Ads by Google Ads by Google

Tala otooto o Fa’amasinoga

ausage@samoanews.com

FRED VILIAMU

 

O le ali’i lea na ia fa’ao’olima i se ave ta’avale ina ua la tau lavevea ma lona atali’i i le ta’avale a le ali’i na aafia, ua poloaina o ia e totogi le salatupe e $150 ma fa’atoese i le ave ta’avale na a’afia, o ni isi ia o tuutuuga o lana nofovaavaaia e 12 masina le umi, ina ua fa’amaonia e le fa’amasinoga le moliaga o le fa’aoolima i le tulaga tolu fa’asaga ia te ia.

 

Na fa’atoese Fred Viliamu i le fa’amasinoga e tusa ai o lana solitulafono, ma ia talosagaina ai se isi avanoa mo ia.

 

Na taua atili e le ua molia e fa’apea, o lona ita tele i le taimi na tau so’a ai e le na aafia laua ma lona atalii i lana ta’avale, na mafua ai ona ia fa’ao’olima ia te ia. Na taua e le ave ta’avale i Leoleo, na te le i iloaina le ua molia ma lona atali’i i le taimi na taumafai ai e seu ese lana ta’avale mai le omo o le auala, ae fetaui lava lona taumafai e seu ese lana ta’avale ae oo atu loa fo’i ma le ua molia ma lona atali’i i luma o le auala ma tau lavevea ai loa.

 

Ua poloaina fo’i e le fa’amasinoga ia Viliamu ina ia auai i aoaoga e fesoasoani ai i le ita, ona e ono matuia atu le fa’alavelave e tupu pe ana fa’apea e tuga manu’a na a’afia ai le ali’i sa ia fa’ao’olima i ai.

 

SAULELIA AMITUANA’I

 

O le Tina lea o lo o tuuaia i lona ave fa’agaoi o se ietoga mai se isi fafine ae fa’atau atu ma le fa’amoemoe e maua mai ai se tupe e tausi ai lana fanau, ua tolopo lana mataupu e toe fofogaina i le masina o Novema o le tausaga nei, i le mae’a ai lea ona ia teena o moliaga mamafa e 3 o lo o tu’uaia ai o ia i luma o le fa’amasinoga i le vaiaso nei.

 

O moliaga ua tu’uaia ai e le malo ia Saulelia Amituana’i e aofia ai le gaoi, ave fa’agaoi o meatotino sa tu’uina atu i lalo o lana vaavaaiga, fa’apea ai ma le moliaga o lona taliaina lea o ni oloa sa ave fa’agaoi.

 

O le mataupu fa’asaga ia Amituana’i na tofu atu i le Ofisa o Leoleo i Tafuna i le masina na te’a nei, ina ua faila e se Tina sana tagi fa’asaga i le ua molia, ina ua fiu e fa’atali le tau o lana ietoga na alu ma ia.

 

E tusa ai o le fa’amatalagaa le Tina na a’afia i Leoleo, sa ia taua ai le alu atu o Amituana’i i lona fale e saili se ietoga o le afuelo e fa’aaoga i lona fa’alavelave, ma ia fa’ailoa i ai le ietoga o loo i ai, ae mafai ona ia fa’atauina i le $1,000.

 

Na taua atili e le Tina na a’afia i Leoleo lona vaaia o foliga o le ua molia, o loo ia naunau lava i le ietoga, ma fa’afuase’i ai ona ia fa’atauanau atu ia te ia, mo se avanoa e alu ai ma le ietoga se’i vaai i ai lona Tina pe mana’o ai e fa’atau, ona toe alu atu lea e momoli ai.

 

O le taimi lava na alu ese atu ai Amituana’i ma le ietoga, o le taimi mulimuli fo’i lea na toe vaai ai le Tina i lana ietoga, ma ua fiu fo’i e fa’atali le ua molia ua le toe oo atu, ma ia talosagaina ai loa se fesoasoani a le Ofisa o Leoleo.

 

I le maua ai e Leoleo o Amituana’i ma fesiligia e uiga i lenei mataupu, sa ia pepelo ai i Leoleo o le ietoga ua uma ona fa’aaoga i le maliu a lona Tama, mulimuli ane ina ua fa’aauau pea ona fesiligia o ia, sa ia ta’utino ai le mea moni, ua uma ona ia fa’atauina le ietoga i le $300, ona sa tau saili se tupe e fa’atau ai se meaai mo lana fanau.

 

O lo o taofia pea Amituana’i i le toese i Tafuna ina ua le mafai ona ia totogiina le $5,000 ua fa’atulaga e tatala ai o ia i tua, ae afai e mafai ona tatala o ia i tua, ua fa’asa ona ia taumafai e fa’afeso’ota’i le Tina sa a’afia i lana solitulafono