Tali le Kovana i fa’asea mai le aufai pisinisi fa’asaga i le malo


[ata: SN]
ausage@samoanews.com

Na fa’aaoga e le ali’i kovana ia Lolo Matalasi Moliga i le fonotaga ma lana Kapeneta i le masina na te’a nei, e fa’aleo ai lana tali fa’asaga i fa’asea mai ni isi o le aufai pisinisi, lea o lo o tu’uaia ai le soona fa’a faigaluega e le malo o tagata faigaluega, ae le o lava ni tupe a le malo e totogi ai tagata faigaluega.

 

Ona o lea tulaga ua manatu ai loa ni isi o le aufai pisinisi, ua avea le to’atele naua o tagata faigaluega ua faa faigaluega e le malo ma auala ua manaomia ai e le malo ni tupe se tele, ma i’u ina latou fuafua ai loa e si’i maualuga lafoga i oloa mo le aufai pisinisi.

 

Saunoa Lolo e fa’apea, o le tiute o le malo o le fa’a faigaluega o tagata o le atunu’u. E leai fo’i se Kovana e nofo i le nofoa o le ta’ita’i ae le mana’o e tatala le avanoa e maua ai e tagata o le atunu’u ni galuega.

 

“Afai e i ai se kovana e sau i le nofoa ae le mana’o e fa’a faigaluega ni tagata se to’atele i le malo, e sili ai pe a toe fo’i i lona aiga e fai se isi galuega aoga,” o le saunoaga lea a le ali’i kovana i luma o le Kapeneta.

 

Saunoa Lolo e fa’apea, e tatau ona silafia e le aufaipisinisi atoa ai ma le atunu’u atoa, o lo o galulue malosi pea lava le malo e saili tupe e tautua ai le atunu’u.

 

“O le itu taua o lo o maua avanoa e fa’a faigaluega ai tagata ina ia maua tupe e tausi ai o latou aiga. O le mafua’aga lena e tiga lava ona soona fa’a faigaluega tagata a le Fono Faitulafono, ae le afaina lea tulaga, o le itu taua o lo o fa’a faigaluega nai o tatou tagata,” o le saunoaga lea a Lolo na tali e ai isi sui o le Kapeneta.

 

O le mataupu e fa’atatau i fa’asea mai pisinisi e fa’atatau i le soona fa’a faigaluegaina o tagata faigaluega e le malo, na aofia i le saunoaga a le kovana e fa’atatau i taumafaiga a le malo o lo o faia, ina ia si’itia ai le va feagai ma pisinisi aemaise ai isi vaega tumaoti a le malo.

 

Na fa’afetaia e le Kovana le ituaiga faiga malo o lo o i ai Amerika Samoa, le Faigamalo Faatemokarasi, e le gata e mafai ai e soo se tasi ona malamalama i gaioiga ma taualumaga a le malo o lo o fa’atautaia, ae faigofie ai fo’i ona amanaia aia tatau o tagata taitasi.

 

Sa ia fa’ailoa i lana Kapeneta le mafua’aga e ala ai ona i ai lana polokalame faapitoa, lea e tatala ai le avanoa i le au fa’asalalau ina ia oo atu e auai i fonotaga a le Kapeneta, ina ia mafai ai ona latou fa’asalalau ma ripoti atu i fafo mea o lo o tutupu i totonu o le faigamalo.

 

Saunoa Lolo e fa’apea, e taua tele le tulaga lea i soo se faigamalo Faa Temokarasi, e le gata e fetufaa’i ai manatu o ta’ita’i, ae silafia ai e le atunu’u lautele mea o lo o tutupu i le malo.

 

Sa ia fautuaina lana Kapeneta ina ia fa’aauau pea ona galulue fa’atasi ma le aufai pisinisi, ona o i latou lea le isi vaega o le faigamalo fa’a Temokarasi, e amanaia fo’i la latou sao i soo se itu o le atina’e o le malo.

 

Sa ia taua atili e fa’apea, soo se faigamalo lava e lelei ma mautu lona atina’e, e mafua mai ona o lo o lagolago malosi atu i ai le aufai pisinisi .

Comment Here