Talitonu Puletu e le o lelei a’oa’oina o tagata i le leaga fa’alapisi

Le afioga i le ali’i faipule mai le itumalo o Fofo ia Puletuimalo D. Koko  [ata AF]
ausage@samoanews.com

E ui o lea ua pasia e le maota o sui i le faitauga fa’atolu i le taeao nei le tulafono sa talosagaina e le faigamalo a Lolo ma Lemanu, e tu’u atu ai le malosi i ni isi o Ofisa o le malo mo le fa’amalosia o le tulafono o le fa’alapisi, e aofia ai ma le fa’asalaina lea o tagata e fa’amaonia i le soliga o le tulafono, peita’i na taua e le afioga i le ali’i faipule mai Fofo e fa’apea, e le tatau i le malo ona latou fa’asalaina fua tagata i le fa’alapisi, ae tatau ona fai muamua ni polokalame e a’oa’oina ai tagata uma o le atunu’u, ina ia malamalama i latou i le leaga o le fa’alapisi.

 

“E le i lelei sa’u moe ina ua ou faitau i le agaga o lenei tulafono, aemaise ai fa’asalaga ia ua manatu le malo e fa’asala ai tagata latou te solia le tulafono, e aunoa ma le faia o ni aoaoga e fautuaina ai o tatou tagata i le leaga o le fa’alapisi”, o le saunoaga lea a Puletuimalo D. Koko.

 

Na fa’ailoa e Puletuimalo i molimau a le malo lona talitonuga o lo o i ai, i le tatau lea i Ofisa o le malo o le a fa’amalosia le tulafono le aga’i atu i tua i nu’u ma afioaga, ma fa’ataunu’u ai ni a’oa’oga i auala e tatau ai ona galulue fa’atasi le atunu’u e fa’amama le atunu’u ma taofi ai le fa’alapisi.

 

“E le gata i aiga o lo o i totonu o nu’u ma afioaga e tatau ona faia i ai a’oa’oga, ae tatau fo’i ona a’oa’oina atu ai ma ave ta’avale e pei o ave pasi ma ave taxi, ina ia latou malamalama lelei i lo latou tiute fa’atino i le taimi e vaaia ai se isi o le atunu’u o fa’alapisi i totonu o paxi ma taxi, pe lafo fo’i lapisi mai totonu o pasi ma taxi, ina ia mautinoa e silafia uma e tagata le taua o le latou vaega e tatau ona fai”, o le saunoaga lea a Puletuimalo.

 

O a’oa’oga e pei ona fautuaina e le ali’i faipule, e aofia ai ma le fa’aali o ni ata i luga o le televise a le malo, aemaise ai talanoaga i luga o leitio ma nusipepa, ina maimoa ma fa’afofoga i ai le atunu’u, ona maua ai lea o le latou silafia i le galuega e tatau ona latou faia.

 

Na aumai e le afioga i le ali’i faipule fa’ata’ita’iga i polokalame o lo o fa’alauiloa e le malo o Samoa i luga o televise e fa’atatau i le leaga o le fa’alapisi, ma ia taua ai le tatau fo’i ia Amerika Samoa ona latou fa’atinoina fo’i auala e pei ona faia e Samoa.

 

“O la’u fautuaga lena, fa’aaoga luga o le T.V e fa’aali ai polokalame ina ia a’oa’oina ai le atunu’u, ona mafai ai loa lea ona malamalama tagata i le taua o le fa’amamaina o le atunu’u, vaai fo’i ia Upolu ma a latou polokalame o lo o fa’aali i luga o le T.V, e le gata e manaia ae o lo o maua ai le avanoa o le atunu’u e maimoa ai, manaia pe a fa’apena fo’i tatou i le unaiina o le polokalame lenei”, o le saunoaga lea a Puletuimalo na fa’auilavea ai le sui fofoga fetalai ia Fetu ma ia fautuaina le ali’i faipule, ina ia talanoa mai i mataupu e fa’atatau ia Amerika Samoa, ae aua le aumaia fua ma polokalame a le malo tuaoi o Samoa i lana saunoaga.

