Ads by Google Ads by Google

Tala otooto o Fa’amasinoga

ausage@samoanews.com

NOFOVAAVAAIA LE ALI’I PULENU’U MAI FALENIU MO LE 9 MASINA

 

O le ali’i Pulenu’u mai Faleniu lea na ona ma fa’aleaga le faitoto’a o le faleoloa o lo o i tafatafa o lona fale, ua faanofovaavaaia nei o ia e le Fa’amasinoga Fa’aitumalo mo le umi e 9 masina i lalo o tuutuuga e ao ona ia usita’i i ai.

 

O ni isi o ia tuutuuga o le nofovaavaaia ai Kereseta Moi e aofia ai le fa’asa lea ona ia toe tagofia le ‘ava malosi po o fualaau fa’asaina, auai i aoaoga e fesoasoani ai i le fa’afitauli o le ‘ava malosi - ma ia totogi le tupe e $490 mo le toe fa’aleleia o le faitoto’a o le faleoloa na leaga ia te ia.

 

Na ulua’i tuuaia e le malo ia Moi i moliaga mama e 2 o le fa’aleaga meatotino i le tulaga tolu, fa’apea ai ma le fa’atupu vevesi i nofoaga faitele. I lalo o le maliliega na sainia e Moi ma le malo, lea fo’i na talia e le Fa’amasinoga, na malie ai le itu a le malo e sui le moliaga e tali ioe ai le ua molia - ina ia fa’ailoa ai le moliaga o le fa’aleaga meatotino i le tulaga lua.

 

I le tali ioe ai o Moi i le moliaga ua toe teuteu e le malo o le fa’aleaga meatotino i le tulaga lua - na talosaga ai loa le malo i le Fa’amasinoga ina ia solofua le moliaga o le fa’atupu vevesi i nofoaga faitele o loo totoe ai i le pepa o le tagi sa latou fa’aulu fa’asaga i le ua molia.

 

Na taua e le ua molia i le fa’amasinoga e fa’apea, o le fa’alavelave na mafua ai ona leaga le faitoto’a o le faleoloa -  ina ua alu atu e toe fa’atau mai se isi ana fagupia ae musu le fa’atau oloa.

 

Na taua e Moi lona taumafai e una’i atu le faitoto’a o le faleoloa ina ua tapuni mai e le pule o le faleoloa - ae fa’afuase’i ai loa ona lau-lua le faitoto’a tioata.

 

Na finau le itu a le malo fai mai, sa ta’e le faitoto’a tioata o le faleoloa ina ua ato e le ua molia, ae na finau atu fo’i Moi fai mai, e le i ta’e le faitoto’a ae na lau-lua ina ua ia tago ma una’i atu i totonu.

 

E 60 aso lea ua tuu atu e le fa’amasinoga fa’aitumalo e totogi atu ai e le ua molia le tupe mo le faitoto’a o le faleoloa na ia fa’aleagaina.

 

TUIASINA SALAMO LAUMOLI

 

Ua talia e le fa’amasinoga fa’aitumalo le talosaga a le afioga i le Sa’o ia Tuiasina Salamo Laumoli, mo se avanoa e fa’ataga ai o ia ona malaga i fafo mo ana talavai, a o fa’atalitali ai se fa’aiuga o le mataupu e pei ona tu’uaia ai o ia e le malo.

 

O Tuiasina o lo o tu’uaia i le moliaga mama o le faia o ni gaioiga e save’u ai le nonofo filemu i totonu o lona aiga, e mafua mai i se fa’alavelave na tula’i mai lava i le lotoifale o lona aiga.

 

O tuutuuga o lo o tatala ai o ia i tua e fa’atalitali ai taualumaga o lana mataupu, o le fa’asa lea ona ia tuua le atunu’u i soo se taimi, se’i vagana o se fa’atanaga e avatu e le Fa’amasinoga.

 

O le aso Faraile na te’a nei na fa’aleo ai e le loia a Tuiasina le talosaga a le ua molia, mo se fa’atanaga a le fa’amasinoga e malaga ai. Na fa’ailoa e lana loia ia Kate Hannaher i le fa’amasinoga, le mae’a lea ona totogi le ticket a le ua molia e malaga ese atu ai ma le atunu’u i le aso 22 Setema, ma le fa’amoemoe e toe taliu mai i le aso 3 Novema.

 

A o le i talia e le afioga i le ali’i fa’amasino ia Fiti Sunia le talosaga a Tuiasina, na fa’ailoa i ai e le ali’i Fa’amasino e fa’apea, afai ae i ai se isi taimi e toe fia malaga ai i fafo mo ni isi ana talavai ao le i mae’a taualumaga o lana mataupu, ia faila muamua le talosaga i le fa’amasinoga pe talia, ae le o le muamua totogi le pasese ae mulimuli faila le talosaga.

 

O le aso 7 Novema lea ua fa’atulaga e toe valaau ai le mataupu a Tuiasina i luma o le fa’amasinoga fa’aitumalo.

 

ENELE MALAEULU

 

O le ali’i talavou lea o lo o tu’uaia i lona ulufale fa’amalosi i totonu o se fale a se aiga i Ottoville i le masina na te’a nei, ma ave fa’agaoi meatotino sa i totonu o le potu malolo, ua taofia nei o ia e le malo i le toese i Tafuna.

 

O le moliaga e pei ona tu’uaia ai le ali’i o Enele Malaeulu e aofia ai le talepe fale i le tulaga muamua ma le moliaga o le gaoi.

 

E tusa ai o fa’amaumauga a le fa’amasinoga, o le mataupu lenei na tofu atu i Leoleo ina ua fo’i mai le ali’i e ana le fale na fa’aleaga mai lana malaga na ia tuua ai le atunu’u, ae ona molimauina ai le faitoto’a pito i tua o le fale ua fa’aleaga e se tagata.

 

Ae ina ua saili e lea ali’i totonu o lona fale, o iina na fa’atoa ia iloa ai le tele o mea aoga ua gaoia ma aveesea mai totonu o le potu malolo. O ni isi o mea totino sa gaoia e aofia ai pea seevae, DVD, uati ma se telefoni.

 

O ni tamaiti e nonofo latalata i le nofoaga na tula’i mai ai le fa’alavelave, sa latou fa’amatala i le ali’i e ana le fale lo latou vaaia o Malaeulu o oso mai i luma o lona fale i le isi vaveao.

 

Na aga’i atu Leoleo i le fale o Malaeulu ma latou maua atu i ai pea seevae na aveesea mai i le fale na a’afia. Ae ina ua fesiligia poo fea isi mea totino sa ia aumaia mai totonu o le fale, na tali le ua molia, na alu ma fa’atau i le fale o le ali’i o “Stau” e aumai ai a latou fualaau fa’asaina, le ituaiga o le aisa mo ia ma ana uo.

 

E $10,000 le vaega tupe lea ua fa’atulaga e totogi ona fa’atoa mafai lea ona tatala le ua molia i tua. O le vaiaso nei lea ua fa’atulaga e faia ai lana ulua’i iloiloga, e iloilo ai e le fa’amasinoga molimau a le malo pe lava ma totoe e lagolago ai sa soli se vaega o le tulafono, ae poo Malaeulu fo’i lea o lo o tu’uaia i le soliina o le tulafono.