Tala otooto o Fa’amasinoga


[ata: SN]
ausage@samoanews.com

TAVITA FOUILETUALA JR

 

O le ali’i lea na tu’uaia i lona ave fa’agaoi o se ta’aiga manoa e fa’aaoga mo fagotaga mai se kamupani i le atunu’u, ua poloaina e le fa’amasinoga maualuga o ia na te totogi le salatupe e $1,000, o se tasi lea o tuutuuga o lana nofovaavaaia e 7 tausaga.

 

O isi tuutuuga o le nofovaavaaia a Tavita Fouiletuala Jr, e aofia ai le fa’asa lea ona ia toe taumafai e fa’afesootai i latou na a’afia i lenei mataupu, pe na te toe soliina se tulafono, a ia avea o ia ma tagatanu’u e tausisi i tulafono a le malo i taimi uma.

 

I lalo o se maliliega na sainia e le ua molia ma le malo, sa ia tali ioe ai i le moliaga mamafa o le gaoi, ae solofua e le fa’amasinoga isi moliaga sa totoe ai i le pepa o le tagi sa fa’aulu e le malo.

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia e fa’aauau ai pea lana tausiga i lona aiga. Sa ia fa’atoese fo’i i le kamupani na a’afia i lana solitulafono, le Samoa Fishing Management Company.

 

Na talosaga le loia a le ua molia ia Michael White i le fa’amasinoga maualuga, mo se avanoa e fa’anofovaavaaia ai le ua molia. Na taua e White e fa’apea, e ui i le solitulafono mamafa e pei ona ta’usala ai e le fa’amasinoga le ua molia, ae talu lava ona tuana’i lenei fa’alavelave, e le i toe a’afia lava le ua molia i se isi solitulafono.

 

Na lagolagoina e le loia a le malo ia Robert Morris le fa’afinauga a le itu tete’e mo se fa’asalaga nofovaavaaia. Na faamaonia fo’i e Morris i luma o le fa’amasinoga maualuga, le mae’a lea ona totogi e le ua molia o le tupe mo le ta’aiga manoa sa ia gaoia.

 

E tusa ai o fa’amaumauga a le fa’amasinoga o lo o taua ai e fa’apea, o le ta’aiga manoa fagota lea na gaoia e le ua molia mai le Kamupani na a’afia, sa ia alu ma fa’atau i le isi tagata. Ina ua sailia e Leoleo le ta’aiga manoa, sa alu ai loa le tagata na fa’atau i ai e le ua molia le manoa ma toe fa’afo’i le ta’aiga manoa i le Kamupani.

 

E 28 masina na manatu le fa’amasinoga e faasala ai Fouiletuala Jr i le toese i Tafuna, o se tasi lea o tuutuuga o lana nofovaavaaia e 7 tausaga, peita’i ua manatu ali’i fa’amasino, ua lava aso e 69 lea na taofia ai le ua molia i le toese ina ua fa’atoa alia’e mai lana mataupu i le tausaga na te’a nei e fai ma ana fa’asalaga, ae o le umi o lo o totoe ai o le a fa’amalumalu lona tuliina.

 

O le afioga i le ali’i fa’amasino ia Elvis P. Patea na taulimaina le mataupu a Fouiletuala Jr, ae lagolagosua i ai afioga i ali’i Fa’amasino Lagolago ia Fa’amausili Pomele ma Muasau T. Tofili.

 

VINCENT LOMIGA

 

Ua molia nei e le malo se ali’i e 35 tausaga le matua, i lona fa’ao’olima lea i se isi ali’i e ala i lona fa’aaoga o se a’upega malo e fa’aoo ai manu’a ia te ia. O moliaga ua faila e le malo fa’asaga ia Vincent Lomiga e aofia ai le moliaga mamafa o le fa’aoolima i le tulaga lua, faapea ai ma le moliaga mama e tasi o le fa’aleaga meatotino i le tulaga tolu.

 

O le fa’alavelave na mafua mai ina ua masalomia e Lomiga le ali’i na a’afia, o ia lea na gaoia mea faigaluega sa i tua o le ta’avale a lona uncle. Ina ua fetaui Lomiga ma le ali’i na a’afia i luma o se faleoloa i Nuuuli, na tu’uaia ai loa lona fa’aoolima ia te ia ao molimauina e tagata sa i ai i totonu o le faleoloa, ma latou viliina ai loa Leoleo mo se fesoasoani.

 

O ni isi o tuutuuga ua tuuina atu e le fa’amasinoga e usita’i ia i Lomiga pe afai na te totogiina le $5,000, e aofia ai le faasa lea ona ia toe taumafai e faafesootai le alii na aafia, faasa ona ia toe solia se tulafono, a ia avea o ia ma tagatanu’u e tausisi i tulafono a le malo i soo se taimi.

Comment Here