Ua i luma nei o le Vaega Iloilo o le Fa’amasinoga Maualuga a Amerika Samoa le tali a Rev. Amaama Tofaeono, tauala atu i lana loia fautua ia Charles Alailima, fa’asaga i le talosaga a le Laulauafono a le Ekalesia Aoao a le EFKAS fa’apea ai ma le Komiti a le Au Toeaiina, ina ia fa’aleaoga lana tagi lea ua tu’uina atu e talosagaina ai se poloaiga a le fa’amasinoga e fa’atulaga loa se iloiloga e saili ai le moni o mau a le Ekalesia fa’asaga ia te ia.

Na taua e Rev. Amaama i lana tali e fa’apea, o le autu o le talosaga ua tuuina atu e le Ekalesia Aoao i le fa’amasinoga, ina ia taofia ai le fa’amasinoga mai lona iloiloina ma le toto’a o le mataupu lea na fa’avae ai le latou fa’aiuga fa’asaga ia te ia.

E le gata i lea, ua taumafai fo’i sui ta’itasi o le Ekalesia ina ia taofia le fa’amasinoga, mai lona iloiloina o fa’amaumauga a le Ekalesia ina ia manino ai, poo i ai i le Komiti a le Au Toeaiina le malosi o loo i le Laulauafono a le Ekalesia Aoao e faia ai le fa’aiuga e pei ona faia ia Rev. Amaama, atoa ai ma le taumafai ina ia alo mai le tagi lea ua fa’aulu fa’asaga ia te i latou, ona o tu’uaiga ua ta’uvalea ai le igoa o Rev. Amaama.

O se tasi o fa’afinauga a le itu tagi, e leai se malosi o le fa’amasinoga i lalo o le tulafono na te ilolioina ai mataupu e fitoitonu lava i le Ekalesia ma ana faiga fa’avae.

E talitonu Rev. Amaama e pei ona taua i se vaega o lana tali, e le tatau i le Ekalesia ona latou finau i le fa’amasinoga e fa’aleaoga lana talosaga mo se iloiloga autu o lenei mataupu, ona o i latou lea na taulamua i le mataupu atoa lenei, ina ua latou faila le tagi i le fa’amasinoga mo se poloaiga e fa’atula’i ese ai o ia mai le maota o le galuega.

“E tatau ona avea pea le fa’amasinoga ma vaega tumaoti i le taimi e finauina ai aia i va o  ni itu se lua, i le taimi e tula’i mai ai ni fetena’iga. I le avea ai la ma vaega tumaoti, e tatau i le fa’amasinoga ona matua iloilo mae’ae’a fa’amatalaga uma e tu’uina atu e itu e lua, ina ia mautinoa ai e mae’a le fa’atinoina o lana galuega”, o se vaega lea o le tali a Rev. Amaama.

O lo o taua atili fo’i i le tali a le itu tete’e e fa’apea, ina ua faila e le Ekalesia le talosaga e fa’atula’i ese ai Rev. Amaama, pau le malosi o le fa’amasinoga e tatau ona o o i ai, o le tula’i mai lea e pei o se tasi na te fa’amalosia le fa’aiuga a le Komiti a le Au Toeaiina, ma, afai e talitonu le fa’amasinoga e pau lea o le tulaga e oo i ai lona malosi, o le mea mautinoa ua soli e le fa’amasinoga vaega o le Fa’avae a le malo tele o Amerika ma Amerika Samoa i tulaga o le fa’atula’iina o tapuaiga.

E talitonu Rev. Amaama, e le tatau i le fa’amasinoga ona ia faia lea tulaga, e ala i le musu e iloilo toto’a mau fa’amaonia uma o lo o siomia ai le fa’aiuga lea ua faia e fa’atula’i ese ai o ia mai le tofiga o le Failautusi Aoao o le Ekalesia.

O se tasi o fa’afinauga a le itu tagi, o lo o i ai i vaega o le Fa’avae a le Ekalesia tulaga e le mafai ai ona iloilo tulaga ma fa’aiuga e tu’uina atu e le Ekalesia i ana Faifeau, peita’i na taua e Rev. Amaama i lana tali e fa’apea, e le o le autu o le tagi o le fesiligia lea o le fa’aiuga ua faia ia te ia, ae o le autu atoa o le tagi, poo ai e i ai le malosi e faia ai le fa’aiuga e aveese le tofi o le faifeau fa’au’u atoa ai ma le tofi o le Failautusi Aoao mai ia te ia.

E talitonu Rev. Amaama, e na o le Ekalesia Aoao i le taimi o lana fonotele e i ai le malosi e faia ai fa’aiuga fa’apenei, ae le mafai e le Komiti a le Au Toeaiina.

Na toe faapupula e le itu tete’e e fa’apea, o le Ekalesia Aoao i lana Fonotele na filifilia ai Rev. Amaama e avea ma Failautusi Aoao mo le 4 tausaga. Afai la e talitonu le fa’amasingoa e le mafai e le Komiti a le Au Toeaiina ona faia le fa’aiuga e aveese ai le tofi o le faifeau fa’au’u ma le Failautusi Aoao mai ia Rev. Amaama, lona uiga e le tatau ona taliaina le talosaga a le itu tagi ina ia fa’aleaoga lana talosaga.

O se tasi o itu o lo o fa’amamafa e Rev. Amaama i lana tali, o mau na fa’avae ai le fa’aiuga a le Au Toeaiina e fa’amalolo o ia mai le tofi, fa’avae mai lea i le molimau sa tu’uina atu e Rev. Fa’aeteete Saifoloi, o se totino o le Komiti a le Au Toeaiina.

E talitonu le itu tete’e, o fa’amatalaga sa faia e Rev. Saifoloi, e le gata ua ta’uleagaina ai lona igoa ta’uleleia, ae matua leai lava ni fa’avae e lagolagoina ai ma fa’amaonia.

E talitonu atili le itu tete’e e fa’apea, ua a’afia le Ekalesia Aoao ona o gaioiga ua faia e le Komiti a le Au Toeaiina, ni isi o Toeaiina fa’apea ai tagata Ekalesia, e ala i lo latou sopo atu i le tulaga e le tatau ona oo i ai lo latou malosi.

O lo o taumafai pea le itu tete’e i se auala fa’aeteete e sailia ai i latou sa faia fa’amatalaga le moni ma le tau fa’aleaga, lea ua mafua ai lenei mataupu, ina ia taofia ai le a’afia atu ai fua o ni isi o le Au Toeaiina ma tagata lotu e le o i ai so latou a’afiaga i lenei mataupu, ae ua ta’ita’i seseina atu ai fua ma i latou.

I le fa’aiuga o le tali a le itu tete’e, ua talosagaina ai le fa’amasinoga ina ia teena le talosaga a le Ekalesia e fa’aleaogaina ai lana tagi ua fa’aulu i luma o le fa’amasinoga.