Tala Otooto o Fa’amasinoga


[ata: SN]
ausage@samoanews.com

LOMITUSI AFELE

 

Ua tuuaia nei e le fa’amasinoga le ali’i o Lomitusi Afele i le moliaga mamafa o le ave ta’avale a o se’i lona laisene. E ese mai i le moliaga lea, o lo o fa’agasolo fo’i i luma o le fa’amasinoga fa’aitumalo iloiloga o le isi mataupu o lo o faia fa’asaga ia te ia, lea o lo o tu’uaia ai o ia i le moliaga o le fa’aoolima i le tulaga tolu ma le fa’atupu vevesi i nofoaga faitele.

 

O nei mataupu uma o lo o iloiloina uma i luma o le Fa’amasinoga Fa’aitumalo, i lalo o le fa’ataugaia a le afioga i le ali’i Fa’amasino ia Fitu Sunia.

 

O le moliaga o le ave ta’avale a o se’i le laisene fa’asaga ia Afele, na afua mai i le masina na te’a nei, ina ua taofia e Leoleo se ta’avale pikiapu lanu enaena na molimauina le alu saoasaoa i luga o le auala a le malo i Tafuna.

 

Ina ua taofia e Leoleo le ta’avale, na iloa ai o le ali’i o Afele o lo o fa’afoeina le ta’avale. Ina ua fesiligia o ia i lona laisene, na ta’utino ai le ua molia i Leoleo, o lo o se’i e le Fa’amasinoga lana laisene mo le 6 masina, e mafua mai ina ua ta’usala o ia i le moliaga mama o le ave ta’avale ‘ona i nai masina e le i mamao atu.

 

I le aso na lau ai le fa’asalaga a Afele ina ua ta’usala o ia i le moliaga o le ave ta’avale ‘ona, sa matua fautuaina malosi ai o ia ina ia aua ne’i ona toe fa’afoeina se ta’avale ao se’i lona laisene. Afai ae maua o ia ua ia le usitaia lea poloaiga, e ono mafai ona molia o ia e le malo i le moliaga mamafa o le ave ta’avale ae o lo o se’i le laisene. Afai fo’i ae fa’amaonia, e ono mafai ona fa’asala o ia i se fa’asalaga fa’a falepuipui e le silia i le 5 tausaga, ae fa’amalosia ai lona tuliina o aso e 90 i le toese.

 

O lo o tatala pea i tua Afele e fa’atali ai taualumaga o lana mataupu lea o lo o fa’agasolo i luma o le fa’amasinoga fa’aitumalo i le taimi nei. O ni isi o tuutuuga a le fa’amasinoga ua tuuina atu ia te ia, o le fa’asa lea ona ia toe fa’afoeina se ta’avale a o fa’atalitali ai se fa’aiuga o lana mataupu.

 

FELISE AMITUANA’I

 

O le masina o Tesema lea ua fa’atulaga e lau ai le fa’asalaga a le ali’i o Felise Amituana’i, ina ua fa’amaonia e le fa’amasinoga maualuga le moliaga o le fa’ao’olima i le tulaga lua e pei ona tu’uaia ai o ia e le malo.

 

O le moliaga e pei ona ta’usala ai Amituana’i e le fa’amasinoga maualuga, na afua mai i se fa’alavelave na tula’i mai i Aua i le masina o Iulai na te’a nei, lea na ia fa’aaogaina ai se a’upega malo e fa’ao’o ai manu’a tuga i le ulu o le ali’i na a’afia, e mafua mai i se feeseeseaiga na alia’e mai i le taimi o le latou inugapia sa faia.

 

I le tali ioe ai o Amituana’i i le moliaga e pei ona ta’usala ai o ia e le fa’amasinoga, sa ia ta’utino ai i le fa’amasinoga maualuga e fa’apea, i se taimi o le masina o Iulai na te’a nei i Aua, a o faia sa latou inugapia ma ni isi o ana uo, sa ia fa’aoolima ai i le ali’i na a’afia ma manu’a ai o ia.

 

Na ta’utino Amituana’i e fa’apea, o se laupapa sa ta’atia i tafatafa o le nofoaga sa faia ai la latou inugapia, sa ia fa’aaoga e fa’ao’o ai manu’a i le ali’i na a’afia. Sa ia ta’utino atili fo’i e fa’apea, o lana gaioiga sa faia i lea aso sa le tusa lea ma ala o le tulafono.

 

O lo o taofia pea Amituana’i i le toese i Tafuna i le taimi e fa’atali ai le aso lea ua fa’atulaga e lau ai lana fa’asalaga. O le moliaga o le fa’aoolima i le tulaga lua, o se solitulafono mamafa i le vaega D, e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

Comment Here