Talitonu Faipule e le i lelei le logoina o le atunu’u taimi ‘afa Gita

ausage@samoanews.com

O le vaiaso fou lea ua fa’atulaga e faia ai se iloiloga faapitoa a le Maota o Sui, mo le fesiligiaina o le mataupu e fa’atatau i le tulaga na avatu ai lapataiga ma fa’asalalauga i le atunu’u ina ia sauni i le taimi o le ‘afa o Gita i le masina na te’a nei.

 

O sui mai le Ofisa Vaaitau faapea ai ma le Matagaluega o le Puipuiga o le Saogalemu Lotoifale ua fa’amoemoe e molimau i lenei iloiloga.

 

O lea iloiloga ua mafua ona valaauina ona e talitonu ni isi o afioga i Faipule, e lei lelei le logoina o le atunu’u i fa’amatalaga tonu ma sa’o e tatau ona latou silafia, o le mafua’aga lea na tele ai maota ma laoa sa fa’aleagaina i le ‘afa, ona e lei nofo sauni le to’atele o le atunu’u.

 

Saunoa le afioga i le ali’i Faipule mai Manu’a ia Vesi Talalelei Fautanu Jr e fa’apea, ana sa’o fa’amatalaga na tuuina mai e le Ofisa Vaaitau i le atunu’u i le vaiaso ao lumana’i le ‘afa o Gita, e to’atele aiga e nonofo sauni.

 

I lona talitonuga, e foliga ua tele atu le taimi ua fa’aalu e le Ofisa o le Puipuiga o le Saogalemu Lotoifale e mata’itu ai le taimi e fana ai le pomu niu kilia a Kolea i Matu, nai lo le manatu e fesoasoani i le mata’ituina o le saogalemu o le atunu’u.

 

Sa ia taua lona fa’anoanoa tele ina ua ia molimauina le tele mo meatotino a aiga na fa’aleagaina. E ui lava e leai se soifua na ma’imau ae na saunoa Vesi e fa’apea, sa le tatau lava ona pagatia faapea le tele o aiga i le ‘afa.

 

Saunoa le afioga i le ali’i faipule ia Timusa Tini Lam Yuen e fa’apea, sa i ai lona manatu maualuga e fa’aola sailini sa faapipii i le taimi na agi mai ai le ‘afa o Gita, ae na faateia o ia ina ua mae’a lava le ‘afa e leai ma se sailini na ola.

 

Sa ia taua le tele o aoaoga sa faia e tapena ai tagata faigaluega a le malo i soo se taimi e tutupu ai faalavelave faalenatura, ae foliga mai a tutupu faalavelave i le taimi tonu e tutupu ai, ona fememea’i lea o tagata faigaluega a le malo poo le a le gaioiga e tatau ona fai.

 

Na lagolagoina e ni isi o afioga i Faipule le tatau lea ona valaau se iloiloga ma Ofisa o loo gafa ma le tuuina mai o fa’amatalaga i taimi o fa’alavelave, ina ia mafai ai ona saili se fofo o le fa’afitauli na tula’i mai i le masina na te’a nei.

 

Saunoa le Sui Fofoga Fetalai e fa’apea, e ao i le atunu’u ona silafia, e taua fo’i la latou pito laau e fa’atino i taimi o faalavelave faapenei, ina ne’i aumai tasi lo latou faalagolago i le malo, ae o le saogalemu o le matafaioi lea mo tagata uma.

 

Sa ia lagolagoina le fa’atulagaina o se iloiloiga ma Ofisa e pei ona taua, ae tatau ona maua se avanoa e fesiligia muamua ai le Ofisa Vaaitau i sa latou fa’amatalaga.

 

Na faamanino e le Taitai o le Ofisa Vaaitau ia Elenor Lutu-McMoore i se feiloaiga ma le Samoa News i le masina na te’a nei e fa’apea, sa i ai ni fa’afitauli na alia’e mai i le auaunaga a le latou Ofisa i le taimi o le afa, o ia fa’afitauli e aofia ai le motusia o fesootaiga ina ua motusia le eletise, atoa ai ma le pe faafuase’i o le afi fa’aleoleo a le Ofisa Vaaitau sa i ai.

 

I le tulaga o fa’amatalaga sa tuuina atu i le atunu’u, na taua e Lutu-McMoore e fa’apea, talu mai le vaiaso atoa ao lumana’i le ‘afa o Gita, sa fa’aauau pea ona tuuina atu e le latou Ofisa Faasalalauga i luga o le leitio ma le televise, e faailoa atu ai i le atunu’u tulaga ma foliga o le tau o le a i ai.

 

E ui i le tele o fa’asea mai le atunu’u, ae na taua e le Tama’ita’i o loo faauluulu i ai le Ofisa Vaaitau le taua o faitioga ma fautuaga, e fesoasoani ai i le fa’aleleia atili o le tautua a le Ofisa i le lumana’i.

Comment Here