Ads by Google Ads by Google

Tala otooto o Fa’amasinoga


[ata: archive]
ausage@samoanews.com

SIAOSI IEREMIA

 

O le aso Gafua o le vaiaso fou lea ua fa’atulaga e fofoga aloaia ai le isi maliliega fou ua mae’a ona sainia e Ieremia Siaosi ma le malo, ma le fa’amoemoe e fa’amuta ai loa taualumaga o lana mataupu ua tele masina o fa’aauau mai.

 

O le iloiloga a Ieremia i luma o le fa’amasinoga maualuga i le vaiaso nei, na fa’amaonia ai le mae’a lea ona faila e itu e lua o se maliliega ua mae’a ona latou malilie i ai, ma ua sainia fo’i e le ua molia.

 

Na faailoa e le loia a le malo ia Bob Pickett i luma o le fa’amasinoga maualuga e fa’apea, ua mae’a ona foia e itu e lua le fa’afitauli na mafua ai ona tula’i mai se fa’aletonu i le ulua’i maliliega sa latou sainia i le masina ua mavae, ona sa tau fa’atali se fa’aiuga o le mataupu lona tolu a Ieremia sa i luma o le fa’amasinoga fa’aitumalo.

 

O le taimi nei e pei ona taua e le malo, ua i luma nei o le fa’amasinoga maualuga mataupu uma e 3 o loo tu’uaia ai e le malo ia Ieremia, o se auala lelei fo’i lea ua fa’a faigofie ai taualumaga o lenei mataupu, ona o lea ua i ai i totonu o le maliliega le tuutuuga, e tali ioe le ua molia i moliaga o loo i totonu o tagi e 2 sa faila fa’asaga ia te ia, ona talosaga ai loa lea o le malo i le fa’amasinoga ina ia solofua le tagi lona tolu sa latou fa’aulu fa’asaga i lenei ali’i talavou.

 

O tagi e 3 e pei ona tu’uaia ai e le malo ia Ieremia i le taimi nei, o lo o tu’uaia ai o ia i mataupu mamafa e pei o le talepe fale i le tulaga muamua atoa ai ma le gaoi, ma o ituaiga moliaga lava ia na ta’usala muamua ai fo’i o ia e le fa’amasinoga i le 3 tausaga talu ai.

 

O le tausaga e 2014 na ta’usala ai e le fa’amasinoga maualuga le ali’i o Ieremia i le moliaga mamafa o le gaoi, ma faanofovaavaaia ai o ia mo le 5 tausaga i lalo o tuutuuga e ao ona ia usita’i i ai, ma o ni isi o ia tuutuuga e aofia ai le fa’asa lea ona ia toe soli se tulafono, a ia avea o ia ma tagatanu’u lelei e tausisi i tulafono a le malo.

 

Ae i le amataga o le tausaga nei ina ua faila e le malo tagi e 2 fa’asaga ia Ieremia, na mafua ai loa ona talosaga le Ofisa Faanofovaavaaia i le fa’amasinoga mo sana poloaiga e fa’aleaoga ai tuutuuga o le nofovaavaaia a le ua molia.

 

I se iloiloga faapitoa sa faia a Ieremia i luma o le fa’amasinoga i ni nai masina e le i mamao atu, sa ia ta’utino ai i lona le usitaia lea o tuutuuga o lana nofovaavaaia, e mafua mai ina ua ia soli tulafono a le malo.

 

O lo o taofia pea Ieremia i le toese i Tafuna e fa’atali ai le aso Gafua o le vaiaso fou lea ua fa’atulaga e toe valaau ai lana mataupu.

 

RICHARD UMU

 

E 15 aso lea ua fa’asala ai le ali’i o Richard Umu i le toese i Tafuna, o se tasi lea o tuutuuga o lana nofovaavaaia e 24 masina sa tu’uina atu e le fa’amasinoga fa’aitumalo i le vaiaso na te’a nei, ina ua ta’usala o ia i le moliaga mama o le fa’aoolima i le tulaga tolu.

 

O se tasi o itu na pito sili ona matuia ai le solitulafono e pei ona ta’usala ai Umu e le faamasinoga, e le gata ua toe ta’usala o ia i le isi solitulafono ae o lo o fa’aaua pea ona faanofovaavaaia o ia i luma o le fa’amasinoga, ae o le solitulafono lava fo’i lea na ta’usala ai o ia e le fa’amasinoga i le tausaga na te’a nei, na mafua ai ona fa’anofovaavaaia o ia mo le 12 masina.

