Ads by Google Ads by Google

Tala otooto o Fa’amasinoga


[ata: archive]
ausage@samoanews.com

IOANE GALI

 

O le taeao nei lea ua toe fa’aauau mai ai le iloiloga o le mataupu a le ali’i o Ioane Gali, i le mae’a ai lea ona fautuaina e le afioga i le ali’i fa’amasino sili ia Michael Kruse o loia a itu e lua, e tusa ai o le gaioiga a Gali lea ua faia, i lona mana’o lea e tali ioe loa i le moliaga o loo tu’uaia ai o ia e le malo i lona lava loto malie, e aunoa ma se maliliega sa latou sainia ma le malo.

 

O loo tu’uaia e le malo ia Gali i le moliaga mamafa o le fa’ao’olima i le tulaga lua, ae tusa ai ma le fa’aaliga sa tu’uina atu e le loia a le malo, le tama’ita’i ia Christy Dunn e fa’apea, o le loto malie lava o Gali lea ua mafua ai ona ia manatu e tali ioe loa i le moliaga mamafa lea o loo tu’uaia ai o ia, e mafua mai i le fa’alavelave lea na tula’i mai i le aso 14 Ianuari 2017, lea o lo o tu’uaia ai o ia i lona fa’aaogaina o se agaese e fa’ao’o ai ni manu’a tuga i se isi tagata.

 

Na fesili Kruse i le loia a Gali ia Douglas Fiaui pe ua silafia e le ua molia le matuia o le fa’asalaga o le solitulafono o loo tu’uaia ai o ia, lea fo’i ua ia mana’o e tali ioe i ai, ae na tali Fiaui, ua mae’a ona fa’amalamalama ia Gali le tulaga lea, ua ia silafia fo’i.

 

O le taimi lea na valaau ai loa e Kruse loia a itu e lua mo sa latou talanoaga puupuu i luma o lana laulau mo sina taimi, ma faia ai loa le fa’aiuga e toe tolopo le mataupu a Gali e toe fofogaina i le taeao nei.

 

O le moliaga o le fa’ao’olima i le tulaga lua, o le vaega D lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

 

O lo o taofia pea Gali i le toese i Tafuna e fa’atali ai le toe valaauina o lana mataupu i le itula e 9:00 i le taeao nei i luma o le fa’amasinoga maualuga.

 

OKESENE ALO

 

O le aso 30 Iuni lea ua fa’atulaga e toe valaau ai le mataupu a le susuga ia Okesene Alo i luma o le fa’amasinoga maualuga, i le mae’a ai lea ona ia teena i moliaga uma o lo o tu’uaia ai o ia e le malo, e mafua mai i le fa’alavelave lea na alia’e mai i le nofoaga autu o le falepuipui o tamaiti i Tafuna (JDC), lea o lo o tu’uaia ai o ia fa’atasi ai ma isi Leoleo o le falepuipui i lo latou faia o gaioiga e le tusa ai ma le tulafono, e aofia ai le tagofia o fualaau fa’asaina atoa ai ma le fa’ataga o pagota e tuua le nofoaga o loo tuli ai a latou fa’asalaga.

 

Afai ae fa’aauau pea le mataupu a Alo e aunoa ma le faia o se maliliega ma le malo e fa’amuta ai taualumaga o lana mataupu, o le aso 15 o Iulai 2018 lea ua fa’atulaga e faia ai lana fa’amasinoga autu.

 

Na talosaga le loia a le malo ia Christy Dunn ina ia fa’atulaga fa’atasi le mataupu a Alo ma isi leoleo o le falepuipui ia Letuli ma Wilson i le aso 2 Iuni o le tausaga nei, peita’i na fa’ailoa e le loia a Alo ia Sharron Rancourt i le fa’amasinoga e fa’apea, o le fa’afitauli o le vave fa’atulaga o le aso e faia ai le iloiloga a Alo, ona o lea lava e lei taunu’u atu le ripoti a le malo e tusa ai o mau fa’amaonia e lagolago ai le tagi a le malo.

 

O lo o taofia pea Alo i le toese i Tafuna i le taimi nei sei vagana ua totogi le tupe e $50,000 ua fa’atulaga e le fa’amasinoga, ona mafai ai loa lea ona tatala o ia i tua e fa’atalitali ai taualumaga o lana mataupu.

 

FILIPO SILIGA

 

E 2 fa’aiuga o vaiaso lea ua poloaina e le fa’amasinoga fa’aitumalo le ali’i o Filipo Siliga e taofia ai o ia i le toese i Tafuna, ina ua fa’amaonia e le fa’amasinoga fa’aitumalo le moliaga o le fa’ao’olima i le tulaga tolu sa tu’uaia ai o ia e le malo, i lalo o se maliliega sa sainia e Siliga ma le malo ma talia e le fa’amasinoga.

 

O le matuia o le gaioiga sa faia e le ua molia i lenei mataupu, ua manatu ai le fa’amasinoga ina ia i ai se fa’asalaga fa’afalepuipui e fai ma lesona i le mafaufau o Siliga. O se fa’alavelave na tula’i mai i Aua i le masina o Fepuari o le tausaga nei i se taugaupu i le va o Siliga ma le ali’i na manu’a, na fa’ai’u ai loa i le tu’i lea e le ua molia o le ali’i na a’afia ma pau ai i lalo, sosoo ai ma lona kiki o lona fatafata a’o saofa’i i lalo.

 

Fa’atoese le ua molia e tusa ai o lana gaioiga sa faia peita’i na fa’amanatu i ai e le fa’amasinoga e fa’apea, ua laki e le o ni moliaga mamafa na faila e le malo fa’asaga ia te ia.

 

E ese mai i le fa’asalaga fa’a falepuipui e 2 fa’aiuga o vaiaso ua poloaina le ua molia e tuli i le toese, ae ua poloaina fo’i o ia na te totogi le salatupe e $125, atoa ai ma lona auai i aoaoga fa’a faufautua e fesoasoani ai i le ita atoa ai ma le tagofia o le ‘ava malosi.