Ads by Google Ads by Google

Tala otooto o Fa’amasinoga


[ata: SN]
ausage@samoanews.com

FELISE MAPUSAGA

 

O le vaiaso fou lea ua fa’amoemoe le malo e tatau ona oo atu i ai ua mae’a a latou suesuega o lo o fa’agasolo i le mataupu a Felise Mapusaga, ma iloa ai loa pe i ai ni moliaga faaopoopo e ono faila faasaga ia te ia.

 

O le taeao ananafi na tula’i ai Mapusaga i luma o le fa’amasinoga faaitumalo, ma ia teena ai le moliaga mama o le faatupu vevesi i nofoaga faitele faasaga ia te ia.

 

O Mapusaga na taofia mai e Leoleo i Mapusaga Fou i le vaiaso nei, ona o tu’uaiga i lona taumafai lea e faia ni uiga mataga i se tama’ita’i e talavou i lalo o le tulafono. O lo o teena malosi e Mapusaga tu’uaiga fa’asaga ia te ia.

 

O se tauga upu na tula’i mai i le va o Mapusaga ma le uncle o le tama’ita’i o lo o tu’uaia na a’afia i lenei mataupu, na mafua ai loa ona vili e aiga tuaoi Leoleo mo se fesoasoani, ma taofia faapagota ai loa le ua molia, i le mae’a ai lea ona ia lafo o ni upu tau fa’amata’u i le uncle o le tama’ita’i o lo o tu’uaia na a’afia.

 

Na taua e se molimau i Leoleo e fa’apea, o lo o masalomia e lo latou aiga le ulufale faamalosi atu o Mapusaga i totonu o le latou fale i le po o le aso Gafua na te’a nei, ma ia tagofia itutinosa o le tama’ita’i na a’afia, ao moe o ia i totonu o le potu.

 

Na faailoa e le tama’ita’i na a’afia i Leoleo e fa’apea, na te le iloaina foliga o le tagata na tago atu ia te ia, pau le tulaga o loo ia manatua, o le tagata e uumi lona lauulu toe lapo’a. O le ali’i o Mapusaga e tino laititi toe pupu’u lona ulu.

 

O lo o tumau pea tuutuuga o loo tatala ai Mapusaga i tua mai le toese i Tafuna e fa’atali ai suesuega a le malo o loo fa’agasolo fa’asaga i lenei mataupu.

 

NATHAN TUPUTALA

 

E 12 masina lea ua nofovaavaaia ai se ali’i e 26 tausaga le matua, ina ua faamaonia e le Fa’amasinoga Fa’aitumalo le moliaga o le gaoi sa tu’uaia ai o ia e le malo. Na ulua’i tu’uaia e le malo ia Nathan Tuputala i moliaga mama e 3, e aofia ai le faatupu vevesi i nofoaga faitele, faaleaga meatotino atoa ai ma le gaoi.

 

I lalo o se maliliega na sainia e le ua molia ma le malo, na ia malie ai e tali ioe i le moliaga mama o le gaoi, ae solofua e le Fa’amasinoga isi moliaga mama e 2 o lo o totoe ai i le pepa o le tagi sa faila e le malo fa’asaga ia te ia.

 

I le tali ioe ai o Tuputala i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le aso 02 Tesema o le tausaga na tea nei, na ia ave faagaoi ai ni meatotino mai se faleoloa i Tafuna, i le mae’a ai lea ona ia faaleagaina le faitoto’a o le faleoloa, atoa ai ma lona fa’atupu o se vevesi ina ua musu le fa’atauoloa e fa’ataga le fa’atauina o ana fagupia ina ua maitauina le ova o lona ‘ona i le taimi na ia ulufale atu ai i totonu o le faleoloa.

 

O oloa na ave faagaoi e le ua molia e aofia ai apa meaai, pepa sikaleti ma se fagupia se tasi.

 

O ni isi o tuutuuga o le nofovaavaaia e 12 masina a Tuputala, e aofia ai le faasa lea ona ia toe alu i le faleoloa na tula’i mai ai le fa’alavelave. Ua poloaina fo’i o ia e totogi le salatupe e $125, ma toe totogi le tupe e $53 mo le tau o oloa sa ia ave faagaoi.