 

O le mataupu e pei ona ta’usala ai Umu e le faamasinoga, na mafua mai i se inugapia sa faia ma ni isi o ana uo i le fale o le ali’i na a’afia, lea na fa’ai’u puta ina ua tula’i mai se feeseeseaiga i le va o Umu ma le ali’i na a’afia, ma ia fa’ao’olima ai loa e ala i lona tu’i fa’alua o ona foliga ma palasi ai lea ali’i i lalo.

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa mo ia se’i fa’aauau ai pea ona galue i lana galuega o lo o tausi ai lona to’alua ma lona aiga. Sa ia fa’atoese fo’i i lana uo na a’afia, lea sa ia fa’aigoaina o ia i le “uso”, ina ia fa’amagalo sona sese e tusa ai o le fa’alavelave e pei ona tula’i mai.

 

Na fa’ailoa e Umu i le fa’amasinoga le mae’a lea ona toe teuteu le vevesi na tula’i mai i lo la va ma le ali’i na a’afia, ma ua toe sologa lelei mea uma i le mafutaga.

 

Na talosaga lana loia fautua ia Kate Hannaher ina ia fa’anofovaavaaia le ua molia, ae peita’i na finau le loia a le malo ia Woodrow Pengelly ina ia faanofovaavaaia Umu atoa ai ma se fa’asalaga fa’a falepuipui e aoaoina ai lona mafaufau mai lona le usita’i i poloaiga a le fa’amasinoga.

 

O ni isi o tuutuuga o le nofovaavaaia a Umu mo le 24 masina, o le faasa lea ona ia toe tagofia le ava malosi poo fualaau faasaina, auai i aoaoga e fesoasoani ai i le ita ma le tagofia o le ava malosi, ma ia asiasi i le Ofisa Faanofovaavaaia i masina taitasi. E 30 aso na manatu le fa’amasinoga e taofia ai o ia i le toese, peita’i o le a fa’amalumalu le isi 15 aso, se’i vagana ai aso e 15 o le a taofia mo’i ai loa o ia i le falepuipui i Tafuna, e aofia ai ma aso e 4 lea ua mae’a ona ia tuliina.

 

“Afai ae toe molia mai oe i se isi solitulafono ae o lo o fa’anofovaavaaia oe, o le a le toe i ai loa se isi avanoa e tuuina atu, ae o le a tu’uina atu loa oe i le toese mo se taimi umi ina ia aoaoina ai lou mafaufau”, o le saunoaga lea a le afioga i le ali’i fa’amasino ia Fiti Sunia.

 

MICHAEL SETU

 

A o fa’atupulaia ai pea le solitulafono o le ave ta’avale a o se’i le laisene i lenei tausaga, o le vaiaso na te’a nei na faila ai e le malo le moliaga mamafa o le ave ta’avale ao se’i e le fa’amasinoga le laisene ave ta’avale, fa’asaga i le ali’i o Michael Setu, e mafua mai i le fa’alavelave na maua ai e Leoleo o ia o loo ia fa’afoeina se ta’avale i luga o le auala a le malo i se vaega o Iliili.

 

Na avea le alu saoasaoa o se pikiapu lanu uliuli i le leva o le po i le masina na te’a nei, ma itu na taofia ai loa e Leoleo sa tiute i luga o le auala le ta’avale sa fa’afoeina e le ua molia, ae ina ua fesiligia o ia i lona laisene, na tali le ua molia ma le fa’amaoni, “o loo se’i e le fa’amasinoga lo’u laisene ave ta’avale”.

 

O se tasi o tuutuuga o le nofovaavaaia a Setu mo le umi e tasi le tausaga, ina ua ta’usala o ia i le moliaga mama o le ave ta’avale ‘ona i le amataga o le tausaga nei, o le fa’asa lea ona ia toe fa’afoeina se ta’avale mo le umi e 6 masina, o le umi fo’i lea ua se’i ai lona laisene ave ta’avale.

 

O le moliaga o le ave ta’avale a o se’i le laisene, o se solitulafono lea i le vaega D o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, ae fa’amalosia ai le tuliina lea o aso e 90 i le toese i Tafuna.