Tala otooto o Fa’amasinoga

ausage@samoanews.com

FUIVAI SUA MA LUALIMA TALIU

 

O ali’i e to’alua ia o lo o tu’uaia e le malo i moliaga o le gaoi ma le talepe fale, ua toe taofia nei i laua i le toese e fa’atali ai le la ulua’i iloiloga lea ua fa’atulaga e faia i le aso 26 Setema 2017, i le mae’a ai lea ona la teena o tu’uaiga fa’asaga ia te i laua i luma o le fa’amasinoga maualuga i le taeao nei.

 

O lo o tu’uaia e le malo ia Sua i le moliaga mamafa e tasi o le gaoi, ae o Taliu o lo o tu’uaia o ia i moliaga mamafa e lua o le talepe fale ma le gaoi.

 

O tu’uaiga fa’asaga ia Sua ma Taliu na alia’e mai lea i se fa’alavelave na tula’i mai i Nu’uuli i le amataga o le masina lenei o Iulai, lea o lo o tu’uaia ai i laua i lo la osofaia o se fale ma ave fa’agaoi ai le tele o meatotino aoga sa i totonu o le fale.

 

O le fa’alavelave lenei na tofu atu i le Ofisa o Leoleo, ina ua fo’i mai le ana le fale mai lana malaga i fafo ae ona vaaia ai vaega o lona fale ua malepe e aofia ai le faitoto’a, fa’apea ai le tele o mea taua ua gaoia.

 

O ni isi o oloa sa gaoia e aofia ai pusa pisupo e 10, pusa wahoo e 10, o auro ma filifili, se’eva’e, DVD players ma DVD’s, o lavalava e aofia ai pea o suti tamaloloa e 10.

 

I le taulimaina ai e Leoleo o le tagi mai le ana le fale na a’afia, na taumafai ai loa Leoleo e saili ni fa’amatalaga e uiga i lenei fa’alavelave, e aofia ai le fesiligia o ni isi o molimau na mafai ona maua ai ni isi o fa’amatalaga na fesoasoani i le latou su’esu’ega, ma taua ai le fa’atau atu e i laua ua tu’uaia o pusa pisupo i ni isi o aiga, na mafua ai loa ona saili e Leoleo i laua ua molia ma fesiligia e uiga i lenei mataupu.

 

E ta’i $15,000 lea ua fa’atulaga e le fa’amasinoga e totogi ona fa’atoa mafai lea ona tatala i laua ua molia i tua, e fa’atalitali ai taualumaga o a la fa’amasinoga. Afai ae mafai ona tatala i laua i tua, ua fa’asa ona la toe ulufale pe latalata i le fale na tula’i mai ai le fa’alavelave e pei ona taofia ai i laua i le toese, fa’asa ona la toe soli se tulafono, a ia avea i laua ma tagatanu’u lelei e tausisi i le tulafono a le malo.

 

O lo o taofia pea Sua ma Taliu i le toese i Tafuna ina ua le mafai ona la totogiina le vaega tupe ua fa’atulaga e tatala ai i laua i tua, e fa’atali ai le aso lea ua fa’atulaga e faia ai le la ulua’i iloiloga i luma o le fa’amasinoga maualuga.

 

O le ali’i loia ia Douglas Fiaui o lo o tula’i mo Sua ma Taliu, ae o le tama’ita’i loia ia Kristy Dunn o lo o tula’i mo le itu a le malo.

 

O le afioga i le ali’i Fa’amasino ia Elvis P. Patea sa iloiloina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Suapaia Pereira ma Satele L. Ali’itai.

 

TAO LIU

 

E ui na talia e le afioga i le ali’i fa’amasino sili ia Michael Kruse le talosaga a le ali’i loia fautua ia Douglas Fiaui mo se avanoa e toe tolopo ai le mataupu a Tao Liu mo le isi 2 vaiaso, peita’i na fautuaina malosi e Kruse le ali’i loia fautua i le le toe talia lea e le fa’amasinoga o le amioga lea ua masani ai loia, e fa’atalitali lava le sainiga o a maliliega seia oo i le vaiaso e sosoo ma le vaiaso e faia ai le fa’amasinoga autu o se mataupu, ma avea ai ma fa’afitauli i le tau fa’a tulagaina lea o taimi ma aso o galuega a le fa’amasinoga.

 

Na fa’ailoa e Kruse ia Fiaui le tulaga lea ua maitauina i galuega a le fa’amasinoga, i le leai lea o ni fa’amasinoga iloilo (jury trial) e toe faia, e mafua mai i le oo atu i le taimi o le a faia ai le fa’amasinoga iloilo ae fa’ailoa atu ua mae’a saini le maliliega, ma ma’imau atu ai taimi na sa tatau ona fa’ataunu’u ai le tele o isi mataupu, ona o le ua oo i le tausaga e 2020 le fa’a kalenaina o taimi ma aso e faia ai fa’amasinoga iloilo o le tele o mataupu fou ia faatoa ulufale atu i le fa’amasinoga.

 

Na fa’ailoa e Fiaui i le fa’amasinoga e fa’apea, o le mataupu fou faasaga ia Liu lea ua mafua ai ona tuai le fa’amautuina o le latou maliliega ma le malo, ona o lo o taumafai e aofia ai i le vaega o le latou maliliega lea o le a sainia le mataupu fou lea fa’atoa faila e le malo fa’asaga ia te ia.

 

O le ulua’i tagi sa faila e le malo fa’asaga ia Liu, o lo o tu’uaia ai o ia i moliaga eseese e 11 e aofia ai moliaga o le umia fa’asolitulafono o fualaau fa’asaina ma se fana e le i laiseneina.

 

O ia moliaga na afua mai i le fa’alavelave lea na taofia ai e Leoleo se ta’avale na ave e le ua molia ina ua maitauina le ova o le saoasaoa mai maila fa’atulagaina i lea vaega o le auala, ae ina ua taumafai Leoleo e fesiligia le ua molia i le mafua’aga o le soona alu saoasaoa o lana ta’avale, na vaaia ai e Leoleo le taumafai o le ua molia e aapa lona lima i le ato o le faitoto’a, e foliga mai o lo o ia taumafai e aumai se mea o lo o i ai.

 

Na vave gaioiga a Leoleo i le taofia lea o Liu mai lana gaioiga sa taumafai e faia, ma iloa ai, o le fana sa i totonu o le ato o le faitoto’a o le ta’avale sa taumafai o ia e aapa i ai.

 

A o taofia ai o ia i le toese e fa’atali ai taualumaga o lana mataupu, na fa’atinoina ai e le ua molia le solitulafono o le sola ese lea mai le toese i Tafuna, ma faila ai loa e le malo le moliaga mamafa o le sola ese mai le toese fa’asaga ia te ia.

 

O le po o le aso 2 Oketopa 2016 e pei ona taua e le malo na tuua ai e Liu le toese i Tafuna e aunoa ma se fa’atanaga, i le mae’a ai lea ona fesoasoani i ai o le ali’i pagota o Joeita Fa’aaliga i le tatalaina lea o le faitoto’a o le potu sa loka ai o ia, ma maua ai loa le avanoa o Liu e sola ai i tua mai le toese, ma toe maua ai o ia e Leoleo i le aso na sosoo ai.

 

O lo o taofia pea Liu i le toese e aunoa ma se tupe e tatala ai o ia i tua, e fa’atali ai le aso lea ua fa’atulaga e toe valaau ai lana mataupu.

 

O le tama’ita’i loia ia Kristy Dunn o lo o tula’i mo le itu a le malo i lenei mataupu.

Comment Here