VENA LUAFUTU

O le taeao ananafi na faia ai le fa’aiuga a le fa’amasinoga fa’aitumalo ina ia tatala i tua le ali’i talavou lea na taofia mai e Leoleo mai Amouli i le vaiaso na te’a nei, e mafua mai i tu’uaiga i lona fa’aaoga lea o se a’upega ma’ai e ta tui ai le ulu o se isi ali’i, ina ua le mafai e le malo ona latou failaina ni moliaga fa’aopoopo fa’asaga i lea ali’i.

O le ogatotonu o le vaiaso na te’a nei na taofia mai ai e Leoleo mai Fagaitua le ali’i o Vena Luafutu, ma tu’uaia o ia i le moliaga o le fa’atupu vevesi i nofoaga faitele ma le fa’ao’olima i le tulaga tolu ma le fa’amoemoe, o se taimi o le vaiaso nei e faila ai e le malo moliaga fa’aopoopo fa’asaga ia te ia.

E leai se tupe na fa’atulaga e tatala ai Luafutu i tua ina ua mae’a lana ulua’i iloiloga i le aso Tofi na te’a nei, ae sa manatu le Fa’amasinoga e fa’atali seia mae’a ona faila e le malo moliaga fa’aopoopo fa’asaga ia te ia i le vaiaso nei.

Ae ina ua toe valaauina le mataupu a le ua molia ananafi, na fa’ailoa ai loa e le loia a le malo ia Woodrow Pengelly, o le a leai ni moliaga fa’aopoopo e faila fa’asaga ia Luafutu, ae o le a lava pea moliaga mama e 2 ua mae’a ona faila e tu’uaia ai o ia.

Talu ai ua leai ni moliaga fa’aopoopo fa’asaga ia Luafutu, na faia ai loa le fa’aiuga a le fa’amasinoga ina ia tatalaina loa o ia i tua e aunoa ma se tupe e totogi, e fa’atalitali ai le isi ana iloiloga lea ua fa’atulaga i le aso 8 Aokuso, 2017.

O ni isi o tuutuuga ua tatala ai le ua molia i tua e aofia ai le matua fa’asa lea ona ia toe taumafai e fa’afeso’ota’i le ali’i sa a’afia i le mataupu e pei ona molia ai o ia, aua ne’i ona toe tagofia le ‘ava malosi poo ni fualaau fa’asaina, aua ne’i ona toe solia se tulafono a le malo, a ia avea o ia ma tagatanu’u lelei e tausisi i tulafono a le malo i taimi uma.

“O le uiga o le poloaiga o le aua lea ne’i e toe taumafai e fa’afeso’ota’i le ali’i na a’afia i lenei mataupu, e aofia ai le fa’asa lea ona e toe alu i ai i lona fale, fa’asa le Facebook i ai poo ni isi lava auala tau fesootaiga fa’aonapo nei, a e vaai i ai i se vaega o le taulaga o lou tiute o le tula’i ma alu ese mai ai”, o le lapataiga lea a le afioga i le ali’i fa’amasino ia Fiti Sunia sa tu’uina atu ia Luafutu.

O le fa’alavelave lenei na tula’i mai i le vaveao o le aso Tofi ua te’a i Amouli, ina ua talosagaina e ni molimau se fesoasoani a Leoleo, e mafua mai i le fa’alavelave lea na manu’a ai se isi ali’i ina ua fa’ao’olima i ai le ua molia.

Na taua e molimau i Leoleo e fa’apea, o le fa’alavelave na tula’i mai ia ua fa’aaoga e le ua molia se vaega o le ipu malamalama ua ta’e e ta tui ai le ulu o le ali’i na a’afia, e mafua mai i se inugapia sa faia, ma mafua ai ona fa’anatinati atu le ali’i na a’afia i le falema’i mo togafitiga.

VINCENT TEVITA

E $500 le tupe lea ua fa’atulaga e le fa’amasinoga fa’aitumalo e totogi ona fa’atoa mafai lea ona tatala le ali’i o Vincent Tevita i tua mai le toese, e fa’atalitali ai taualumaga o lana mataupu lea ua fa’agasolo nei i luma o le fa’amasinoga.

O Tevita na taofia e Leoleo mai Ottoville i le fa’aiuga o le vaiaso na te’a nei, ona o tu’uaiga i lona faia lea o ni gaioiga e save’u ai le nonofo filemu o aiga latou te tuaoi, e mafua mai ina ua ia ‘ona ma alu ma se agaese i le fale o se tasi o ona tuaoi.

E pei ona taua i fa’amaumauga a le fa’amasinoga e fa’apea, o le vevesi i le va o le ua molia ma le aiga na a’afia, o le aiga fo’i lea latou te tuaoi, na mafua mai i le auala o loo uia e aiga uma e lua, lea o lo o finau Tevita e le tatau ona toe ui ai le aiga tuaoi ona o loo tigaina o ia ma lana fanau e fa’amama, peita’i o loo finau mai fo’i le aiga tuaoi e fa’apea, o latou e ana le fanua o loo ui ai le auala, e le tatau fo’i la ona toe uia e Tevita ma lona aiga.

O le fa’aiuga o le vaiaso na te’a nei na talosagaina ai e le aiga tuaoi se fesoasoani a Leoleo, ina ua alu atu le ua molia ma le agaese ma fa’alala i le Tama o le aiga, i le mae’a ai lea o se inugapia sa faia a Tevita ma ni isi o ana uo i lona fale.

O lo o tu’uaia e le malo ia Teiva i le moliaga mama o le fa’atupu vevesi i nofoaga faitele, peita’i na taua e le loia a le malo ia Woodrow Pengelly le ono faila e le malo o moliaga fa’aopoopo pe a mae’a su’esu’ega a Leoleo o lo o fa’agasolo i le taimi nei, lea e aofia ai moliaga o le soli fua o le fanua o le isi aiga, atoa ai ma le lafo o upu tau fa’amata’u.

O le $500 lea ua fa’atulaga e tatala ai Tevita i tua, o se taumafaiga ina ia puipuia ai le saogalemu i le va o aiga e 2, aemaise ai o le naunau o le fa’amasinoga ina ia taofia ai le toe tula’i mai o se isi vevesi i le lumana’i.

Afai ae mafai ona tatala Tevita i tua, ua fa’asa e le fa’amasinoga o ia ona ia toe alu i le fale o le aiga na a’afia, pe na te toe taumafai fo’i e fa’afeso’ota’i se isi o i latou i soo se auala, poo lona toe lafo fo’i i ai o ni upu tau fa’amata’u, a ia avea o ia ma tagatanu’u e tausi i tulafono a le malo.

Ua fa’asa fo’i ona ia toe tagofia le ‘ava malosi poo ni fualaau fa’asaina, a ia auai i soo se taimi e valaau ai lana mataupu.

O lo o taofia pea Tevita i le toese i Tafuna ma le fa’amoemoe o le aso 13 Iulai lea ua fa’atulaga e toe valaau ai lana mataupu.