Tali le LBJ fa’asea i le umi ona fa’atali i le ‘ER’


Dr. Iotamo Saleapaga mai le Falema’i o le LBJ. [ata: FS]
fili@samoanews.com

I le iloiloga a le Maota Maualuga sa faia i le aso Lua o le vaiaso lenei, sa fa’amanino ai e sui sini o le falema’i o le LBJ le mafuaga e tumu ai le Emergency Room, ‘ER’, i nisi o aso, ae le fa’apea o aso uma.

 

O lenei mataupu na laga e nisi o afioga i senetoa i le vaiaso ua te’a ona sa latou vaaia le tumutumu o le ER ae umu foi le taimi o fa’atalitali le mamalu o le atunu’u, e fia vaaia le foma’i ona o gasegase o le tino.

 

Ae peitai, ua maua e nisi o senetoa fa’amatalaga e fa’apea e o o atu i le lima itula o fa’atali nisi o le atunu’u. Sa maua foi e le Samoa News fa’amatalaga mai nisi o le atunu’u faapea e taunu’u i le 8a.m. i le taeao i le ER ae fa’atoa maua le avanoa i le afiafi e vaai ai le foma’i.

 

O le iloiloga a le komiti a le Maota Maualuga sa ta’itaia e le afioga ia senetoa, Nuanuaolefeagaiga Saoluaga T. Nua, o ia foi lea o le sui taitai o le Komiti o le Soifua Maloloina a le Maota Maualuga.

 

O le susuga ia Dr. Iotamo Saleapaga mai le LBJ sa tuuina atu i afioga i senetoa se fa’amalamalamaga o lenei mataupu i le fa’asea ai o le mamalu lautele o le atunu’u, fa’apea afioga i senetoa, ona o le umi o le taimi e fa’atali ai tagata i le ER.

 

“So’o se taimi e tupu ai se fa’ama’i pipisi, e pei o le Dengue, po o le Zika, po o le misela, po o le chicken-box, o le taimi tonu lea e toatele ai i latou e o atu i le ER,” o le saunoaga lea a Dr. Saleapaga e uiga i lenei mataupu. “Pei lava o le ER lea e tele i ai fa’asea a le toatele o le atunuu, fa’apea foi afioga i senetoa.”

 

“E le tali ese matou, le susuga i le CEO ma le falema’i. E sa’o,” o sana upu fa’aopoopo lea.

 

“Ae o taimi fa’apenei, e tatau ai ona lava le onosa’i a le atunuu. Aua o taimi fa’apenei e tumu ai le ER, e le gata i totonu o le mea la e fa’atali ai, ae o fafo,” o se fa’amalamalamaga lea a Dr. Saleapaga.

 

Sa ia saunoa fo’i e fa’apea atonu e i ai nisi o afioga i senetoa, e oo atu i le LBJ e tui le toto i le taeao, e i ai aso e o o atu ai e leai nisi i le ER.

 

O le mea lea, “e fa’amoemoe lava i aluga o le namu lea e talanoa ai tatou, i le dengue. A fa’apea e tele ni tagata ua afaina i lea aso, pe lua ni aso soso’o, ona outou vaai lea i le toatele o tagata ua o o atu i le ER. E le tali ese la i le mea lena,” o a Dr. Saleapaga lea.

 

“Ae e le fa’apea la o aso uma o le tausaga e lima ai itula e fa’atali ai le ma’i. Ae so’o se taimi lava e i ai se fa’ama’i pipisi e i ai le taimi e o o ai le ER ua tumu,” o se toe fa’aopoopo lea a Dr. Saleapaga i lea mataupu.

Comment Here