Ads by Google Ads by Google

Tala otooto o Fa’amasinoga

ausage@samoanews.com

TALIGALU AH SIU

 

O le taeao ananafi na toe tula’i ai fo’i le ali’i o Taligalu Ah Siu i luma o le fa’amasinoga fa’aitumalo, ona o tu’uaiga i lona taumafai lea e osofa’i se fale o se aiga i Vaitogi, atoa ai ma le fa’aauauina pea lea o le fa’afitauli o loo a’afia ai o ia, o lona taumafai lea e utu ese mai kesi mai tane kesi o ta’avale o aiga ae sogisogi ai.

 

I fa’amaumauga a le fa’amasinoga sa taua ai e fa’apea, o le vave o taumafaiga a Leoleo e su’e ia maua le ali’i o Ah Siu, na fa’asaoina mai ai o ia mai tagata o le nu’u, lea na latou saili e fasi ia te ia, ona ua a’afia le tele o a latou meatotino i ana gaioiga.

 

Na teena e Ah Siu tu’uaiga o le taumafai e talepe se fale fa’apea ai ma le fa’atupu vevesi i nofoaga faitele, ma ua toe tatalaina nei o ia i tua e fa’atali ai le aso lea ua fa’amoemoe e tula’i ai i luma o le fa’amasinoga fa’aitumalo mo le isi ana iloiloga.

 

I le 2 tausaga talu ai, na ta’usala ai e le fa’amasinoga maualuga ia Ah Siu i lona fa’aaogaina o fualaau oona e aofia ai ma penisini o ta’avale, ma faanofovaavaaia ai o ia mo le 5 tausaga i lalo o tuutuuga a le fa’amasinoga.

 

O ni isi o ia tuutuuga e aofia ai lona auai i ni aoaoga faafaufautua e fesoasoani ai i a’afiaga o fualaau ma mea oona o loo ia fa’aaogaina.

 

Sa taliaina fo’i e le fa’amasinoga se talosaga na fa’aulu e le loia fautua sa tula’i mo Ah Siu i luma o le fa’amasinoga maualuga, mo se poloaiga e fa’ataunu’u ai se su’esu’ega i le mafaufau o lenei ali’i talavou, pe a’afia o ia i le gasegase o le mafaufau pe leai.

 

MILTON WOLF

 

O ni isi o tuutuuga o le nofovaavaaia a le ali’i o Milton Wolf e pei ona tu’uina atu e le fa’amasinoga fa’aitumalo i le taeao ananafi, e le gata ua fa’asa ona ia toe tagofia le ‘ava malosi, avea o ia ma tagata nu’u e usita’i i tulafono a le malo, a ia totogi fo’i lana salatupe e $100.

 

Na ulua’i tu’uaia e le malo ia Wolf i moliaga mama e lua o le fa’aoolima i le tulaga tolu atoa ai ma le fa’atupu vevesi i nofoaga faitele, ae i lalo o se maliliega na latou sainia ma le malo ma talia e le fa’amasinoga, ua tali ioe ai Wolf i le moliaga o le faaoolima i le tulaga tolu, ae solofua le moliaga o le fa’atupu vevesi i nofoaga faitele.

 

Na fautuaina e le afioga i le ali’i fa’amasino ia Fiti A. Sunia ia Wolf, e le tatau ona fa’aauau pea le mea sese o lo o ia faia, o le solitulafono ae o lo o nofovaavaaia o ia.

 

Na finau le loia a Wolf i le fa’amasinoga, e lava aso e 26 lea ua mae’a ona taofia ai Wolf i le toese e avea ma ana fa’asalaga i lenei mtaupu, peita’i na finau le itu a le malo ina ia taofia le ua olia i le toese mo le umi e sili atu i le 30 aso.

 

I le mae’a ai ona iloilo e le fa’amasinoga o fa’amatalaga uma e uiga i lenei mataupu, sa ia poloaina ai loa le taofia o Wolf i le toese i Tafuna mo le umi e 45 aso, peita’i, o le a lava na o aso e 26 lea ua mae’a ona ia tuliina e fai ma ana fa’asalaga i lenei mataupu, ae o le a fa’amalumalu lona tuliina o aso 19 o lo o totoe ai, fuafua lava i lona usitaia o tuutuuga a le fa’amasinoga.

 

“E le toe i ai se isi lava avanoa mo oe pe afai e te toe soliina se isi tulafono a le malo i totonu o le 18 masina lea ua e nofovaavaaia ai”, o le lapataiga lea a Sunia i le ali’i o Wolf.