Ads by Google Ads by Google

Tala Vaifanua


O se va’aiga i le ‘au Volleyball na masii mai i Samoa mo le ta’amilosaga o lo’o fa’atautaia a le Samoa Volleyball Challenge ma e fa’amae’a lelei nei ta’aloga uma i le Aso Lulu a sau nei, a’o le’i toe tu’uva’a ese ato lenei ‘au mai o tatou laufanua. [ata: Leua Aiono Frost].

O se tasi lea o ‘au ua maimoaina fo’i le malosi o lona tula’i mai i le fa’agatama o le Volleyball, ma e lua lava latou malo soso’o i le ‘au a le God is Great mai Faleniu i le amataga o le Liki lea. [ata: Leua Aiono Frost]

O se va’aiga i nisi o alo o Samoa na lua o lo’o tautua nei i le Laumua ma sa auai fo’i e fa’atino tiute ma tofiga a’o fa’atautaia mea uma na tapena e le Malo tele o Amerika mo le fa’au’uga o le latou Peresetene fou - Pres. Trump ia Januari 20, 2017. [ata: foai]

TATALA ALOA’IA SAMOA VOLLEYBALL CHALLENGE

 

I le afiafi o le aso Faraile ua te’a na amatalia ai Liki a le Volleyball Challenge i le ta’aloga faitaulia i le va o Pavaiai ma le God is Great mai Faleniu. E lua seti o malo pea lava Pavaiai ma ua se’e loa Pavaivai e fa’atalia se isi ‘au la te toe ta’a’alo, ae amatalia le fetauiga a le Laumuatasi mai Pago Pago ma le God is Great.

 

I lea ta’aloga na toe manumalo fo’i le Laumuatasi i ta’aloga e lua, ma sa faamanuiaina ai le taumafaiga a tama o le taulaga. Soso’o lea ma le ta’aloga faitaulia i le va o le Mizuno ma le Samoa All Stars, manumalo fo’i le Mizuno i nei ta’aloga e lua.

 

O le ta’aloga amata foi e na fa’atulaga e amatalia ai ta’aloga a le Itupa o Alii matutua sa tatala malae ai le Savaii /Samoa 2 Team ma le Mizuno. E lima ta’aloga sa tatau ona fa’amae’a lelei mo lea po e le komiti mamalu, ma e atoa i ai le valu o ta’aloga na fa’atulaga e fa’atautaia mo lea lava ulua’i feiloa’iga o le Samoa Volleyball Challenge.

 

I lona aso lona lua na fa’atulaga ai le 15 o ta’aloga faitaulia, ma le isi lua e sailia ai le siamupini mo ‘au volipolo i tama talavou U19.

 

O lo ua tumau lea fa’atautaia o nei ta’aloga uma i le afiafi o aso ta’itasi o le vaiaso lenei i le afiafi o le aso Lulu, lea e fa’amoemoe e taua’aoina ai fa’ailoga ma toe tapunia ai lea Liki Volleyball.

 

Pe afai ae mae’a lenei fa’amoemoe, ua fa’ailoa mai, ona amatalia lea o le liki tele e saili ai siamupini o le Volleyball a le tatou atunu’u, e fa’amoemoe e fa’amae’a lelei lava i le vaitau o le Sisigafu’a 2017 ia Aperila.

 

O le totogi o lo’o ua tuuina mai e fesoasoani i le Asosi Volipolo Amerika Samoa mo le totogia lea o le malade i Samoana e $3 i le tagala matua, ae o le fanauiti e ta’i $2.

 

Valaau atu i le pa’ia o le atunu’u e fia maimoaina nei ta’aloga matagofie ma le tauivi, ina ia auai ane e maimoa ma sapaia le fa’amoemoe o tatou fanau ia fa’aleleia atili o latou tomai i lea fo’i fa’agatama.

 

O le a maua i’uga o ta’aloga sa faia i le aso To’ona’i i se tatou tala o le lomiga a taeao ma fa’ailoa atu ai nisi o tama ta’a’alo i lenei liki. O lo ua fa’ailoa mai, sa tapena fo’i le tatou Asosi mo ni ‘au a tama’ita’i e masi’i mai Samoa, peita’i, ua leia, ona sauna lava lea o i latou mo ta’aloga a ‘au a tama’ita’i mai le tatou lava motu nei.

 

TAUTUA ALO O SAMOA FAAUUGA PERESITENE TRUMP

 

I le laumua o Uosigitone DC na fa’atautaia ai le fa’atautoga ma le fa’au’uga o le Peresetene lona 45 o Ie Iunaite Setete o Amerika, ua matila a’e ai le tautua a nisi o alo o le atunu’u i le mau mea na fa’ailo ai lea aso iloga ia Amerika.

 

O nisi o alo o le atunu’u sa tautua i ona vaega eseese e aofia ai nisi o i latou e tautua i le vaega au, ae maise i le US Army lea na tula’i mai ai MSG Amasaia McKay Pousima mai le afio’aga o Afonotele. Na maua se ala o feso’ota’iga mai lea fitafita ma ua ia fa’ailoa mai ai, “Ou te fa’afetaia fo’i lenei avanoa ua fa’atino ai tiute i totonu o le Laumua, ae feagai fo’i ma le fa’au’uga o le peresetene o le Iunaite Setete o Amerika, ua fa’aaoga ai fo’i nisi o i matou o fanau mai Amerika Samoa. O le vi’iga ma le fa’afetai e sii i le Atua i nei fa’aeaga.”

 

Na fa’au’u mai Pousima i le Samoana High i le tausaga 1995 ma ulufale atu i le US Amry i lona 18 o ona tausaga. Sa ia tau’avea fo’i ma ana a’oa’oga mo ona fa’ailoga maualuluga mai le Ashford University ma ua fa’amau ai lona fa’ailoga BA Social & Criminal Justice ma ua fa’asolo ina sailia lona Masters i le Homeland Security & Emergency Management i Excelsior College.

 

Ua atoa lelei le 21 tausaga o lana tautua i le Army, ma e tele fo’i ona tiute ua tofia ai o ia e fa’atino, i totonu o le Laumua i Uosigitone DC.

 

O ia o se alo e a’asino ia Amasaia Sr ma Valo Pousam o Afonotele, ma ua fa’aipoipo atu o ia i le tama’ita’i o Maupua U. Pulou, o se alo e fa’asino ia Fa’asou Fetineia’i ma Poulele Malaepeai Pulou o Tula. Ua to’atolu o la’a alo: Amasaia C.Jr, Mika Nicholas ma Princess  Amariah Sailelagi Pousima.

 

Mai le vaega a el USMarine Corps ua tula’i mai foi le fitafita talavou o Cpl Ashton Silila, e tupuga mai Fagaitua, i le leoleoina mautu o le Laumua i Uosigitone DC ao fa’atautaia le Savali Fa’aaloalo o le fa’auuga o Peresetene Trump.