Tala otooto o Fa’amasinoga


[ata: archive]
ausage@samoanews.com

MOLIA LE SA AVEA MA TAUSALA O AMERIKA SAMOA  AVE TA’AVALE ‘ONA

 

O le aso Tofi o le vaiaso nei na tula’i ai le sa avea muamua ma Tausala o Amerika Samoa, ona o tu’uaiga i lona le usitaia lea o tulafono i luga o le alatele e aofia ai ma le moliaga mama o le ave ta’avale ‘ona.

 

O le po o le aso Lulu o le vaiaso nei na taofia ai e Leoleo ia Anneliese Sword i le ave ta’avale ona, peita’i na toe tatala i tua ina ua ia totogiina le $500 e fa’atali ai le taimi o lana iloiloga i luma o le fa’amasinoga.

 

E 3 moliaga tau ta’avale afi (tickets) o lo o tu’uaia ai e le malo ia Sword, ma ua toe tolopo lana mataupu e fofogaina i le masina fou o Iulai. O ni isi o poloaiga ua tu’u atu e le fa’amasinoga e usita’i ai e aofia ai le fa’asa lea ona ia toe aveina se ta’avale, fa’asa ona ia toe tagofia le ‘ava malosi, fa’asa fo’i ona ia toe solia se tulafono a le malo

 

POLOA’I LE LEOLEO E OO ATU I LUMA O LE FA’AMASINOGA

 

Na avea le la auai o le ali’i o David Talaga i lana iloiloga sa fa’atulaga mo le taeao ananafi, e mafua mai i tu’uaiga o lona le usitaia lea o tulafono i luga o le alatele (traffic tickets), na tu’uina atu ai loa e le afioga i le ali’i fa’amasino ia Fiti Sunia sana poloaiga i le Leoleo sa ia tu’uina atu le pepa sala ia Talaga, e o o atu ai i luma o le fa’amasinoga fa’aitumalo e tali i fesili a le fa’amasinoga.

 

E le i fa’ailoaina mai e Sunia po o ai le Leoleo sa ia tu’uina atu le pepa sala ia Talaga, e o o foi i le loia a le malo ia Woodrow Pengelly, na te le i mana’o e fa’ailoa i le Samoa News po o ai le igoa o le Leoleo o lo o a’afia i lenei mataupu.

 

Ae tusa ai o le saunoaga a Sunia ina ua le auai Talaga i le taimi na valaau fa’alua ai e le Failautusi a le Fa’amasinoga lona igoa i le taeao nei e fa’apea, i luga o le pepa sala sa tu’uina atu e le Leoleo ia Talaga, o lo o taua ai le aso 23 Iuni 2017 e tatau ona o o atu ai Talaga i luma o le Fa’amasinoga mo le tu’uina atu o lana tali e tusa ai o le tu’uaiga fa’asaga ia te ia.

 

“O le aso 23 o Iuni e pei ona tusia i luga o le pepa sala a Talaga, e le o le taimi lena ua fa’atulaga e valaauina ai mataupu tau solitulafono i luga o le alatele a le Fa’amasinoga, ae foliga mai ua mafua ona tusia e le Leoleo le aso lea i luga o le pepa sala, ai ua ia manatu e usita’i atu i ai le fa’amasinoga i lana kalena lea ua nofo lava o ia ma fa’atulaga”, o le saunoaga lea a Sunia.

 

E pei ona masani le fa’amasinoga i le fa’akalenaina o ana galuega fa’atino, o le itula e 1:00 i le aoauli o aso Lua o vaiaso ta’itasi, o le taimi lena ua fa’akalena e le fa’amasinoga e iloiloina ai mataupu uma tau solitulafono i luga o le alatele, ma ua silafia fo’i e Leoleo taimi ma aso e valaau ai e le faamasinoga mataupu fa’apenei.

 

E le o se taimi muamua lea ua tu’uina atu ai e le fa’amasinoga lana poloaiga i ali’i ma tama’ita’i Leoleo ina ia o o atu e tali i fesili o lo o fiamalamalama i ai le fa’amasinoga, aemaise lava i mataupu tau solitulafono eseese o lo o tu’uaia ai tagatanu’u, aemaise lava i mataupu e fa’atatau i soligatulafono i luga o le alatele, ma ua i ai taimi ua poloaina ai e le fa’amasinoga ni isi o Leoleo latou te totogiina sala mo ‘tickets’ sa fa’asala ai tagata o le atunu’u ua fa’aleaoga e le fa’amasinoga, e mafua mai ina ua le atoatoa fa’amatalaga e tatau ona tusia ai, po o le tuai fo’i ona tu’uina atu i luma o le fa’amasinoga o kopi o ‘tickets’.

 

SOLOMONA TEOFILO

 

O le ali’i lea o lo o tuu’aia e le malo i le moliaga mamafa o le fa’ao’olima i le tulaga lua, e mafua mai i le fa’alavelave lea na ia fa’ao’olima ai i lona sister-in-law, ua toe molia nei fo’i o ia e le malo i le isi fo’i moliaga mamafa o le fa’ao’olima i le tulaga lua, e mafua mai i le fa’alavelave lea na ia fa’ao’olima ai fo’i i ni isi o lona aiga i le vaiaso nei.

 

O le masina o Oketopa o le tausaga na te’a nei na alia’e mai ai le mataupu e pei ona ulua’i tu’uaia ai e le malo ia Solomona Teofilo i le fa’ao’olima i le tulaga lua, e mafua mai ina ua ia fa’ao’olima i lona sister-in-law, sosoo ai ma lona fa’afefe o ia i le samala atoa ai ma lona tu’uina o se tama’i naifi i lona ua, ina ua alu atu e fa’anoi mai le ta’avale a lona uso na te fa’aaogaina ae fai i ai lona sister-in-law, e fa’afeso’ota’i muamua lona uso i fafo e fa’anoi i ai le fa’avale.

 

Na tatala i tua Teofilo ina ua ia totogiina le tupe e $5,000 na fa’atulaga e le fa’amasinoga e tatala ai o ia, i lalo o tuutuuga e tatau ona ia usita’i i ai, lea e aofia ai le fa’asa lea ona ia toe solia se tulafono a le malo. E talitonu le Samoa News, o le tinoitupe e $5,000 na tatala ai Teofilo i tua, na totogi e lona niece le isi $2,500 ae totogi e lana uo teine sa la mafuta i lea taimi le isi $2,500.

 

A o le i faila e le malo le latou tagi fou fa’asaga ia Teofilo, na muamua talosaga le niece a le ua molia i luma o le fa’amasinoga maualuga, ina ia toe fa’afo’i atu lana $2,500 sa tu’uina atu e tatala ai lona uncle i tua. E le i mana’o le fa’amasinoga e fa’ailoa e le niece i totonu o le potu fa’amasino le mafua’aga ua ia talosaga ai e toe fa’afo’i atu lana tupe sa fesoasoani ai i le tatalaina i tua o Teofilo.

 

E 2 aso talu ona tuana’i le failaina e le niece o lana talosaga i luma o le fa’amasinoga maualuga, ae faila loa e le malo la latou tagi fou fa’asaga ia Teofilo i luma o le fa’amasinoga fa’aitumalo, ma o le taeao nei na tofu atu ai le mataupu a Teofilo i luma o le fa’amasinoga maualuga, ina ua ia le manatu e fa’ataunu’u lana ulua’i iloiloga lea e tatau ona faia i luma o le fa’amasinoga fa’aitumalo e saili ai pe lava ni mau e lagolago ai le tagi fa’asaga ia te ia.

Comment Here