Ads by Google Ads by Google

Talitonu Fiaui tatau ona tu’u eseese Ofisa Nofovaavaaia ma le Fa’amasinoga

 Le Loia Fautua mo tagata lautele, susuga Douglas Fiaui  [ata AF]
ausage@samoanews.com

Na fa’ailoa e le Loia Fautua mo tagata lautele o le atunu’u i luma o le Komiti o Mataupu Tau Tulafono a le maota o sui i le vaiaso na te’a nei e fa’apea, e tatau ona tu’u eseese le Ofisa Fa’anofovaavaaia ma le vaega o Fa’amasinoga mai le fa’atinoina o tiute tauave.

 

“I lo’u taofi e tatau ona tu’u eseese Ofisa ia e lua”, o le saunoaga lea a Douglas Fiaui, e tali atu ai i le fesili a le afioga i le ali’i Faipule ia Toeaina Faufano Autele, ina ua fesiligia sona lagona fa’aloia, pe tatau ona tu’u eseese le ofisa faanofovaavaaia ma le vaega o Fa’amasinoga.

 

Na taua e le afioga a Toeaina i le taimi o le iloiloga lona lagona o lo’o i ai, i le le lelei lea ona taulimaina o aia tatau fa’aletulafono o le to’atele o i latou o lo o a’afia i solitulafono.

 

Sa ia taua atili fo’i e fa’apea, o se tasi o itu o lo o ia maitauina i le taimi nei, o le avega o lo o fetaia’i ma le malo ona o le to’atele naua o tagata o lo o taofia i le toese i Tafuna i le taimi nei, ma o lo o tu’u fesili ai lona mafaufau, pe le o le isi lea mafua’aga ua ala ai ona to’atele i latou e taofia i le toese, ona e le o lelei le taulimaina o latou aia tatau fa’aletulafono i soo se taimi e fa’agasolo ai a latou mataupu i luma o le fa’amasinoga.

 

I le avea ai o le afioga i le ali’i faipule mai le itumalo o Manu’a #2 ia Toeaina, o se tasi sa tautua muamua i le Ofisa Fa’anofovaavaaia i tausaga ua mavae, sa ia fa’asoa ai le tomai atoa ai ma le agava’a sa mafai ona ia fa’aaoga e fa’atino ai lana galuega.

 

Na saunoa Fiaui i le komiti, ona o ni isi o mataupu sa ia molimauina le le talafeagai o auala sa fa’atino ai taualumaga, e aofia ai le valaau o le sui o le ofisa faanofovaavaaia e molimau i se iloiloga o se tagata ua tu’uaia i lona le usitaia o tu’utu’uga o lana nofovaavaaia.

 

Na umi se taimi o taumafai Fiaui e fa’amanino i le komiti aiaiga o lo o fa’atautaia ai tulaga o galuega a le ofisa faanofovaavaaia ma le ofisa o fa’amasinoga, aemaise lava i le taimi e faila ai e le ofisa faanofovaavaaia sana talosaga i le fa’amasinoga, mo se poloaiga e fa’aleaoga ai tuutuuga o le nofovaavaaia a se tagata sa molia, i le mae’a ai lea ona masalomia o lona le tausisia o tuutuuga o lana nofovaavaaia.

 

“Ua i ai taimi ua ou vaai ai i sui o le ofisa faanofovaavaaia ua avea ma molimau i le taimi o iloiloga a ni isi ua molia, ae o le sui lava fo’i lea e tasi o le ofisa faanofovaavaaia e tusia le ripoti e fa’alagolago i ai se fa’aiuga a le fa’amasinoga fa’asaga i le tagata ua molia, ma ua atagia mai ai le fete’ena’i o vaega ia e lua, o le fai o se tasi ma molimau i le mataupu, ae o ia lava fo’i lea o lo o avea ma tagata su’esu’e mo le fa’amasinoga i le taulimaina o le mataupu a le tagata ua molia, ae o ia o le tagata faigaluega a le fa’amasinoga, ae o lea ua fa’alagolago atoa le fa’amasinoga i lana ripoti e fuafua i ai se fa’aiuga fa’asaga i le tagata ua molia”, o le saunoaga lea Fiaui.

 

Saunoa fo’i le loia fauta e fa’apea, e le malamalama o ia i le mafua’aga e ala ai ona fa’alagolago le fa’amasinoga i le ripoti lea sa tusia e le sui o le ofisa faanofovaavaaia e fuafua i ai sana fa’aiuga, ae ua le fuafua lana faaiuga i luga o le molimau sa fa’alogo i ai.

 

Ona o ia tulaga e pei na taua e le ali’i loia, sa ia taua ai lona talitonuga fa’a loia fautua, e tatau ona tu’u eseese ofisa nei e lua, ina ia mautinoa e atoatoa auala e puipuia ai aia tatau o tagatanu’u o le a molia.