Ads by Google Ads by Google

Tala otooto o Fa’amasinoga


[ata: archive]
ausage@samoanews.com

LOIMATA MIKA

 

O le masina fou o Aperila lea ua fa’atulaga e lau ai le fa’asalaga a le ali’i o Loimata Mika i luma o le fa’amasinoga maualuga, i le mae’a ai lea ona fa’amaonia e le fa’amasinoga o le moliaga o le talepe fale i le tulaga lua ua ta’usala ai o ia, ina ua talia e le fa’amasinoga maualuga se maliliega na sainia e le ua molia ma le malo i le vaiaso na te’a nei.

 

Na ulua’i tu’uaia e le malo ia Mika i moliaga e 3, lea e aofia ai le moliaga mamafa o le talepe fale i le tulaga muamua, lea ua toe suia i le talepe fale i le tulaga lua e pei ona ia tali ioe ai, ma moliaga mama e lua lea ua solofua, o le fa’aoolima i le tulaga tolu atoa ai ma le tu fua i le fale o le isi aiga.

 

Na ta’utino Mika i luma o le fa’amasinoga e fa’apea, i se taimi o le po o le aso 1 Aokuso 2016 i Amerika Samoa, na ia ulufale ai i totonu o se fale e mautotogi ai ni tagata, ma ia aga’i atu ai i le potu o loo moe ai se tama’ita’i ma le fa’amoemoe e fa’ataunu’u ai se solitulafono.

 

Na ta’utino le ua molia i lona ulufale i totonu o le potu e aunoa ma se fa’atanaga, ma ia pa’i atu i le tino o le tama’ita’i sa moe, lea na mafua ai ona te’i lea tama’ita’i ma ee i luga, ma mafua ai loa ona ia alu ese mai totonu o le fale.

 

Ua malilie itu e lua e talosaga i le fa’amasinoga e fa’asala le ua molia i se fa’asalaga fa’anofovaavaaia, peita’i ua malamalama Mika, tusa lava pe finau loia i le fa’amasinoga mo se fa’asalaga mama, e pule le fa’amasinoga pe talia pe teena fo’i lea talosaga, e le gata i lea, ua ia malamalama fo’i, e le mafai ona toe suia lana tali ioe ua tu’uina atu i le fa’amasinoga, pe afai e tu’uina mai se fa’aiuga a le fa’amasinoga ae le tusa ai ma lona mana’o.

 

O lo o taofia pea Mika i le toese i Tafuna e fa’atali ai le aso lea ua fa’atulaga e lau ai lana fa’asalaga.

 

O le ali’i loia ia Gerald Murphy sa tula’i mo le malo ae o le ali’i loia ia Michael White na tula’i mo le ua molia i lenei mataupu. O le afioga i le fa’amasino sili ia Michael Kruse na iloiloina lenei mataupu, ae lagolagosua i ai afioga i alii fa’amasino lagolago ia Fa’amausili Pomele ma Muasau T. Tofili.

 

MELVIN ETEUATI

 

Ua fautuaina e le fa’amasinoga maualuga loia o loo galulue mo le fa’amautuina o le maliliega i le va o Melvin Eteuati ma le malo, ina ia fa’amanino i le fa’amasino le mataupu e fa’atatau i le tupe lea ua mana’o le malo e tatau ona toe totogi e le ua molia, e pei ona taua i se vaega o le latou maliliega lea ua mae’a ona fofogaina i luma o le fa’amasinoga.

 

Mai mataupu tau solitulafono e 2 o loo tuuaia ai e le malo ia Eteuati, o loo tu’uaia ai o ia i le mataupu muamua i moliaga mamafa e lua, le moliaga o le talepe fale i le tulaga muamua atoa ai ma le moliaga o le gaoi, ae i le mataupu lona lua, e 3 moliaga o lo o tu’uaia ai o ia e le malo, lea e aofia ai moliaga mamafa e lua o le talepe fale i le tulaga muamua ma le gaoi, fa’apea ai ma moliaga mama o le fa’aleagaina lea o meatotino a se isi tagata i le tulaga tolu.

 

I se vaega o le maliliega a le malo ma Eteuati, ua mana’o ai le malo e tali ioe Eteuati i le moliaga o le talepe fale i le tulaga muamua mai le ulua’i mataupu tau solitulafono o loo tu’uaia ai o ia, ma latou talosaga ai loa i le fa’amasinoga ina ia solofua le moliaga e tasi o loo totoe i le pepa o tagi sa latou fa’aulu fa’asaga ia Eteuati i le mataupu muamua, solofua atu ai ma moliaga uma o loo i le mataupu tau solitulafono lona lua o loo tu’uaia ai fo’i o ia.

 

Fai mai le malo, o le faalavelave muamua e pei ona tuuaia ai Eteuati, na ulufale faamalosi ai le ua molia i totonu o se fale o se aiga ma ave faagaoi le tele o meatotino sa i ai i totonu e aofia ai ma se tinoitupe e $500, ae o le mataupu lona lua, na ulufale faamalosi ai fo’i le ua molia i totonu o le fale o le aiga na a’afia ma ave faagaoi ni isi o meatotino toe fa’aleaga isi meatotino, lea e tusa ma le $1,180 le tau aofa’i o mea uma sa gaoia ma faaleagaina mai le fale lona ulua sa ia osofaia.

 

O se tasi o tuutuuga o le maliliega a le malo ma Eteuati, ua talosaga ai le malo i le fa’amasinoga ina ia poloaina le ua molia e toe totogi le $500 mai le fale muamua sa ia osofaiga, atoa ai ma le $1,180 mai le fale lona lua na a’afia, peita’i e le o nofo lelei lea talosaga i le finagalo o le fa’amasinoga.

 

Saunoa Kruse e fa’apea, e faigata i le fa’amasinoga ona faia lea tulaga, ina ne’i le mafai e le ua molia ona totogi le $1,180 mai le mataupu lona lua, ona oo lea i se isi taimi oi luma ae toe mana’o le malo e molia Eteuati i lona osofaia o le fale lona lua, ae o lea ua mana’o le malo e solofua le mataupu lea mo le taimi nei.

 

Ua fautuaina loia ina ia toe talanoa mo le fa’amaninoina o le mataupu e pei ona atugalu i ai le fa’amasinoga, ao lei toe valaauina lenei mataupu i le isi 2 vaiaso o loo lumana’i nei.