 

o se tasi o vaega o le tulafono fou lea ua talosagaina e le faigamalo a Lolo ma Lemanu, o le vaega lea e mafai ai ona fa’asala le ave ta’avale o le ta’avale se togi mai ai i fafo e se tagata le lapisi.

 

Na taua e ni isi o faipule le tatau lea ona fa’amanino le tulaga lea, po o a tonu ta’avale ia e fa’atatau i ai le tulafono, ina ne’i afaina atu ai fua ma ave ta’avale o ta’avale la’upasese e pei o pasi ma taxi, pe afai e tia’i mai i fafo e se isi o le pasese se lapisi.

 

Saunoa le afioga i le ali’i faipule ia Fatulegae’e Palepoi Mauga e fa’apea, e leai se mafua’aga e fa’asala ai fua le ave pasi po o le ave taxi, pe afai o se isi o le pasese sa ia togiina i fafo le lapisi.

 

Na fesili Fatulegae’e i le loia sili, pe mafai e se isi tagata ona ia fa’afeso’ota’iina le Ofisa o Leoleo, e ta’u i ai le tagata sa ia togiiina le lapisi i fafo mai se ta’avale o lo o alu i luga o le alatele, pe afai na te vaaia se tulaga fa’apea i luga o le alatele, ae na saunoa le loia sili ia Talauega Eleasalo Ale e fa’apea, o se tulaga lelei pe afai e mafai e le atunu’u ona latou faia lea tulaga, o le vili lea o Leoleo pe afai e vaaia se tagata o ia togi se lapisi i fafo mai se ta’avale, poo le taimi fo’i e vaaia ai se tagata o ia tia’i se lapisi i nofoaga eseese e pei o tafatafa o le alatele, fale fa’atali pasi, po o nofoaga fo’i o lo o aga’i atu i ai le atunu’u mo tafaoga ma evaga i fa’aiuga o le vaiaso.

 

Saunoa le afioga i le ali’i faipule ia Vaeaitu Mulinu’u Maluia e fa’apea, o le to’atele o le atunu’u e le o manatu mamafa i latou i le leaga o le fa’a lapisi, ae uma loa ona aai ona lafoa’i lea o lapisi i nofoaga e tafafao ai

 

Na fautuaina e le afioga i le ali’i faipule ia Vaetasi Tuumolimoli Saena Moliga le loia sili, ina ia fautuaina ofisa uma o le malo o le a aofia i le fa’amalosia o le tulafono lenei, ina ia fai le galuega ma le fa’amaoni, ae aua nei fa’amuamua le masani ma tulaga o aiga.

 

Ae na taua e le afioga i le ali’i faipule ia Vailoata Eteuati Amituana’i e fa’apea, e i ai lona talitonuga ua matua mafiafia lava tusi tulafono a Amerika Samoa i le tele o tulafono ua mae’a ona pasia, ae o le fa’afitauli o lo o i ai, e le lelei ona fa’amalosi tulafono, e i ai fo’i lona talitonuga, e le o lava fa’asalaga o lo o tu’uina mai i totonu o le tulafono lenei, aua e tiga lava ona fa’asala atu tagata e fa’aauau pea ona latou toe soli le tulafono, e leai ma se a’oa’iga latou te maua.

 

O le agaga o le malo ua mafua ai ona fa’atula’i le tulafono lenei, ona ua tele taumafaiga a le malo ma le atunu’u e fa’amama Amerika Samoa, ae o lo o tupu pea le tele o le fa’aotaota i laufanua ma ogasami o le atunu’u.

 

O le tele o otaota ua maitauina le pito ta’atele e aofia ai muli sikaleti, atigifagu, atigi ‘apa, ma le anoanoa’i lava o isi ituaiga lapisi o lo o lafoa’i e tagata i vaega eseese o le atunu’u, ma molimauina ai le mataga i le vaaiga a tagata mai fafo.

 

I le va o le masina o Fepuari ma Aperila o le tausaga nei, e tusa ma le 3,224 pauna o otaota sa mafai ona aoina mai e le Ofisa o le Puipuiga o le Si’osi’omaga (AS-EPA) i vaega eseese o le atunu’u.

Comment Here