Tala Otooto o Fa’amasinoga


[ata: SN]
ausage@samoanews.com

ELLIOTT SIAUMAU JR

 

Ua toe aafia fo’i le alii’ o Elliott Siaumau Jr i le tulafono, i le mae’a ai lea o se fa’alavealve lea na tula’i mai i le vaiaso na te’a nei, lea o lo o tuuaia ai o ia i lona aveese mai lea o lona atali’i ao i lalo o le puipuiga a Leoleo, atoa ai ma lona musu e tu lana ta’avale ina ua taumafai Leoleo e taofi o ia, ma mafua ai loa ona faia a latou tuliga ta’avale ma Leoleo i luga o le alatele.

 

O lo o tu’uaia e le malo ia Siaumau Jr i moliaga mama e fa e aofia ai le fa’atupu vevesi i nofoaga faitele, fa’aoolima i le tulaga tolu, fa’alavelave i galuega a Leoleo, atoa ai ma le sola ese ma Leoleo.

 

Na taua i fa’amaumauga a le fa’amasinoga e fa’apea, o le fa’alavelave e pei ona toe a’afia ai Siaumau Jr na tulai mai i le aso 22 Novema i le aoauli, ina ua vaaia e Leoleo le saoasaoa o le ta’avale a le ua molia i luga o le auala i Puapua, ma latou taumafai ai loa e taofi o ia, peita’i sa fa’aauau pea ona alu saosaoa le ta’avale a le ua molia.

 

O le taimi lea na aiu saosaoa ai le ta’avale a le ua molia i luga o le alatele, o le taimi tonu fo’i lea o lo o taumafai ai Leoleo e fa’afilemu se fusuaga sa tula’i mai i le va o ni tamaiti talavou i le maga tolu e aga’i i le auala i Taputimu.

 

Na aga’i atu le ta’avale a le ua molia i le auala tele i Leone, ma aga’i atu ai i le ofisa o Leoleo i Leone, ma ia aveese mai ai se tamaititi sa taofia ai e Leoleo ona o le taumafai e togafitiona manu’a, ma toe fa’aauau loa ona alu ese lana ta’avale, a o taumafai atu fo’i Leoleo e tuliloa ina ia taofi.

 

Sa i ai se taimi na taofi ai e le ua molia lana ta’avale ina ua taofi e Leoleo, ma fesiligia ai loa o ia i le mafu’aaga o le soona alu saoasaoa o lana ta’avale, ae na tali i ai le ua molia, na alu e aveese mai lona atali’i sa a’afia i le vevesi lea na tula’i mai i Taputimu. Sa ia faailoa atili i Leoleo e faapea, o le a faitalia o ia ma ave lona atali’i i le Falema’i e togafiti ai ona manu’a o lo o i ai.

 

Na toe fa’aauau le alu saoasaoa o le ta’avale a le ua molia, ma aga’i atu ai i Vaitogi. Na maua atu e Leoleo lana ta’avale o lo o fa’a lafi i se pupu vao i Vaitogi. Na aga’i atu Leoleo ma taofia mai le ua molia mai lona fale, ma auina atu loa o ia i le ofisa o suesuega, fa’atoa taofia ai loa o ia i le toese e fa’atlai ai le taimi e tula’i ai i luma o le fa’amasinoga.

 

E $500 le tupe lea ua faatulaga e totogi ona faatoa mafai lea ona tatala le ua molia i tua, e fa’atali ai taualumaga o lana mataupu.

 

FETOAI FALANIKO

 

O le ali’i lea o lo o tu’uaia i le fa’alavelave lea na manu’a tigaina ai se Tina mai Pago Pago i le vaiaso nei, ua tu’uaia nei o ia e le malo i le moliaga mama o le fa’atupu vevesi i nofoaga faitele, ma le fa’amoemoe o le a i ai moliaga mamafa e faila e le malo fa’asaga ia te ia, pe a mae’a suesuega a Leoleo o lo o fa’agasolo i le taimi nei.

 

Na teena e le ali’i o Fetoai Falaniko le moliaga ua tu’uaia ai o ia, ma ua toe taofia nei o ia i le toese ina ua le mafai ona ia totogi le $3,000 ua fa’atulaga e tatala ai o ia, e fa’atali ai lana iloiloga lona lua lea a fa’atulaga i le aso 20 Tesema i le itula e 8:30 i luma o le Fa’amasinoga Fa’aitumalo.

 

Na finau le loia a Falaniko ia Ryan Nelson mo se avanoa e fa’aitiitia ai i le $500 le tupe e tatala ai le ua molia, peita’i na talia e le afioga i le ali’i Fa’amasino ia Fiti Sunia le fa’afinauga a le malo, ina ia fa’atumau pea le tupe ua faatulaga e tatala ai le ua molia i tua, ona o lo o i ai le faamoemoe e faila moliaga faaopoopo faasaga ia te ia.

 

O lo o fuafua le malo e molia le ua molia i moliaga mamafa e lua e aofia ai le fa’aoolima i le tulaga lua, faapea ai ma le moliaga pito sili ona mamafa o le faaoolima i le tulaga muamua, le moliaga e ono mafai ona faasala ai se tasi i le toese mo le olaga atoa, poo le fa’asala mo le umi e le itiiti ofi i le 10 tausaga e le sili atu foi i le 30 tausaga.

 

O le fa’alavelave e pei ona taua i fa’amaumauga a le Fa’amasinoga, na tula’i mai i Pago Pago i le amataga o le vaiaso nei, ina ua so’a e le ta’avale a le ua molia se Tina ma se tamaititi ma manunu’a ai i laua. Na fa’anatinatu uma atu i le falema’i i laua na a’afia, ma taua ai le matuia o manu’a o lo o a’afia ai le Tina, se’i vagana ai le tamaititi sa manu’a mitimiti.

Comment Here