Tala otooto o Fa’amasinoga

ausage@samoanews.com

NORMAN SAGAPOLUTELE

 

O le ali’i lea na ta’usala e le fa’amasinoga fa’aitumalo i lona fa’aaoga o se pate kirikiti e ta ai le ulu o se isi ali’i, ua poloaina le taofia o ia i le toese i Tafuna mo le umi e 2 fa’aiuga o vaiaso, o se tasi lea o tuutuuga o lana nofovaavaaia 6 masina.

 

Na ulua’i tu’uaia e le malo le ali’i o Norman Sagapolutele i moliaga mama e 2 o le fa’atupu vevesi i nofoaga faitele ma le fa’ao’olima i le tulaga tolu, ae i lalo o se maliliega na sainia e le ua molia ma le malo ma talia fo’i e le fa’amasinoga, na tali ioe ai le ua molia i le moliaga o le fa’atupu vevesi i nofoaga faitele, ae solofua e le fa’amasinoga le moliaga o le fa’ao’olima i le tulaga tolu.

 

I le ta’usala ai o Sagapolutele i le moliaga o le fa’atupu vevesi i nofoaga faitele, sa ia taua ai lona fa’ao’olima i le ali’i na manu’a i le pate kirikiti, e mafua mai ina ua sua e le ali’i na a’afia o ia ao taumafai e sapo le polo kirikiti.

 

Na avea le finau o le loia a le malo ia Woodrow Pengelly i le fa’amasinoga e fa’asala Sagapolutele i se fa’asalaga fa’a nofovaavaaia e aunoa ma se fa’asalaga fa’a falepuipui, ma itu na si’isi’i ai loa i luga le si’ufofoga o le afioga i le ali’i fa’amasino ia Fiti Sunia, ma ia fesiligia ai le loia a le malo e fa’amatala atu le eseese o le pate kirikiti lea na fa’aaoga e le ua molia e fa’aoo ai manu’a i le ali’i na a’afia, ma le au laupapa o le samala sa gau, lea a fa’aaoga e le ali’i o Nicholas Nauer e sasa ai lona tuafafine, ao lea sa matua finau malosi le malo ina ia fa’asala Nauer i se fa’asalaga fa’a falepuipui.

 

A o taumafai Pengelly e fa’amanino i le fa’amasinoga e fa’apea, o le auala na fa’aaoga ai e Sagapolutele le pate kirikiti e le matuia tele, ae o le auala na fa’aaoga ai e Nauer le au laupapa gau o le samala e ta ai lona tuafine e fai si matuia, ona sa tau aafia ai ma le saogalemu o le pepe atoa ai ma lona ulufale faamalosi i totonu o le potu e ui sa tapuni e lona tuafafine le potu, na manatu ai Sunia na te fa’amanino i le ali’i loia le eseesega o a’upega ia e lua.

 

“O le eseesega o mea ia e lua, o le pate kirikiti e umi toe mamafa, e 2 fo’i lima e fa’aaoga e uu ai le pate i le taimi e fa’aaoga ai, ae o le au laupapa gau o le samala, e puupuu toe mama, e na o le tasi lava le lima e uu ai pe a fa’aaoga, o le eseesega lena”, o le saunoaga lea a Sunia ia Pengelly, ona ia faliu lea i le ali’i o Sagapolutele o loo saofa’i i tafatafa o lana loia fautua ia Kate Hannaher na fa’apea atu i ai.

 

“Sole, ua e laki ona e lei manatu le loia a le malo e molia oe i le moliaga mamafa, ae sili ai ona e laki e lei matuia tele manu’a sa a’afia ai le ali’i sa e sasaina i le pate, aua ana faapea e matuia manu’a na a’afia ai lea ali’i ma toe molia oe i le moliaga mamafa, e le o foliga ia o le Fa’amasino e te talanoa mai i ai, e ese le tagata e te vaai ai i le taimi o lau fa’amasinoga”, o le saunoaga lea a Sunia ia Sagapolutele.

 

O isi tuutuuga o le nofovaavaaia a le ua molia mo le 6 masina, e aofia ai lona totogi o le salatupe e $100, fa’asa ona ia toe soli se tulafono, ma ia taofia o ia mo fa’aiuga o vaiaso e 2 i le toese i Tafuna.

 

O le mae’a ai ona tu’uina atu e Sunia o le fa’asalaga a Sagapolutele, sa ia fa’atonuina ai loa le Failautusi a le Fa’amasinoga e toe valaau le mataupu a Nauer, lea ua mae’a ona fa’asala e taofia i le falepuipui mo le 30 aso, e mafua mai i le fa’alavelave lea na ia fa’ao’olima ai i lona tuafafine.

 

Ina ua toe valaau le mataupu a Nauer, sa toe faia ai loa e Sunia le suiga i lana fa’asalaga fa’a falepuipui, ma fa’aitiitia mai ai loa i le umi e 15 aso, ae le 30 aso e pei ona fofogaina muamua.

 

FA’AFETAI GAUPULE

 

E $500 le tupe lea ua faatulaga e le fa’amasinoga fa’aitumalo e totogi ona fa’atoa mafai lea ona tatala le ali’i o Fa’afetai Gaupule mai tua i le toese i Tafuna, e fa’atalitali ai taualumaga o lana mataupu lea ua faatulaga e toe fofogaina i le masina fou o Iulai.

 

O le vaiaso nei na tula’i ai Gaupule i luma o le fa’amasinoga ma ia teena ai moliaga o le faaoolima i le tulaga tolu, atoa ai ma le tu fua i le fanua o le isi aiga, e mafua mai i le fa’alavelave lea na tula’i mai i Leone i le amataga o le vaiaso nei, ina ua alu i le fale o le ali’i na la vevesi ma ia fa’ao’olima i ai.

 

Ae o le itu e sili ai ona matuia lenei mataupu, ina ua maua i fa’amaumauga a le fa’amasinoga faaitumalo, o lo o i ai le sala a le ali’i o Gaupule e lei totogiina talu mai le tausaga e 2016, ma fa’atulaga ai loa e le fa’amasinoga le tatau lea ona totogi muamua le $500 ona faatoa mafai lea ona tatala o ia i tua.

 

Afai ae mafai ona tatala o ia i tua, ua fautuaina le fa’asa lea ona ia toe alu i le fale o le ali’i na a’afia, pe na te toe soliina fo’i se tulafono a le malo, a ia avea o ia ma tagatanu’u lelei e tausisi i tulafono a le malo i taimi uma.

Comment Here