai e i le falepuipui feterale mo le umi e 24 masina.

Comment Here