Ads by Google Ads by Google

Tala otooto o Fa’amasinoga


[ata: SN]
ausage@samoanews.com

NOFOVAAVAAIA LE TINA TALAVOU NA MAUA I AI AISA

 

E 5 tausaga lea ua faanofovaavaaia ai e le Fa’amasinoga Maualuga le Tina talavou lea na maua i ai vaega o le pauta fa’asaina o le aisa i le 3 tausaga talu ai, ina ua talitonu ali’i Fa’amasinoga, e alaga tatau se fa’asalaga fa’anofovaavaaia mo April Peric.

 

E 2 moliaga mamafa na ulua’i tu’uaia ai e le malo ia Peric, ina ua fa’atoa faila lana mataupu i le masina o Tesema 2014. O ia moliaga e aofia ai lona umia fa’asolitulafono o vaega o le pauta fa’asaina o le aisa, faapea ai ma le moliaga o lona umia fa’asolitulafono o vaega o le pauta fa’asaina o le aisa, ma le fa’amoemoe e tulei ma fa’atau atu i isi tagata.

 

Ae i lalo o se maliliega na sainia e le malo ma le ua molia, na malie ai le malo e tali ioe Peric i le moliaga feololo o lona umia fa’asolitulafono o vaega o le pauta o le aisa, ae solofua le moliaga pito sili ona mamafa, o lona umia fa’asolitulafono lea o vaega o le pauta o le aisa ma le fa’amoemoe e tulei ma fa’atau atu isi tagata.

 

O mea na maua e Leoleo ina ua latou osofaia le ta’avale a le ua molia i le 2014, e aofia ai vaega o le pauta o le aisa sa maua i totonu o le paipa lea e fa’aaoga e ula ai fualaau fa’asaina, o straw ua uma ona tipi tulimanu, lea e fa’aaoga e utu i ai vaega o le fualaau fa’asaina o le aisa, faapea ai ma se tino i tupe e $341.

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia sei fa’aauau ai pea le mafutaga ma si ana fanau aemaise ai lona aiga. Na taua atili e le ua molia e fa’apea, o aafiaga o ia i fualaau faasaina na mafua mai ina ua malepe le la ulugali’i ma lona to’alua, peita’i e le avea lea ma alofaga i lona faia o lenei solitulafono.

 

Na malilie uma loia a itu e lua ina ia faasala le ua molia i se fa’asalaga faanofovaavaaia, ae pule lava le fa’amasinoga i le auala e fa’atino ai le tuliina o se faasalaga fa’a falepuipui.

 

Saunoa le afioga i le ali’i fa’amasino sili lagolago ia Elvis P Patea e fa’apea, e seasea tupu se faafitauli faapenei i ni mataupu tau solitulafono e oo atu i le fa’amasinoga, o le umi lea o le taimi e va ai le taliaina e le fa’amasinoga o se maliliega aufa’atasi, ma le taimi e tuuina atu ai sana faasalaga faasaga i le tagata ua ta’usala.

 

Mo le mataupu a Peric, na saunoa ai Patea e fa’apea, ua silia i le 3 tausaga talu ona tula’i mai lenei mataupu, a o lea fa’atoa tuuina atu i luma o le fa’amasinoga maualuga mo le fa’atulagaina o le fa’asalaga. Ae i le silasila a le fa’amasinoga, ua lava lea taimi umi e faamaonia atu ai e le ua molia i le fa’amasinoga, o ia o se tagata e tatau ona faasala i se faasalaga faanofovaavaaia, e mafua mai i le leai lea o se isi solitulafono na toe aafia ai o ia.

 

Na taua e Patea le faamalieina o le fa’amasinoga i le tulaga lelei sa i ai le amio a Peric, talu mai lava i le taimi na mae’a ai ona talia lana maliliega seia oo mai i le taimi lenei ua lau ai lana fa’asalaga.

 

“Ona o lea tulaga, ua manatu ai le fa’amasinoga e tuuina atu se faasalaga faanofovaavaaia ia te ia, e aunoa ma le toe tuuina atu o se isi taimi e te tuliina i le falepuipui,” o le saunoaga lea a Patea.

 

O ni isi o tuutuuga o le nofovaavaaia a Peric mo le umi e 5 tausaga, o lona tuliina lea o masina e 20 i le toese i Tafuna, peita’i ua manatu ali’i Fa’amasinoga, ua lava aso e 68 lea na taofia ai le ua molia i le toese a o fa’atalitali taualumaga o lana mataupu, e fai ma ana faasalaga i lenei mataupu. O le umi o lo o totoe ai o le a fa’amalumalu lona tuliina, fuafua lava i le usitai o le ua molia i tuutuuga a le fa’amasinoga.

 

O ni isi o ia tuutuuga e aofia ai le fa’asa lea ona ia toe tagofia ni fualaau faasaina, faasa fo’i ona ia toe umia fualaau faasaina, pe toe mafuta atu i tagata o lo o latou tagofia fualaau fa’asaina, a ia avea o ia ma tagatanu’u e tausisi i tulafono a le malo i soo se taimi.

 

Ua poloaina fo’i le faia o ni suega i lona tino ina ia mautinoa ai na te le o toe tagofia fualaau faasaina poo le ‘ava malosi.

 

TOLUPO HODGES

 

Ua toe a’afia nei le ali’i o Tolupo Hodges i le tulafono, ina ua tu’uaia o ia i lona le usitaia lea o poloaiga o lana nofovaavaaia sa tuuina atu e le Fa’amasinoga. I lona le usitaia o lana nofovaavaaia, na sainia ai loa e le Fa’amasinoga se poloaiga e taofia faapagota ai o ia i le vaiaso na te’a nei.

 

O ni isi o tuutuuga o le nofovaavaaia a Hodges na te le i usitaia, e aofia ai le alu e vaai le Ofisa Faanofovaavaaia i masina ta’itasi, ma ia auai i aoaoga e fesoasoani ai i le aafiaga o le ava malosi ma fualaau fa’asaina.

 

I se ripoti mai le Ofisa Faanofovaavaaia na mafua ai ona sainia le poloaiga e pu’e fa’apagota ai Hodges, talu lava ona magalo le ua molia i le tausaga na te’a nei, e lei oo atu lava e vaai le Ofisa Faanofovaavaaia, e le o auai fo’i i aoaoga e fesoasoani ai i le faafitauli o fualaau fa’asaina.

 

Ua taofia nei Hodges i le toese i Tafuna e aunoa ma se tupe ua faatulaga e tatala ai o ia, e fa’atali ai le aso lea ua faatulaga e faia ai lana ulua’i iloiloga. Afai ae faamaonia ua ia le usitaia tuutuuga o lana nofovaavaaia, e ono mafai e le Fa’amasinoga ona poloaina o ia ina ia tuli loa le umi o lana faasalaga faa falepuipui o lo o fa’amalumalu e le fa’amasinoga.

 

O Hodges na ta’usala e le fa’amasinoga i moliaga o le umia faasolitulafono o vaega o fualaau fa’asaina e aofia ai aisa ma mariuana.