Tala otooto o Fa’amasinoga


[ata: SN]

TU’UAIA SE ALI’I TALAVOU I LE GAOI

 

Ua tu’uaia nei e le malo se ali’i talavou mai Fagaima i le moliaga o le gaoi atoa ai ma le faatupu vevesi i nofoaga faitele, e mafua mai i le fa’alavelave lea ua tu’uaia ai o ia i lona ave fa’agaoi o se katuni sikaleti mai totonu o se faleoloa i Fagaima i le leva o le po.

 

O lenei mataupu na tofu atu i le Ofisa o Leoleo i Tafuna, ina ua talosagaina e le pule o le faleoloa mo se fesoasoani a Leoleo, e fa’atatau i se ali’i talavou na ia gaoia se katuni sikaleti mai totonu o le faleoloa.

 

Na taua e le fa’atauoloa i Leoleo e fa’apea, ina ua alu atu le ali’i o Aleki Fideli i totonu o le faleoloa, sa ia fai i le fa’atauoloa e mana’o i se katuni sikaleti o le Camel. Na tago le fa’atauoloa ma tu’u atu i ai le katuni sikaleti, ona tago lea o Fideli ua tuu le katuni sikaleti i totonu o lana ato fa’afafa.

 

Sa ia toe talosaga i le fa’atauoloa e mana’o i se pusa Vailima lapo’a, ona savali lea o le fa’atauoloa i le pito i tua e aumai le pusa Vailima. E lei oo le fa’atauoloa i le pito i tua o le faleoloa, ae toe fa’asaga mai i tua ua leai se Fideli ae ua alu i le atoa ma ave le katuni sikaleti e lei totogia.

 

E lei toe fa’atali le fa’atauoloa ae sa ia tuliloaina loa le ua molia i le pogisa o le po. O ni isi o tagata o le nu’u o Fagaima na latou vaaia tuliga a le fa’atauoloa ma le ua molia, na tulioso ane ma fesoasoani i le pu’eina o ia, ma mafai ai loa ona maua o ia ma taofia ai loa i totonu o le ta’avale a le fa’atauoloa sa paka i luma o le faleoloa, e fa’atali ai le taimi e taunu’u atu ai Leoleo. Ina ua fesiligia e Leoleo le ua molia, sa lagona le malosi o le manogi ‘ava malosi mai lona tino.

 

Na teena e Fideli moliaga e lua ua tuuaia ai o ia e le malo, ma ua tatalaina nei o ia i tua e aunoa ma se tupe na faatulaga, e faatali ai le aso 15 Tesema lea ua faamoemoe e toe tula’i ai i luma o le Fa’amasinoga Fa’aitumalo.

 

O ni isi o tuutuuga ua tuuina atu e le Fa’amasinoga e usita’i i ai, e aofia ai le fa’asa lea ona ia toe tagofia le ‘ava malosi pe na te tagofia fo’i fualaau fa’asaina, ua fa’asa fo’i ona ia toe alu i le nofoaga o lo o i ai le faleoloa i Fagaima.

 

SIO OLOMALI’I

 

O le ali’i ave pasi lea na masalomia e Leoleo lona umia o fualaau fa’asaina ao fa’atino lana galuega o le tautuaina lea o le mamalu lautele o le atunu’u fegasoloa’i, ua tu’uaia nei o ia i le moliaga mamafa o le umia faasolitulafono o vaega o fualaau fa’asaina o le aisa.

 

O le tu’uaiga fa’asaga ia Sio Olomali’i na afua mai ina ua maua e Leoleo ni ripoti mai ni isi fo’i o ave pasi, e taua ai le masalomia o Olomali’i i lona tagofia o fualaau fa’asaina ao fa’atino lana galuega i luga o le alatele.

 

Ona o puipuiga atoa ai ma le saogalemu o le atunu’u, na talosagaina ai e se molimau se fesoasoani a Leoleo, ina ia suesueina ma fesiligia le ua molia e tusa ai o lenei mataupu. Na aga’i atu Leoleo i luga o le alatele ma molimauina ai le le usita’i o le pasi a le ua molia i tulafono o le alatele, ma mafua ai loa ona taofia lana pasi e Leoleo.

 

I le taimi na fesiligia ma saili ai e Leoleo le tino o le ua molia, na maua i ai se paipa e fa’aaoga e ula ai le pauta o le aisa o loo ia umia. I totonu o lea paipa sa tumu i se vaega o le pauta pa’epa’e. Na faia se suega faapitoa i le pauta pa’epa’e ma iloa ai, o vaega ia o le fualaau fa’asaina o le aisa.

 

E $5,000 lea ua fa’atulaga e totogi ona fa’atoa mafai lea ona tatala le ali’i ave pasi i tua e fa’atali ai taualumaga o lana mataupu. O lo o taofia pea o ia i le toese i Tafuna ina ua le mafai ona ia totogiina le tupe na fa’atulaga e le fa’amasinoga e tatala ai o ia i tua.

Comment Here