Tala otooto o Fa’amasinoga

ausage@samoanews.com

WILLIAM FILIGA

 

Ua molia nei e le malo le ali’i o William Filiga i moliaga mamafa e 2 o le talepe fale i le tulaga muamua ma le gaoi, e mafua mai i le fa’alavelave lea o lo o tu’uaia ai o ia, i lona osofaia lea o se fale i Tafuna i le 2 masina talu ai ae ave fa’agaoi le tele o meaaoga sa i totonu e aofia ai se uati, telefoni, lavalava, seevae ma se tinoitupe e silia  le $100.

 

O le vaiaso na te’a nei na faila ai e le malo le latou tagi i luma o le fa’amasinoga fa’asaga ia Filiga, ma ua fa’amoemoe o le fa’aiuga o le vaiaso nei e faia ai lana ulua’i iloiloga i luma o le fa’amasinoga fa’aitumalo, lea o le a iloilo ai e le Fa’amasinoga fa’amatalaga o le a tuuina atu e le malo, poo lava ma tonu ia fa’amatalaga e lagolago ai le latou tagi ua faia fa’asaga i le ua molia.

 

O lenei mataupu na tofu atu i le Ofisa o Leoleo i Tafuna, ina ua talosagaina e le ulugali’i e ana le fale se fesoasoani mo le tau sailia o le tagata na osofaia ma gaoia meatotino sa i totonu o le fale a le la tama teine ma lana fanau o lo o malaga i fafo.

 

E silia i le masina o galulue Leoleo i le tau sailiina o ni molimau e uiga i lenei mataupu. E to’atele fo’i ni isi e nonofo latalata i le nofoaga na tula’i mai ai le fa’alavelave na fesiligia, peita’i e le i mafai ai ona maua se fesoasoani.

 

O se tasi o afiafi a o aga’i atu le ta’avale a le ulugali’i e fai le la fa’atau i se tasi o faleoloa i Tafuna, sa la molimauina ai se ali’i o lo o ia ofu mai i le mitiafu o lo o masalomia na aumai i totonu o le fale a le la tama na osofaia ma talepe e tagata.

 

Na taumafai le ulugali’i e mata’i foliga o le ali’i lea ma la iloa ai, o se tasi o ali’i e nofo i le isi pito nu’u e latalata i le vaega tonu o lo o i ai le latou fale na osofaia. Na logo e le ulugali’i Leoleo ma fa’ailoa i ai le tulaga e pei ona la molimauina, ma aga’i atu ai loa Leoleo i le fale o le ali’i lea mo suesuega.

 

Na avea le alu i le atoa o le ali’i o Filiga ina ua ia vaaia Leoleo ua aga’i atu ia te ia, ma itu na masalomia ai loa o ia i lenei fa’alavelave.

 

Ina ua fesiligia Filiga i lenei mataupu, sa ia ta’utino ai i Leoleo lona osofaia o le fale ae gaoia meatotino i totonu, ma ua mae’a ona ia fa’atau ni isi o meatotino sa gaoia i ni tagata e le masani ai e aofia ai lavalava, ae o le tupe sa ia fa’aaogaina.

 

PULUMU FIFITA

 

O le vaiaso fou lea ua fa’atulaga e tuu atu ai le fa’aiuga a le fa’amasinoga fa’asaga i le ali’i o Pulumu Fifita, i le mae’a ai lea ona ia ta’utino i luma o le fa’amasinoga, ua ia soli tuutuuga o lana faanofovaavaaia, e mafua mai i lona le totogia lea o lana salatupe na poloaina o ia e le fa’amasinoga e totogi, atoa ai ma lona le alu e asi le Ofisa Faanofovaavaaia.

 

O Fifita o lo o nofovaavaaia mo le 5 tausaga, e mafua mai ina ua ta’usala o ia e le fa’amasinoga maualuga i le moliaga mamafa o le talepe fale i le tulaga lua, ona o lona osofaia o se fale i Leone i le amataga o le tausaga na te’a nei.

 

O ni isi o tuutuuga o lana nofovaavaaia e 5 tausaga, o lona tuli lea o masina e 20 i le falepuipui, totogi le salatupe, saili sana galuega e galue tumau ai, ma ia asiasi i le Ofisa Faanofovaavaaia fa’atasi i le masina, poo isi lava fo’i taimi e fa’atonu e le Ofisa Faanofovaavaaia o ia e alu atu ai.

 

Na taua i le ripoti a le Ofisa Faanofovaavaaia, le tele o tuutuuga e le i usitaia e Fifita, ma mafua ai loa ona talosagaina le tatau lea ona fa’aleaoga lana nofovaavaaia, ae poloaina loa o ia e tuli le umi o lo o totoe o lana nofovaavaaia.

Comment Here