Tala otooto o Fa’amasinoga

NOFOVAAVAAIA LE ALI’I GAOI

 

E 12 masina lea ua nofovaavaaia ai se ali’i e 22 tausaga le matua mai Iliili, ina ua faamaonia e le Fa’amasinoga Fa’aitumalo le moliaga mama o le gaoi na tu’uaia ai o ia i le 3 masina talu ai, e mafua mai i le fa’alavelave lea na ia gaioia mai ai ni oloa mai totonu o se faleoloa Asia i le masina o Iulai na te’a nei.

 

E pei ona taua i fa’amaumauga a le fa’amasinoga, na ulufale le ali’i o Aflred Lavasi’i pe tusa o le ta o le itula e 9:50 i le po ma le fa’amoemoe e fa’atau ni ana fagupia vailima mai le faleoloa. Ae ina ua musu le fa’atau oloa e fa’ataga le fa’atauina o ana fagupia, ona e le i mautinoa pe fia ona tausaga, na vaaia ai loa le toe fo’i at o Lavai’i i tua i le pusa aisa ma toe fa’afo’i i ai fagupia vailima.

 

Pe tusa o le 10 minute talu ona i ai Lavai’i i totonu o le faleoloa, ae vaaia loa le aga’i mai ma alu ese loa. O le aso na sosoo ai ina ua iloilo e le faatau oloa lana masini pu’eata, sa ia molimauina ai le nana e le ua molia o ni apa meaai i totonu o le taga o lona ofuvae sa faia, ma logo ai loa Leoleo mo se fesoasoani.

 

E tusa ma le $50 le aofa’i o oloa na gaoia e le ua molia, lea na alu ma latou aai ai ma ana uo sa latou inupia i lea po.

 

O ni isi o tuutuuga o le nofovaavaaia a Lavai’i ua tuuina atu e le fa’amasinoga, o le saili lea o sana galuega e maua ai sona totogi e fa’atau ai mea e mana’o ai, mai lona alu ma gaoi oloa mai totonu o faleoloa.

 

Ua poloaina o ia na te totogi le salatupe e $125 i toton o le 60 aso, atoa ai ma le toe totogi o le tupe i le faleoloa mo oloa sa ia gaoia.

 

AMOSA FERETI

 

O le masina fou o Novema lea ua fa’atulaga e lau ai le fa’asalaga a le ali’i o Amosa Fereti, ina ua ta’usala o ia i le moliaga mamafa o le fa’aoolima i le tulaga lua. O lea moliaga na alia’e mai i se faalavelave na tula’i mai i le 6 masina talu ai, ina ua fa’aaoga e Fereti se a’upega malo e fa’aoo ai manu’a i le ulu o le ali’i na a’afia, e mafua mai i se feeseeseaiga tau fanua i Tafuna.

 

Na ioeina e Fereti e fa’apea, i se taimi o le masina o Me o le tausaga nei i Tafuna, sa ia fa’aaogaina ai se fasi paipa u’amea e ta ai le ulu o le ali’i na a’afia, i le mae’a ai lea ona lafo atu e le ali’i lea o ni upu masoa i lona to’alua e mafua mai i se taugaupu e fa’atatau i le tuaoi o le fanua o lo o latou nonofo ai.

 

O le tuga o le manu’a na a’afia ai le ali’i na manu’a, na mafua ai ona faanatinati atu o ia i le falema’i ma mana’omia ai filo e 5 e tapuni ai le manu’a sa i lona ulu, fa’apea ai ma se isi tama’i manu’a i lona tauau, lea fo’i sa mana’omia ai filo e 2.

 

E ui ua mae’a ona fa’aleleia le va o aiga e lua, ae o lea ua taoto le fautuaga a le malo ina ia i ai se faasalaga faa falepuipui fa’asaga ia Fereti, ona o le matuia o le gaioiga sa ia faia, lea na mafua ai ona manu’a tigaina le ali’i sa a’afia i lenei mataupu.

 

O lo o taofia pea Fereti i le toese i Tafuna ina ua le mafai ona ia totogiina le tupe na fa’atulaga e tatala ai o ia, e fa’atali ai le aso lea ua fa’atulaga e lau ai lana fa’asalaga. Ua i ai fo’i le fautuaga a le malo ina ia poloaina Fereti e saili se isi nofoaga e nofo ai, pe afai ae mae’a ona tuli lana fa’asalaga fa’a falepuipui, ina ia taofia ai le toe tula’i mai o se isi fa’alavelave faapenei i le lumana’i.

Comment Here