Talanoa le ali’i kovana i atina’e o lo o fa’agasolo a le malo

ausage@samoanews.com

E ui i le tau fa’asoasoa o tupe maua a le faigamalo e fa’atino ai ana auaunaga masani, peita’i na taua e le afioga i le ali’i Kovana ia Lolo Matalasi Moliga i le fonotaga ma lana Kapeneta i le 2 vaiaso talu ai, e le avea le tau fa’asoasoa o tupe maua ma auala e taofia ai le fa’aauauina pea lea o le tautua a le malo, e ala i le fausia lea o atina’e tetele e tua i ai le atunu’u i le lumana’i.

 

O ni isi o ia atina’e e aofia ai aualatele a le malo o lo o fegasoloa’i ai le mamalu o le atunu’u i aso ta’itasi, fa’apea ai fale e pei o faleaoga ma ofisa o lo o tautuaina ai fanau ma tagata faigaluega.

 

I le taimi o lana saunoaga i luma o le Kapeneta, na fa’ailoa ai e Lolo ni isi o galuega tetele o lo o fa’agasolo i le taimi, lea e aofia ai le Maota fou o le Fono Faitulafono, o le Ofisa fou o le Fale Mata’aga i Fagatogo, ma le toe fa’afouina o le Ofisa o Leoleo lea na fa’atamaia i le afi i le 2 vaiaso talu ai.

 

“Ua tatou iloa uma lava e le o tele ni tupe a le malo o i ai, e le o i ai fo’i ni a tatou miliona o fa’aagaga e fausia ai atina’e tetele fa’apenei, peita’i o le meaalofa ua aumai e le Atua ia te i tatou, e mafai ai ona tatou fetuuna’i mafaufauga lelei i auala e maua mai ai tupe e fa’atino ai a tatou atina’e mo le atunu’u,” o le saunoaga lea a Lolo.

 

Mo le galuega o le maota fono, e 3 alagatupe na taua e le Kovaa o lo o fa’amoemoe e fa’atupe ai lenei galuega. O le tupe mai le aitalafu o le Pone, o le tupe o lo o fa’atalosaga i le Initeria mo se fesoasoani, atoa ai ma le tupe e saili lava e le Fono e fa’amae’a ai le galuega.

 

Na taua e le ali’i Kovana le oo i le taimi ua tatau ai ona fausia se maota fono fou a le atunu’u, ina ia mafai ai ona si’itia tulaga o auaunaga ma tautua a le malo.

 

Mo le ofisa fou o le Fale Mataaga i Fagatogo, le Museum, o se tasi lenei o galuega na taua e le Kovana ua leva na tatau ona fausia. E ui e le o lava se tupe o i ai, ae talitonu lona taofi e mafai ona fausia ma fa’amae’a lenei galuega e ala i le galulue fa’atasi a le malo atoa.

 

Sa ia talosagaina afioga i Fa’atonusili ina ia sema so latou taimi atoa ai ma ni nai vaega tupe o lo o totoe mai a latou galuega fa’asoasoa, e fesoasoani ai i le tau amataina o le galuega mo le fausiaina lea o le ofisa fou mo le Fale Mataaga a le atunu’u.

 

Mo le galuega o le toe fa’afouina o le ofisa o Leoleo lea na fa’atamaia i le afi, na saunoa ai le ali’i Kovana e fa’apea, e ui e leai se fuafuaga a le malo mo se galuega e fa’afou ai le ofisa o Leoleo i se taimi vave, ae ua avea le afi lea na afaina ai le Ofisa i le 2 vaiaso talu ai ma auala ua alaga tatau ai ona fa’atino se galuega mo le toe fa’afouina o le Ofisa o Leoleo.

 

“E le tatau ona tatou tuua ai fa’apea le Ofisa o Leoleo e aunoa ma se galuega e faia i ai, e tatau ona fa’agasolo galuega mo le fa’afouina o le Fale Leoleo, ona o se tasi lenei o Ofisa e sili ona taua lana auaunaga i le atunu’u. E tatau ona tatou galulue e fesoasoani i le fa’atinoina o lenei galuega, ina ia vave ona mae’a ma fa’atino loa galuega a ali’i ma tama’ita’i Leoleo,” o le saunoaga lea a le ali’i kovana.

 

E o o mai lava i le taimi nei o lo o fa’agasolo pea suesuega a le Ofisa o Leoleo i le mafua’aga o le afi na fa’atamaia ai se vaega o le Ofisa i le 2 vaiaso talu ai. E ui e le i mafai ona fa’amaonia mai e le Komesina i le Samoa News, ae o ripoti na oo mai i le Samoa News na taua ai e ni isi o molimau e fa’apea, o le potu na a’afia i le afi, o le potu lea o lo o teuina ai mau fa’amaonia o mataupu tau solitulafono a le malo.

 

Na taua e se tasi o Leoleo Litaea i le Samoa News e fa’apea, o popolega i lenei mataupu, ina ne’i avea le afi lenei ma auala e emo ane ai ua i ai mataupu o le a solofua ma fa’aleaoga e le fa’amasinoga, ona ua fa’aleagaina mau fa’amaonia i le afi.

 

O lo o fa’aaoga e le Ofisa o Leoleo le isi vaega o le maota o le Lumana’i Building mo se taimi le tumau, e fa’atalitali ai galuega fa’afou o lo o fa’agasolo i le ofisa autu na fa’aleagaina i le afi.

Comment Here