Ads by Google Ads by Google

Talimalo Samoa i le fonotaga o le “2Samoa Talk” ia Oketopa


Fonotaga a Samoa e 2 lea ua fa’atulaga e talimalo ai Samoa i le aso 12, 2017 Oketopa 12, 2017. [ata AF]
ausage@samoanews.com

O le fonotaga a le “2Samoa Talk” lea na fa’atulaga e talimalo ai Samoa i le masina o Iulai na te’a nei, ua fuafua e usuia i le aso 12 o Oketopa i le laumua i Apia.

 

O ni isi o mataupu o le a talanoaina i lenei fonotaga faaletausaga e pei ona fa’amanino e le kovana ia Lolo Matalasi Moliga i le fonotaga a le Kapeneta i le vaiaso na tea nei, e aofia ai tulaga i atina’e ma le tamaoaiga o malo e lua, tulafono tau femalagaaiga, puipuiga i taimi o fa’alavelave fa’alenatura, atina’e tau turisi, fela’uaiga, fa’atoaga, atoa ai ma atina’e tau i le eletise ma le suavai e tautua ai tagata.

 

Ua fautuaina Fa’atonusili o Matagaluega a le malo ina ia fuafua a latou fonotaga ma Faauluuluga o Ofisa ma Matagaluega a le malo o Samoa, ina ia fa’amautu tulaga o a latou talanoaga ao le i tu’uina atu mataupu e pasia ma faamaonia i luma o le fonotaga tele, lea o le a ta’ita’i e Ta’ita’i o malo e lua.

 

O le toesea ai o le ali’i kovana i fonotaga i le laumua i Uosigitone i le masina o Iulai na te’a nei, na mafua ai loa ona toe tolopo le fonotaga ia Oketopa.

 

I le fonotaga a le Kapeneta i le vaiaso na te’a nei, na talosagaina ai e Lolo le tatau lea ona iloilo toto’a ni atina’e a le malo e fausia i fanua ua mae’a ona foa’i mai e le malo o Samoa fa’apea ai ma le fanua ua mae’a ona foa’i mai e le malo o Tonga.

 

Mo le fanua o lo o i Tafuna lea ua mae’a ona foa’i atu e le malo o Amerika Samoa mo le malo o Samoa, na fa’ailoa aloaia ai e Lolo le mae’a lea ona sainia o se maliliega i le va o Samoa ma le au fai pisinisi taxi i le atunu’u, latou te fa’amama le latou fanua i Tafuna e paka ai a latou ta’avale.

 

Na fa’atalasua le saunoaga a le ali’i kovana ma ia taua ai e fa’apea, o le taimi lava e uma ai ona fa’amama e le au ave taxi le fanua mo le fa’aaogaina, o le taimi fo’i lea e sau ai le Palemia ma fa’aaoga le fanua e fausia ai le fale a le malo o Samoa.

 

“E taua le tatau lea ona tatou manatunatu i ni atina’e lelei e tatau ona fausia i le fanua a le malo i Samoa ma Tonga, ina ne’i maimau na avanoa e fausia ai ni isi atina’e mo le malo i le lumana’i”, o le saunoaga lea a le ali’i kovana.

 

Na taua e le Komesina a Samoa i Amerika Samoa nei, afioga Auseugaefa Va’asatia Poloma Komiti i se fa’atalatalanoaga ma le Samoa News i le masina na te’a nei, le i ai lea o se fuafuaga a le afioga i le ali’i Palemia ia Tuilaepa Sailele Malielegaoi, e fa’aaoga le fanua a Samoa o loo i Tafuna e fausia ai se ofisa autu mo le Konesula, ina ia mafai ai ona fa’alautele le tautua a le Ofisa mo tagatanu’u o Samoa o loo alala i Amerika Samoa nei, fa’apea ai ma le taulimaina o isi mataupu e fa’atatau i tulaga fa’avaomalo a Samoa ma Amerika Samoa.

 

Na fautuaina e le afioga i le ali’i Faatonusili o le Matagaluega o Fefa’atauaiga ma Alamanuia a le malo ia Keniseli Lafaele sui o le Kapeneta, ina ia amata fa’atulaga tapenaga mo mataupu e tatau ona talanoaina i Samoa, ina ia lava le taimi e feutana’i ai sui o ofisa a malo e lua ao le i tuuina atu mataupu e pasia mai i le taimi e usuia ai le fonotaga autu.