Tala otooto o le Fono Faitulafono


[ata: SN]
ausage@samoanews.com

FESILIGIA PEA E FAIPULE TULAGA I TOTOGI O UTA MO MANU’A

 

E le o nofo filemu afioga i ali’i faipule mai Manu’a i lo latou finauina pea lea o le mataupu e fa’atatau i le maualuga o le tulaga ua i ai le totogi o uta ma pasese mo Manu’a.

 

Ona o lea tulaga, na taua ai e le sui fofoga fetalai ia Fetu Fetui Jr le mae’a lea ona ia tuuina atu se tusi i le Faatonusili o Pulega o Taulaga ma Malaevaalele, ina ia toe silasila toto’a i tulaga o totogi o uta ma pasese mo Manu’a ua latou fa’atulaga.

 

O le agaga atoa o le tusi e pei ona fa’ailoa e Fetu i luma o le maota o sui i le vaiaso na te’a nei, o le taumafai lea e fa’asa’o totogi o uta ma pasese.

 

O le fa’ateia o le afioga i le Fofoga Fetalai ia Savali Talavou Ale i le tusi ua auina atu i le Fa’atonusili o Taulaga ma Malaevaalele e fa’atatau i totogi o uta mo Manu’a, na mafua ai ona ia saunoa e fa’apea, e le talafeagai le fa’aiuga ua faia, o le auina atu o le tusi e aunoa ma lona silafia.

 

Saunoa atili Savali e fa’apea, e le mafai ona soona auina atu se tusi i soo se vaega o le malo e aunoa ma le saini o le Fofoga Fetalai.

 

Na toe fa’amalulu Fetu ma ia fa’amanino e fa’apea, o le taimi sa auina atu i le taimi ao toesea ai le Fofoga Fetalai i fonotaga i fafo.

 

Ae i le aso Faraile na te’a nei, na toe tula’i ai le sui fofoga fetalai, ma ia fa’alauiloa i luma o le maota le tala fiafia ua tuuina mai e le Ofisa o Pulega o Taulaga ma Malaevaalele, ua fa’aitiitia le tau o totogi mo uta ma pasese i Manu’a.

 

POPOLE FAIPULE I LE SAOGLEMU O LE ATUNU’U

 

O folafolaga a le Ta’ita’i o le malo o Kolea i Matu e pei ona fa’asalalauina i luga o ala ata fa’asalalau a le lalolagi i le vaiaso na te’a nei, e fa’atatau i le ono tafana mai lea o ni a latou mea tau fa’atonutonu alu mamao i ogasami o le Pasefika, ua fa’aalia ai e ni isi o afioga i Faipule i le vaiaso na te’a nei le popole ma le fefe, ina ne’i a’afia atu ai ma le saogalemu o si o tatou atunu’u.

 

Na taua e le afioga i le ali’i Faipule ia Vailoata E. Amituana’i e faapea, e foliga mai i lana vaavaai atu i teritori uma o lo o i lalo o le vaavaaiga a le malo tele i le Pasefika, ua vaaia le tapenapena uma o i latou i soo se taimi e tula’i mai ai se fa’aletonu i le lumana’i, ae foliga mai lava e le o i ai ma se tapenaga a Amerika Samoa e fa’atatau i lenei mataupu.

 

Saunoa atili Vailoata e fa’apea, ua ia fa’alogo ua mae’a ona tusi le kovana o le atunu’u, le tofa Lolo M. Moliga i ta’ita’i o le malo tele e tusa ai o lenei mataupu, ae fia malamalama lava lona sui i se tapenaga a Amerika Samoa lava ia ua faia.

 

O lona popolega o lo o i ai, ina ne’i manatu mama Amerika Samoa i lenei mataupu ae avea ma auala e ono lamatia ai le saogalemu o le atunu’u i le lumana’i.

 

Na tula’i le afioga i le sui fofoga fetalai ia Fetu Fetui Jr ma ia lagolagoina le finagalo o Vailoata, ona o le taumafai lea ina ia puipuia le saogalemu o le atunu’u.

 

Saunoa le ali’i faipule mai Manu’a e fa’apea, e lagona fo’i e lona sui le popole ona o fa’aupuga ua felavasa’i solo a le ta’ita’i o Kolea i Matu fa’asaga ia Amerika, ae ana au lona malosi e ave ai sana tusi i le ali’i peresetene o Amerika, semanu e fautua i ai e fana loa le peresetene o Kolea i Matu ma le fa’alavelave soo.

 

E ui fa’aataata lafoga le saunoaga a le ali’i faipule, ae sa ia taua atili le avea o lenei mataupu ma mataupu o lo o mamafa i lona loto, ona o le popole lava i le saogalemu o le atunu’u.

 

I le mae’a ai o saunoaga a afioga i ali’i faipule, sa la talosagaina ai loa le faia o se iloiloga ma Ta’ita’i o Ofisa eseese a le malo o lo o galulue i le fa’amalosiga o tulafono, mo sa latou molimau e tusa ai o lenei mataupu.

 

FINAU TOEAINA VAVE NOFOIA SUAFA MATAI AFIOGA E LE O NOFOIA

 

E talitonu le afioga i le ali’i faipule ia Toeaina Faufano Autele e fa’apea, e mafua ona tupu ola ola fualaau fa’asaina i ni isi o afioaga i le atunu’u, ona e le o nofoia le tele o suafa matai maualuluga latou te faia fa’aiuga ma pulega e fa’asala ai i latou o lo o faia nei uiga fa’asolitulafono.

 

Ona o lea tulaga, sa ia fa’ailoa ai i luma o le maota o sui i le vaiaso na te’a nei sana fuafuaga o lo o i ai, i lona fuafua lea e malaga atu e talanoa ma le Ta’ita’i o Fa’amasino Lagolago i le Fa’amasinoga a Amerika Samoa, mo le tuuina atu o sana fautuaga i auala e fa’a natinati ai a latou fa’aiuga i le tele o mataupu e aiga e fa’atatau i suafa matai o lo o taatitia pea lava i luma o le fa’amasinoga i le taimi nei.

 

Na lagolagoina e le fofoga fetalai ia Savali Talavou Ale le taua o le agaga o le fautuaga, i se auala e fa’aitiitia ai le fa’atupulaia o fualaau fa’asaina i le atunu’u. Pau lona fa’aeteetega, ona e le i fai mai le Fa’amasinoga e avatu mataupu o suafa matai a aiga latou te iloiloina, ae ua mafua ona o aiga lava o le atunu’u.

 

Saunoa Savali e fa’apea, e tele nauamataupu i suafa o matai o aiga o lo o taoto i le fa’amasinoga i le taimi nei.

Comment Here