Tala otooto o Fa’amasinoga

ausage@samoanews.com

DANNY MIKA

 

O le aso Faraile o le vaiaso nei lea ua fa’amoemoe e faia ai le fa’aiuga a le fa’amasino sili ia Michael Kruse ma le afioga i le fa’amasino lagolago ia Fa’amausili Pomele, pe tatau ona fa’aleaoga loa le avanoa na tatala ai Danny Mika i tua, ae poloaina loa le taofia o ia i le toese e fa’atali ai taualumaga o lana mataupu lea o loo fa’agasolo i le taimi nei.

 

O le fa’aiuga lea ua fuafua le fa’amasinoga e tuuina mai i le aso Faraile, e mafua mai ina ua fa’alua ona tuai atu Mika i le taimi na valaau ai lana mataupu. Ina ua fa’atulaga le isi iloiloiga a Mika i le amataga o le masina o Ianuari na te’a nei, sa tuai atu le ua molia i le taimi o lana iloiloga, ma poloaina ai loa e le fa’amasinoga le tusi saisai e saili mai ai o ia, peita’i ina ua sauni le fa’amasinoga e malolo, na fa’ailoa e le loia a Mika ia Douglas Fiaui i le fa’amasinoga le auai atu o Mika mo lana iloiloga.

 

Ina ua fesiligia le mafua’aga o lona tuai atu, na tali le ua molia sa pa le pa’u o lana ta’avale. Na talia e le fa’amasinoga le alofaga a le ua molia ma toe fa’aleaoga ai loa le tusi saisai na poloaina e pu’e fa’apagota mai ai o ia, ma fautauina ai loa o ia e le ali’i fa’amasino ina ia aua ne’i toe tuai atu i le fa’amasinoga i se isi taimi e toe valaau ai lana mataupu.

 

I le taeao ananafi, na toe tuai ai fo’i Mika i lana iloiloga, ae ina ua fesiligia o ia i le mafua’aga, sa ia taua le pisi o le auala.

 

Na fa’ailoa e Kruse i le loia a Mika e fa’apea, pau le lagona lea ua oo mai i le fa’amasinoga, o le fa’aleaoga o le poloaiga na tatala ai le ua molia i tua, ae faia loa se poloaiga fou e taofia ai o ia i le toese, pau popolega o le fa’amasinoga o loo i ai, o le $5,000 lea na totogi e tatala ai le ua molia i tua e fa’atali ai taualumaga o lana mataupu, o le tupe a le tagata e suafa ia “Duke Vele”.

 

O le aso Faraile o le vaiaso nei lea ua fa’amoemoe e toe tula’i ai Mika, ma ua poloaina fo’i e le fa’amasinoga le auai o le susuga a Vele, ina ia ona silafia le tulaga e oo i ai lana tupe pe afai e fa’aleaoga e le fa’amasinoga le poloaiga na tatala ai Mika i tua, e le gata e toe taofia le ua molia i le toese, ae o le a le toe maua e ia lana tupe sa totogi.

 

O Mika o loo tuuaia e le malo i le moliaga o lona umia fa’asolitulafono o vaega o le fualaau fa’asaina o le aisa, ma o loo tumau pea tuutuuga o loo tatala ai o ia i tua e fa’atali ai lana iloiloga lea ua fa’amoemoe e faia i le fa’aiuga o le vaiaso nei.

 

CLAUDE MAMEA

 

Ua poloaina e le afioga i le ali’i fa’amasino ia Fiti Sunia le tama’ita’i Leoleo ia Claude Mamea i le vaiaso na te’a nei, na te totogi le tupe e $60, o le salatupe lea sa tatau ona totogi e le tagata e ana le pepa sala (ticket) lea sa ia faia, ae na te le’i failaina i luma o le fa’amasinoga, e tusa ai o ala o le tulafono.

 

O le sala e pei ona poloaina le tama’ita’i Leoleo ia Mamea na te totogiina, e aofia ai le sala e $50 ma le $10 o le fa’amalosi tulafono, lea e totogi e soo se tasi e ta’usala e le fa’amasinoga i moliaga tau ta’avale afi.

 

Na valaau e le fa’amasinoga le tama’ita’i Leoleo ia Mamea e oo atu i luma o le fa’amasinoga fa’aitumalo i le vaiaso na te’a nei, ina ua faia le poloaiga a le fa’amasinoga e solofua ai le moliaga tau ta’avale afi fa’asaga i se tasi o tagatanu’u na tu’uina atu i ai e le tama’ita’i Leoleo le pepa sala, e mafua mai i le fa’atamala o le tama’ita’i Leoleo e fa’atino lana galuega, o le failaina lea o le pepa sala i luma o le fa’amasinoga.

 

Ina ua fesiligia e Sunia le tama’ita’i Leoleo ia Mamea i le mafua’aga o lona le failaina o le pepa sala, na fa’amalulu Mamea i le ali’i fa’amasino i lona fa’atamala e faila le pepa sala.

 

Saunoa Sunia e fa’apea, “O lou fa’amatala i le fa’atinoina o ou tiute ua mafua ai ona le totogiina e le tagata molia lana sala e $50 fa’apea ai ma le $10 mo le fa’amalosia o le tulafono”, o le saunoaga lea a Sunia ma ia poloaina ai loa le tama’ita’i Leoleo e totogi le sala atoa e pei ona taua i le fa’aiuga o le vaiaso na te’a nei.

 

O le moliaga tau ta’avale afi sa molia ai le tagatanu’u lea na solofua e le fa’amasinoga, o le la’asia o le auala i se tulaga e le saogalemu (unsafe passing).

Comment Here