Ads by Google Ads by Google

Tala otooto o Fa’amasinoga


[ata: SN]
ausage@samoanews.com

PAULO LAUTI

 

O le masina o Novema lea ua tolopo i ai le ulua’i iloiloga o le mataupu a le susuga ia Paulo Lauti, i le mae’a ai lea o lona teena o moliaga mamafa e 10 ua tu’uaia ai o ia e le malo - e mafua mai i le fa’alavelave lea ua tu’uaia ai o ia i lona ave fa’agaoi lea o se vaega tupe e tusa ma le $5,000 mai lona uncle.

 

O moliaga mamafa ua tu’uaia ai e le malo ia Lauti e aofia ai moliaga e 5 o le gaoi, atoa ai ma moliaga e 5 o lona faia o ni tusitusiga tau fa’asese. O ia moliaga uma o lo o fa’atulaga mai lea i le vaega C o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000 - poo le fa’asala fo’i lea i fa’asalaga uma ia e lua.

 

O lenei mataupu na tofu atu i le Ofisa o Leoleo i le masina o Iulai na te’a nei, ina ua maitauina e le uncle a le ali’i ua molia se tulaga fa’aletonu i lana teugatupe o lo o i totonu o le lala o le Faletupe a Hawaii.

 

Na maua le avanoa e fesiligia ai e le uncle le ua molia e uiga i lenei mataupu, ae sa ia fa’afiti na te lei gaoia se vaega tupe mai totonu o lana teugatupe. O le mafua’aga lea na tofu atu ai loa le mataupu i le Ofisa o Leoleo, ina ua mana’omia e le uncle se fesoasoani mo le sailia o lana tupe ua leiloa poo fea ua ave i ai.

 

E tusa ai o fa’amaumauga a le fa’amasinoga, e 5 siaki na sasae ese mai e le tagata mai le tusi siaki a le na a’afia.

 

Na saili e Leoleo fa’amaumauga mai le Faletupe a Hawaii, ma fa’amaonia ai, o siaki uma nei e 5 sa fa’aaoga i ai le laisene ave ta’avale a le ua molia e tala ai i tua tupe mai le teugatupe.

 

O le siaki muamua e $ $1,600 na tala i le aso 23 Me 2017. O le siaki lona lua e $1,200 le aofa’i na tala i le aso 1 Iuni. O le siaki lona tolu e $600 na tala i le aso 5 Iuni. Soo ai ma le siaki lona fa e $1,300 na tala i le aso 30 Iuni. Ma le siaki lona lima e $400 na tala i le aso 3 Iulai.

 

O lo o taua i fa’amaumauga a le fa’amasinoga e fa’apea ma fa’amaumauga a le Faletupe na maua e Leoleo, na fa’amalosi e le ua molia le saini a lona uncle i luga o siaki uma nei e 5 - ona ia fa’aaoga lea o lona laisene ave ta’avale e tala mai ai.

 

Ua taulimaina fo’i e Leoleo se tusi fa’atoese a le ua molia sa tu’uina atu i lona uncle, e fa’amagalo ai le gaioiga sese ua faia, atoa ai ma lana talosaga mo se avanoa na te toe totogiina atu ai lana tupe.

 

E $5,000 le vaega tupe lea ua fa’atulaga e tatala ai Lauti, e fa’atali ai taualumaga o lana mataupu lea ua fa’agasolo nei i luma o le fa’amasinoga maualuga.

 

ALIVA VILIAMU

 

E 12 masina lea ua nofovaavaaia ai le ali’i o Aliva Viliamu, ina ua fa’amaonia e le fa’amasinoga le moliaga o le fa’ao’olima i le tulaga tolu sa tu’uaia ai o ia e le malo. I le talia ai e le fa’amasinoga o le tali ioe a Viliamu i le moliaga o le fa’ao’olima i le tulaga tolu, na faia ai loa le faaiuga e solofua le moliaga o le fa’aleaga meatotino i le tulaga tolu.

 

O se inugapia sa faia i le va o Viliamu ma ni isi o ana uo, na fa’ai’u puta ai le afiafi ina ua fesopoa’i fa’amatalaga ma tu’i ai loa e le ali’i na a’afia ia Viliamu. I le tuana’i ai o nai minute talu ona mae’a le ulua’i vevesi, na toe tula’i mai ai loa le vevesi i le va o Viliamu ma le na a’afia, ma tu’i ai loa e Viliamu foliga o lana uo ma manu’a tigaina ai. Sa ia faaleagaina fo’i le telefoni feavea’i a le ua molia.

 

O ni isi o tuutuuga o le nofovaavaaia a Viliamu e aofia ai le fa’asa ona ia toe tagofia le ava malosi, a ia auai i aoaoga e fesoasoani ai i le leaga o le ‘ava ma le ita. Ua poloaina fo’i o ia na te totogi le salatupe e $125 i totonu o le ulua’i 60 aso o lana nofovaavaaia.