Talia Niu Sila e auina i ai gasegase totogia e le Medicaid


[ata: SN]

Ua fa'ailoa mai se tasi o mea ua leva ona tulitulia e le mamalu o le atunu'u, le fia gasolo e faia talavai i Niu Sila po'o Ausetalia, ae totogia i a latou penefiti o le Medicaid. Lea ua talia aloa'ia e le Medicaid lea tulaga, ma o se fa'aolataga i o tatou tagata o lo'o agava'a i le Medicaid ae faigata ona malaga aga'i i Amerika ona o latou nu'u na soifua a'e ai o Samoa, Tonga po'o Fiti, e tapena fo'i se visa.

 

E moni fo'i la e fai fo'i le visa e malaga ai aga'i i Niu Sila, ae taugofie ma e toe faigofie fo'i ona talosaga i Samoa. O le isi lea tala fiafia ua fa'alogoina e nai tagata o lo'o ua leva ona agava'a i a latou Medicaid, ae le mafal lava ona aga'i i Hawaii po'o Amerika e taugata fo'i pasese o le malaga ma toe fo'i mai.

 

O nisi o sui o le Medicaid State Agency lea e fa'auluulu i le Sui Kovana Lemanu Peleti Mauga ua fa'ato'a to'ai mai i fanua mai se latou malaga asiasi i Niu Sila, ina ia sailia le tulaga o falema'i, ma le togafitiga o gasegase o tagata Samoa po'o gasegase lava ua matele ina maua ai tagata o le atunu’u.

 

E tusa ai ma se saunoaga a le afioga Tofoitaufa Sandra King Young sa ia fa'ailoa ai, "O le tulaga o togafitia ai gasegase i le malo o Niu Sila o lo'o maualuga lava, o se tasi lea o atunu'u e taua tele ia i latou le togafitia o gasegase ae le na'o le faia o suesuega o gasegase, ma e le taugata tele fo'i e pei o le totogi o talavai i Amerika ma Hawaii."

 

I lona taofi, e tele atu le sao o le fa'aaogaina o le tupe Amerika e totogia ai pili mo togafitiga o ona tagata i Niu Sila nai lo le totogia lea aga'i i Amerika o togafitiga o gasegase o le mamalu o le atunu'u.

 

"E le'i faigofie lenei suiga ua manatu i ai aua ua iloga le matua taugofie lava o talavai i Niu Sila mo tagata lautele nai lo le aga'i i Amerika ma Hawaii. O lea suiga ua tu'uina fo'i i se fuafuaga fa'ataoto, ma o le autu lava ia tele se aoga o le tupe totogia mo togaifitiga o tagata lautele faatasi ai ma le auina atu o i latou i fafo i pasese, e taugofie fo'i."

 

E ao la ina mua'i fa'ataoto mai aiaiga ua mae'a pasia mai e le CMS (Center for Medicaid and Medicare), ma o nei mea uma e ao ina fa'ailoa fo'i i e gasegase ma ia usita'ia uma alafua o le Medicaid i lalo o le fuafuaga tamau mo le tatou teritori ia i latou ua agava'a i le medicaid.

 

Ua fa'ailoa mai o le lisia mai nei mea uma i se isi fa'asalalauga lata mai le Ofisa autu o le Medicaid. I lana saunoaga e tusa ai o le asiasiga i mea uma sa ao ina pasia lelei, "O le matua agava'a lava ona auina atu o gasegase i Niu Sila. Pasia uma e Niu Sila mea sa auiliilia e ao ina va'ai toto'a i ai le asiasiga."

 

"E tu'ua e i matou falema'i uma na asia i Niu Sila, e matua tutusa pau o matou talitonuga ona o mea ua va'aia ma ituaiga togaiftiga o fa'atautaia, le tausiga o gasegase fa'ataotolia, nofoaga e va'aia ai gasegase, ae maise o nofoaga e toe fa'aleleia atili ai tino ma le malosi o e na fa'ataotolia, e matua maualuga le tausiga a Niu Sila i tagata fa'agasegasea. O falema'i uma lava e pasia atoatoa mo le tausiga o gasegase atoa ai ma togafitiga ma le agava'a fo'i o ali'i ma tama'ita'i foma'i ma tausima'i."

 

Ina ua fesiligia i se taimi e amatalia ai lenei so'otaga, ae fa'ailoa mai Young, "O le auaunaga e le o mafai ona faia loa i le taimi nei. E i ai la'asaga o feuiuia'iga e ao ina mua'i alauta i le va o le tatou Ofisa Medicaid iinei ma le Ofisa Ulu o le tautua lea, ina ia mae'a pasia mea uma a'o le'i amata ona fa'agasolo nai o tatou pelega i Niu Sila."

 

Ua le tamau fo'i se falema'i e mafai ona fa'aaoga i ai le Medicaid i Niu Sila mo togafitiga po'o siakiga, ua maua lava so'o se avanoa i so'o se falema'i, peita'i e lua falema'i sa ia fa'ailoa mai e matua lalamua i le tulaga pasia lelei lana auaunaga, o le Mercy Ascot ma le Braemer Hospital i le a'ai o Aukilani.

 

O le polokalama lenei o le Medicaid o se tapenga tau tupe e mafai ona toe totogia mai ai lau tupe fa'aalu i au pili talavai, ae le mafai ona e alu atu e totogi sa'o ai lau talavai.

Comment Here