Ads by Google Ads by Google

Talia Ofisa Aoga talosaga a le TAOA mo le maketi o galuega taulima

ausage@samoanews.com

Ua talia e le Ofisa o Aoga le talosaga sa tuuina atu i ai e le Faatonusili o le Ofisa o Tagata Matutua i le atunuu (TAOA), mo se avanoa e malaga atu ai fanau aoga e maimoa i le maketi lea ua fau fa’apitoa e tu’u uma i ai galuega taulima a Tama ma Tina matutua o le atunu’u.

 

Na taua e le sui faatonusili o le Ofisa o Aoga ia Faauifono Vaitautolu i le Samoa News i le vaiaso nei e fa’apea, ua talia e le Ofisa o Aoga le talosaga a le Fa’atonusili o le TAOA, ona ua latou vaavaai fo’i i le taua o lenei talosaga, aemaise ai e aoga tele lea mo fanau aoga e malamalama ai i latou i tulaga o galuega taulima a le Samoa.

 

E ui e le i fa’ailoa aloaia mai se fuafuaga a le Ofisa o Aoga ua faamoemoe e faia mo lenei tulaga, peita’i ua mae’a ona fa’alauiloa mai le taoto atu o le avanoa i puleaoga o aoga ta’itasi, mo le fa’atulagaina o malaga a fanau aoga i le nofoaga autu o le TAOA i Pago Pago, i taimi e mana’omia ai ona asia lea nofoaga e fanau aoga.

 

Na taua e le afioga i le Faatonusili o le Ofisa o le TAOA i le Samoa News e fa’apea, o le taua o lenei polokalame, e mafai ai e fanau aoga ona latou molimauina le taua o galuega taulima a Samoa latou te le o malamalama i ai.

 

“O le to’atele o fanau aoga e le i vaai lava i latou i le tele o isi galuega taulima a Samoa, ae o le avanoa lelei lenei e mafai ai ona latou maimoa ma vaavaai i auala e gaosi ma fa’atinoina ai nei galuega taulima, e le gata fo’i i lea, ae maua ai fo’i ma le avanoa latou te fesiligia ai Tama ma Tina matutua sa fa’atinoina nei galuega taulima, e fa’amatala atu le taua ma le aoga o galuega taulima eseese nei ia i latou”, o le saunoaga lea a Ale Tifimalae i le Samoa News.

 

Na taua e ni isi o Tama ma Tina matutua o lo o i ai le tomai i le gaosia o galuega taulima nei e fa’apea, o se tasi lenei o auala e mafai ai ona fa’amasani fanau Samoa e a’oa’o ma malamalama i tu ma agaifanua a le atunu’u, o le iloa lea ma malamalama i galuega taulima eseese a le atunu’u.

 

I le fa’aaliga o galuega taulima sa fa’atinoina e le Ofisa o Tu ma Aganu’u a Amerika Samoa i le vaiaso na te’a nei, na molimauina ai le tele o ni isi o galuega taulima ua tauau ina mou ese atu, e pei o le filiina lea o le ‘afa Samoa e fa’aaoga ai le pulu popo.

 

Na taua e le Tama matua ia Mata’utia Uelese e fa’apea, o le taua o le ‘afa a Samoa, e atagia mai ai le malosi ma le lelei o mafaufauga o Tuaa i aso ua mavae, i le taimi na latou lalagaina mai ai lenei galuega taulima, lea lava ua oo mai i aso nei o lo o fa’aauau mai pea lea.

 

“O ni isi nei o galuega taulima e tatau ona aoaoina ai fanau ma tupulaga talavou, ina ia latou malamalama i le taua ma le aoga o le ‘afa, lea sa fau ai fale a Samoa i aso ua mavae, lea fo’i o lo o fa’aauau mai pea lava e oo mai i le taimi nei”, o le saunoaga lea a Uelese i le Samoa News.

 

Na taua e sui o le Ofisa o Tu ma Agaifanua a le atunu’u i le vaiaso na te’a nei e fa’apea, o galuega taulima fa’a Samoa, o ni isi nei o oloa sa tele ina fiafia turisi sa malaga mai i va’a meli e lua i le vaiaso na te’a nei e fa’atau, e avea ma oloa e fa’amanatu ai lo latou malaga asiasi mai i Amerika Samoa.