VILIAMU SOU

Ua tu’uaia nei e le malo le ali’i o Viliamu Sou i le moliaga mamafa o le fa’ao’olima i le tulaga lua, fa’apea ai ma le moliaga mama o le fa’atupu vevesi i nofoaga faitele, e mafua mai i le fa’alavelave lea na tula’i mai i Pava’ia’i i le fa’aiuga o le vaiaso na te’a nei, lea o lo o tu’uaia ai o ia i lona fa’aaoga o se a’upega malo e fa’ao’o ai manu’a i se tamaititi e 16 tausaga le matua.

O se fa’alavelave na tula’i mai i le va o le atali’i a le ua molia ma le tamaititi na a’afia, na mafua ai loa ona ita le ua molia ma fa’ataunu’u le solitulafono e pei ona tu’uaia ai o ia e le malo.

O le aso Tofi o le vaiaso nei lea ua fa’atulaga e faia ai le ulua’i iloiloga o lenei mataupu i luma o le fa’amasinoga fa’aitumalo, lea o le a iloilo ai e le fa’amasinoga mau fa’amaonia e le malo o lo o lagolago ai la latou tagi fa’asaga ia Sou.

O lo o taofia pea Sou i le toese i Tafuna se’i vagana ua ia totogi le tupe e $5,000 ona fa’atoa mafai lea ona tatala o ia i tua, ae afai e mafai ona tatala o ia i tua, ua poloaina e le fa’amasinoga le fa’asa lea ona ia toe taumafai e fa’afeso’ota’i molimau a le malo o loo i taua i le ripoti a leoleo, lea e aofia ai le tamaititi na a’afia ma lona aiga.

FRED UPU

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga i le ali’i o Fred Upu, e mafua mai i le fa’alavelave lea na maua ai o ia e leoleo o lo o ia fa’afoeina se ta’avale i luga o le auala a le malo i Tafuna, ae o lo o se’i lona laisene ave ta’avale.

O lo o taua i ripoti e fa’apea, na avea le alu saoasaoa o le ta’avale na fa’afoe e le ua molia ma auala na tuliloa ai loa lana ta’avale e leoleo, ae fesiligia i le mafua’aga ua soona alu saoasaoa ai lana ta’avale ma ova atu maila sa ia fa’aaogaina i maila fa’atulagaina.

Ao fesiligia e leoleo ia Upu, sa vaaia ona foliga fefe ma le le mautonu, ae ina ua mana’omia e leoleo lona laisene ave ta’avale, sa pepelo i ai le ua molia o lo o galo i le fale, mulimuli ane ina ua fa’aauau pea le fesiligiaina o ia, sa ia ta’utino ai loa i leoleo, o lona laisene o loo se’i e le fa’amasinoga mo le umi e 6 masina, e mafua mai ina ua ta’usala o ia i le moliaga mama o le ave ta’avale ‘ona i le tausaga na te’a nei.

O le fa’aiuga o le masina nei lea ua fa’atulaga e toe valaau ai le mataupu a Upu i luma o le fa’amasinoga, ma o lo o tumau pea poloaiga o lo o tatala ai o ia i tua e fa’atali ai le aso o lana iloiloga, e pei o le fa’asa lea ona ia toe fa’afoeina se ta’avale, fa’asa fo’i ona ia toe solia se tulafono a le malo.